មីយ៉ាន់ម៉ាគ្រោងនាំចូលប្រេងឥន្ទនៈពីរុស្ស៊ី ខណៈតម្លៃប្រេងកំពុងកើនឡើងខ្ពស់

អ្នកនាំពាក្យរបបយោធាបាននិយាយថា មីយ៉ាន់ម៉ាគ្រោងនឹងនាំចូលប្រេងឥន្ទនៈពីប្រទេសរុស្ស៊ី ដើម្បីកាត់បន្ថយកង្វល់ជុំវិញការផ្គត់ផ្គង់ និងតម្លៃប្រេងកើនឡើងខ្ពស់។

ប្រទេសមីយ៉ាន់ម៉ានៅបានរក្សាទំនាក់ទំនងមិត្តភាពជាមួយរុស្ស៊ី បើទោះបីភាគីទាំងពីរត្រូវរងទណ្ឌកម្មពីបណ្តាប្រទេសលោកខាងលិចក៏ដោយ។ ដោយមីយ៉ាន់ម៉ាកើតចេញពីរដ្ឋប្រហារយោធាកាលពីឆ្នាំមុន ខណៈដែលរុស្ស៊ីបាននិងកំពុងឈ្លានពានអ៊ុយក្រែន ដែលរុស្ស៊ីនិយាយថា គឺជាប្រតិបត្តិការយោធាពិសេស។

ប្រទេសរុស្ស៊ីកំពុងស្វែងរកអតិថិជនថ្មីសម្រាប់ថាមពលរបស់ខ្លួននៅក្នុងតំបន់ ខណៈដែលអឺរ៉ុបដែលជាគោលដៅនាំចេញដ៏ធំបំផុតរបស់ខ្លួន នឹងផ្អាកការនាំចូលប្រេងពីប្រទេសរុស្ស៊ីនៅចុងឆ្នាំនេះ។

អ្នកនាំពាក្យរបបយោធា លោក Zaw Min Tun បាននិយាយថា៖ “យើងបានអនុញ្ញាតឱ្យនាំចូលប្រេងពីប្រទេសរុស្ស៊ី ដោយថា ប្រេងរបស់រុស្ស៊ីមានគុណភាពខ្ពស់ ហើយមានតម្លៃទាប”។

លោក Zaw Min Tun បានគួសបញ្ជាក់ថា ការនាំចូលប្រេងឥន្ធនៈពីរុស្ស៊ីនេះ ធ្វើឡើងក្នុងអំឡុងពេលដែលលោក មីន អ៊ុងឡាំង ធ្វើដំណើរទស្សនកិច្ចទៅកាន់ប្រទេសរុស្ស៊ីកាលពីខែមុន។ ហើយបច្ចុប្បន្ននេះ មីយ៉ាន់ម៉ានាំចូលប្រេងឥន្ធនៈតាមរយៈប្រទេសសិង្ហបុរី ហើយទន្ទឹមគ្នានេះ មីយ៉ាន់ម៉ាក៏កំពុងពិចារណាលើការរុករកប្រេងនៅមីយ៉ាន់ម៉ា រួមគ្នាជាមួយរុស្ស៊ី និងចិនផងដែរ។

ប្រព័ន្ធផ្សព្វផ្សាយមីយ៉ាន់ម៉ាបានរាយការណ៍ថា ការនាំចូលប្រេងឥន្ធនៈពីរុស្ស៊ីនេះនឹងចាប់ផ្តើមនៅខែកញ្ញាខាងមុខ៕

ប្រែសម្រួល៖ គង់ សំអាន

ប្រភព៖ Mgronline

ចុចអាន៖ បេសកជន UN ឲ្យ មីយ៉ាន់ម៉ា បញ្ឈប់ការប្រហារជីវិត និងអំពើហិង្សាគ្រប់​ទម្រង់ទាំងអស់