មូលនិធិជាតិជំនួយសង្គម និងអង្គការមូលនិធិសប្បុរសធម៌ឆឺជី នាំយកសម្ភារៈផ្គត់ផ្គង់ការរស់នៅ ជូនគ្រួសាររងគ្រោះដោយអគ្គិភ័យ

មូលនិធិជាតិជំនួយសង្គម សហការជាមួយអង្គការមូលនិធិសប្បុរសធម៌ ឆឺជី ដឹកនាំដោយលោក ឈួរ សុបញ្ញា ប្រតិភូរាជរដ្ឋាភិបាលទទួលបន្ទុក ជាអគ្គនាយកមូលនិធិជាតិជំនួយសង្គម នៅរសៀលថ្ងៃទី ១១ ខែឧសភា ឆ្នាំ ២០២២ បាននាំយកសម្ភារៈផ្គត់ផ្គង់ការរស់នៅ ជូនគ្រួសារបងប្អូនខ្មែរឥស្លាម ៣៨គ្រួសារ ស្មើ ១៨ខ្នងផ្ទះ ដែលរងគ្រោះដោយសារភ្លើងឆេះផ្ទះរបស់ពួកគាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឈួរ សុបញ្ញា ក្នុងនាមឲ្យថ្នាក់ដឹកនាំក្រសួងសង្គមកិច្ច អតីតយុទ្ធជន និងយុវនីតិសម្បទា បានពាំនាំការសាកសួរសុខទុក្ខ ពីលោករដ្ឋមន្ត្រី វង សូត ដោយក្តីនឹករលឹក ជាពិសេសចូលរួមសោកស្តាយជុំវិញហេតុការណ៍អគ្គីភ័យ ដែលកើតឡើងបំផ្លាញផ្ទះសម្បែង និងទ្រព្យសម្បត្តិរបស់បងប្អូន ក្នុងមួយពព្រិចភ្នែកនោះ។

លោក ឈួរ សុបញ្ញា បានលើកឡើងថា ប្រមុខដឹកនាំក្រសួងសង្គមកិច្ច ជាពិសេសរាជរដ្ឋាភិបាល ដែ​ល​មានសម្តេច តេជោ ហ៊ុន សែន ជានាយករដ្ឋមន្ត្រី តែងតែគិតគូររាល់សុខទុក្ខរបស់ប្រជាពលរដ្ឋជាធំ ដោយមិនទុកឲ្យប្រជាពលរដ្ឋណាម្នាក់នៅឯកោឡើយ ទោះនៅដាច់ស្រយ៉ាលយ៉ាងណាក៏ដោយ។

ជាមួយគ្នានេះ លោកប្រតិភូរាជរដ្ឋាភិបាល ក៏បានសំណូមដល់ប្រជាពលរដ្ឋ បង្កើនការប្រុងប្រយ័ត្នចំពោះបញ្ហាអគ្គិភ័យ ព្រោះតែនាពេលនេះ ជារដូវក្តៅដោយត្រូវប្រយ័ត្នភ្លើងចង្ក្រាន ធូប ទាន ជាដើម។

សូមជម្រាបថា កាលពីវេលាម៉ោង១១ និង ៤០នាទីយប់ថ្ងៃទី ៦ ខែឧសភា ឆ្នាំ ២០២២ នៅតាមបណ្ដោយផ្លូវជាតិលេខ ៥ ចន្លោះគីឡូម៉ែត្រលេខ ៩ ក្នុងភូមិ ២ សង្កាត់ច្រាំងចំរេះ ១ ខណ្ឌឫស្សីកែវ រាជធានីភ្នំពេញ មានអគ្គិភ័យកើតឡើង ដោយបានបំផ្លាញផ្ទះសម្បែងបងប្អូនខ្មែរឥស្លាមអស់ ១៨ខ្នង រួមនឹងទ្រព្យសម្បត្តិអស់ទាំងស្រុង៕

អត្ថបទ៖ វិមាន