អាហារជំនួយខួរក្បាល សម្រាប់សិស្សានុសិស្សទទួលទាន មុន និងអំឡុងពេលប្រឡង

ខួរក្បាលតែមួយប្រើប្រាស់ថាមពលសរុបនៅក្នុងរាងកាយអស់ ២០ភាគរយបាត់ទៅហើយ ដូច្នេះសិស្សានុសិស្សគួរបរិភោគអាហារណាដែលផ្ដល់ថាមពលច្រើនដល់រាងកាយ ប៉ុន្តែល្អសម្រាប់សុខភាពក្នុងពេលតែមួយផងដែរ។ ខាងក្រោមនេះ គឺជាប្រភេទអាហារដែលអ្នកគួរបរិភោគ ដើម្បីជំនួយខួរក្បាលពេលប្រឡង៖

១. ប្រូតេអ៉ីន

ប្រូតេអ៉ីនអាចជួយបង្កើន ការសម្រេចចិត្តច្បាស់លាស់ និងការផ្តោតអារម្មណ៍។ អាហារប្រូតេអ៉ីនរួមមានគ្រាប់ធញ្ញជាតិ ស៊ុត និងទឹកដោះគោមានជាតិខ្លាញ់ទាបជាដើម។

២. កាបូអ៉ីដ្រាត

ខួរក្បាលត្រូវការកាបូអ៉ីដ្រាតដើម្បីដំណើរការ។ អាហារទាំងនេះរួមមានបបរស្រូវសាឡី នំបុ័ង គ្រាប់ធញ្ញជាតិនិងសណ្តែក។

៣. ត្រី 

អាស៊ីតខ្លាញ់អូមេហ្គាបីក្នុងសាច់ត្រី ជាប្រូតេអ៉ីនដ៏សំខាន់សម្រាប់គុណភាពខួរក្បាល។

៤. បន្លែ

បន្លែមានផ្ទុកជាតិកាកសរសៃនិងជាតិដែកជួយកាត់បន្ថយភាពនឿយហត់ ជាពិសេសពង្រឹងការផ្ដោតអារម្មណ៍ពេលទន្ទេញមេរៀន។

៥. ផ្លែឈើ

ផ្លែឈើក្រៀម និងផ្លែបឺរី ដូចជាផ្លែប៊្លូបឺរី និងផ្លែបឺរីខ្មៅ គឺជាផ្លែឈើដែលមានប្រយោជន៍ជាពិសេសសម្រាប់ទទួលទានក្នុងរដូវប្រឡង វាមានផ្ទុកនូវវីតាមីន C ធ្វើអោយប្រសើរឡើងនូវភាពស្វាហាប់របស់សិស្ស។

៦. វីតាមីនចម្រុះ

ការទទួលទានតាមតម្រូវការរាងកាយគ្រប់មុខវាពិបាកនឹងទៅរួច ប៉ុន្តែសម័យទំនើបសិស្សានុសិស្សអាចរកវីតាមីនជំនួយបានយ៉ាងងាយស្រួលពីអាហារបំប៉នក្នុងទម្រង់ជាចាហ៊ួយ ឬថ្នាំគ្រាប់។

លើសពីនេះអាហារបន្ទាប់បន្សំល្អៗ សម្រាប់មុនពេលប្រឡងក៏មានច្រើនដែរដូចជា គ្រាប់ល្ពៅ ផ្លែប៉ោម សណ្ដែកដី ប្រុកខូលី អាល់មុន ស្រូវសាឡី និងផ្លែប័រជាដើម។ ជាមួយគ្នានេះដែរ អាហារគួរជៀសវាងមុនប្រឡងនិងអំឡុងពេលប្រឡងមាន សូកូឡា ភេសជ្ជៈប៉ូវកម្លាំង ឬ ភេសជ្ជៈផ្ទុកជាតិកាហ្វេអ៊ីន ព្រោះវាធ្វើឲ្យការចងចាំធ្លាក់ចុះ និងមានជាតិស្ករខ្ពស់ក្នុងឈាម៕

ប្រែសម្រួលដោយ៖ វារី

ចុចអាន៖អាហារ ៥ មុខ ជនជាតិជប៉ុនជឿថា ធ្វើឲ្យការចងចាំកាន់តែប្រសើរឡើង

ចុចអាន៖អត្ថប្រយោជន៍ ១០ យ៉ាងពីផ្លែល្ពៅ ជួយសម្រកទម្ងន់ និងមហារីក