អ៊ុយក្រែន បាញ់ទម្លាក់យន្តហោះរុស្ស៊ី ដែលដឹកទាហានឆ័ត្រយោង ១៥០នាក់ ចូលវាយលុកទីក្រុង គៀវ

កងកម្លាំងប្រដាប់អាវុធរបស់ប្រទេសអ៊ុយក្រែន បាននិយាយកាលពីយប់ថ្ងៃសុក្រទី២៥ខែកុម្ភៈថា ពួកគេបានបាញ់ទម្លាក់យន្តហោះយោធារុស្ស៊ីមួយគ្រឿង ដែលដឹកទាហានឆ័ត្រយោងចំនួន ១៥០នាក់នៅជាយក្រុង គៀវ។

យោធាអ៊ុយក្រែននិយាយថា យន្តហោះមួយគ្រឿងនេះបានធ្លាក់នៅជិតតំបន់ Vasylkiv ដែលមានចម្ងាយជាង ៣០គីឡូម៉ែត្រភាគខាងត្បូងទីក្រុង គៀវ។

ជោគវាសនារបស់អ្នកនៅលើយន្តហោះ មិនត្រូវបានគេដឹងទេ។ យន្តហោះនេះ គឺជាយន្តហោះដឹកជញ្ជូនយោធាចម្ងាយមធ្យម ដាក់ឲ្យប្រើប្រាស់ជាលើកដំបូងក្នុងឆ្នាំ១៩៧៤ ហើយអាចផ្ទុកទាហានដែលមានបំពាក់ពេញលេញពី ១៥០ ទៅ ២២៥ នាក់។ យន្តហោះត្រូវបានប្រើដើម្បីទម្លាក់ទាហានឆ័ត្រយោងទៅក្នុងសមរភូមិ និងផ្គត់ផ្គង់អាវុធ។

ដំណឹងនេះបានកើតឡើងភ្លាមៗ បន្ទាប់ពីប្រធានាធិបតីអ៊ុយក្រែនបានព្រមានថា រុស្ស៊ីមានបំណងចូលកាន់កាប់ទីក្រុង គៀវ នៅពេលយប់។

ជាមួយនឹងកងទ័ព ៩០០ ០០០នាក់, រុស្ស៊ីជាប្រទេសមានយោធាធំជាងគេលំដាប់ទី៤នៅលើពិភពលោក ហើយក្នុងរយៈពេលជាងមួយទសវត្សរ៍នៃកំណែទម្រង់ និងលទ្ធកម្ម បានធ្វើឲ្យរុស្ស៊ីក្លាយជាគូប្រជែងដ៏គ្រោះថ្នាក់បំផុតមួយ។

ដោយឡែក អ៊ុយក្រែនមានកងទ័ពត្រឹមតែ ៣៦១ ០០០នាក់ប៉ុណ្ណោះ ថ្វីបើលោក Zelensky បានចេញបញ្ជាឲ្យកែនទ័ព និងហាមឃាត់បុរសអាយុពី១៨ ដល់ ៦០ឆ្នាំមិនឲ្យចាកចេញពីប្រទេស ដើម្បីត្រៀមខ្លួនសម្រាប់ការប្រយុទ្ធក៏ដោយ៕

ប្រែសម្រួល៖ Vann Vann

ប្រភព៖​ Daily Mail

ចុចអាន៖ រុស្ស៊ី ព្រមានប្រទេស២ទៀត ឲ្យប្រយ័ត្នខ្លួន កុំចង់ចូល ណាតូ ឲ្យសោះ