លោក Biden លើកឡើង ករណីឃាតកម្មអ្នកកាសែត Khashoggi ជាមួយរាជទាយាទអារ៉ាប៊ីសាអូឌីត

ប្រធានាធិបតីអាមេរិកលោក Joe Biden បាននិយាយថា លោកបានលើកឡើងពីករណីឃាតកម្មអ្នកកាសែត Jamal Khashoggi ក្នុងអំឡុងពេលជួបជាមួយរាជទាយាទអារ៉ាប៊ីសាអូឌីត Mohammed bin Salman។

លោក Biden បានធ្វើទស្សនកិច្ចប្រទេសអារ៉ាប៊ីសាអូឌីត ដើម្បីកសាងទំនាក់ទំនងឡើងវិញ ទោះធ្លាប់ប្តេជ្ញា ដាក់ប្រទេសនេះឲ្យក្លាយជារដ្ឋឯកោ ដោយសារកំណត់ត្រាសិទ្ធិមនុស្សរបស់ខ្លួនក៏ដោយ។

លោកនិយាយថា លោកបានបញ្ជាក់ច្បាស់ៗថា ការសម្លាប់នៅឆ្នាំ២០១៨ គឺមានសារសំខាន់ខ្លាំងណាស់សម្រាប់លោកនិងសហរដ្ឋអាមេរិក។ ប៉ុន្តែ​លោក​ក៏​បានលើកឡើងផង​ដែរ​ថា ប្រទេស​ទាំង​ពីរ ​បាន​ឈាន​ដល់​កិច្ច​ព្រមព្រៀង​លើ​បញ្ហា​ផ្សេង​ទៀត។

ដំណើរទស្សនកិច្ចរបស់លោក Biden ត្រូវបានគេរិះគន់ថា ជាការទទួលស្គាល់ពេញសិទ្ធិចំពោះរដ្ឋាភិបាលអារ៉ាប៊ីសាអូឌីត បន្ទាប់ពីឃាតកម្មលើអ្នកកាសែតប្រឆាំងអារ៉ាប៊ីសាអូឌីតលោក Khashoggi កាលពីខែតុលា ឆ្នាំ ២០១៨ នៅស្ថានកុងស៊ុលអារ៉ាប៊ីសាអូឌីត ប្រចាំទីក្រុងអ៊ីស្តង់ប៊ុល នៃប្រទេសតួកគី។

ព្រះអង្គម្ចាស់ Mohammed bin Salman ត្រូវ​បាន​ទីភ្នាក់ងារ​ស៊ើបការណ៍​សម្ងាត់​អាមេរិក​ ចោទប្រកាន់​ថា​ បើកផ្លូវឲ្យធ្វើឃាត។

ទោះបីជាយ៉ាងណាក៏ដោយ ព្រះអង្គម្ចាស់តែងតែបដិសេធការចោទប្រកាន់ ហើយព្រះរាជអាជ្ញាអារ៉ាប៊ីសាអូឌីត បានស្តីបន្ទោសទៅទីភ្នាក់ងារអារ៉ាប៊ីសាអូឌីតទុច្ចរិត៕

ប្រែសម្រួល៖ Vann Vann

ប្រភព៖ BBC

ចុចអាន៖ លោក Joe Biden ត្រៀមជួបស្តេច អារ៉ាប៊ីសាអូឌីត ទោះមានការរិះគន់