Neymar ខឹងសម្បារនឹងមិត្តរួមក្រុម ដែលសាក់រូបលោកអាក្រក់មើលពេក

កីឡាករ Neymar ផ្ទុះកំហឹងយ៉ាងខ្លាំងទៅលើមិត្តរួមក្រុមរបស់ខ្លួន ដែលបានសាក់រូបលោកនៅកណ្ដាលខ្នង រហូតធ្វើឱ្យតារាបាល់ទាត់ប្រេស៊ីលរូបនេះសុខចិត្តចំណាយលុយផ្ទាល់ខ្លួនជាង ៣ម៉ឺនដុល្លារដើម្បីឱ្យលុបស្នាមសាក់នោះចោល។

កីឡាករ Richarlison ថ្មីៗនេះបានបង្កឱ្យមានការខឹងសម្បារពីខ្សែប្រយុទ្ធ Neymar ដោយសារកីឡាករវ័យ ២៥ឆ្នាំរូបនេះបានសាក់រូបខ្លួនឯង កំពូលកីឡាករ ​Ronaldo កីឡាករ Neymar និងក្មេងប្រុសម្នាក់កាន់បាល់ សំឡឹងមើលតំបន់អនាធិបតេយ្យ ដែលវាធ្វើឱ្យម្ចាស់រូបមិនពេញចិត្ត និងស្នើឱ្យលុបចោលភ្លាមៗ។

គេមិនដឹងថា Richarlison ចង់បង្កប់ ឬបង្ហាញពីអត្ថន័យអ្វីនោះទេ ប៉ុន្តែបើយោងតាមកាសែត Globo Sport ក្រោយពេល Neymar ឃើញស្នាមសាក់មុខរបស់ខ្លួននៅលើខ្នងរបស់សិស្សប្អូនក្នុងក្រុមជាមួយគ្នា តារាឆ្នើមរបស់ក្លឹប PSG បែរជាមានការខឹងសម្បារ និងបានសុំឱ្យលុបស្នាមសាក់នោះ។

ប្រភពដដែលបន្តថា ខ្សែប្រយុទ្ធវ័យ ៣០ឆ្នាំរូបនេះ បានផ្ញើប្រាក់ឱ្យ Richarlison ចំនួន ៣ម៉ឺនអឺរ៉ូ (ប្រហែល ៣១,០០០ដុល្លារ) និងសុំឱ្យលុបមុខរបស់លោកជាបន្ទាន់ ព្រោះរូបភាពនេះអាក្រក់មើលពេក ហើយសម្រាប់ Neymar លោកពិតជាទទួលយកមិនបាន ស្របពេលដែលហ្វេនជាច្រើននាំគ្នាផ្ទុះសំណើច​ និងនិយាយថា រូបពិត និងរូបសាក់ ខុសគ្នាស្រឡះ។

យ៉ាងណាមិញ មតិអ្នកគាំទ្រមួយចំនួនបានលើកឡើងថា ប្រហែលមកពីខ្សែប្រយុទ្ធ Richarlison មានការគោរព និកោតសរសើរដល់ Neymar ទើបហ៊ានចំណាយប្រាក់ និងទ្រាំជាមួយការឈឺសាច់ ដើម្បីសាក់រូប Idol របស់ខ្លួន។ ពេលនេះនៅមិនទាន់មានការឆ្លើយតបពី Richarlison នៅឡើយថា តើសម្រេចលុបស្នាមសាក់ ឬរក្សាទុកវានោះទេ៕

ប្រែសម្រួល៖ សន្យា

ចុចអាន៖ Kylian Mbappe ពីក្មេងក្រីក្រនៅសំណង់អនាធិបតេយ្យ ក្លាយជាកំពូលកីឡាករបាល់ទាត់ពិភពលោក