១០ គន្លឹះ សម្រកទម្ងន់មានសុវត្ថិភាព សម្រាប់ស្ត្រីកូនខ្ចី

តាមធម្មតា ស្ត្រីដែលមានសុខភាពល្អពរពោះកូននឹងឡើងទម្ងន់ពី ១១,៥ ទៅ ១៦គីឡូក្រាម ។ ទន្ទឹមនឹងការឡើងគីឡូ ការសម្រកគីឡូបន្ទាប់ពីសម្រាលក៏ជាឧបសគ្គមួយដែរ ហើយគន្លឹះទាំង ១០ នេះនឹងជួយមិត្តនារីយើងឲ្យស្រកទម្ងន់បន្ទាប់ពីសម្រាលយ៉ាងមានសុវត្ថិភាព ៖

១. កំណត់គោលដៅសមរម្យ

ក្នុងរយៈពេល ១ឆ្នាំ ទៅ ២ឆ្នាំ ស្ត្រីទើបសម្រាលរួចអាចសម្រកទម្ងន់បានប្រហែល ៥គីឡូ ដោយមិនប៉ះពាល់ជាមួយវិធីសាស្ត្រគ្រប់គ្រងអាហារ និងផែនការហាត់ប្រាណ ។ 

២. កុំសម្រុកបង្អត់អាហារ

ការតមគឺជាវិធីសាស្ត្រសម្រក ប៉ុន្តែការតមហួសហេតុបណ្ដាលឲ្យប៉ះពាល់ដល់ទឹកដោះ និងសុខភាពម្ដាយ ។ បន្ទាប់ពីសម្រាល ម៉ាក់ៗចាំបាច់ទទួលទានអាហារគ្រប់គ្រាន់ដើម្បីសុខភាពខ្លួនឯង និងផលិតទឹកដោះសម្រាប់ទារក ដូចនេះអ្នកអាចបន្ថយអាហារត្រឹម ៥០០កាឡូរីក្នុងមួយថ្ងៃដោយគ្មានក្ដីបារម្ភ ។

៣. ព្យាយាមបំបៅដោះកូន

៦ខែដំបូងពិតជាសំខាន់ណាស់សម្រាប់ម្ដាយ និងទារក ។ អត្ថប្រយោជន៍នៃការបំបៅដោះម្ដាយមានដូចជា ផ្ដល់សារធាតុចិញ្ចឹមដល់ទារក ពង្រឹងប្រព័ន្ធភាពស៉ាំទារក កាត់បន្ថយហានិភ័យជំងឺទាំងម្ដាយនិងកូន ជាពិសេសជួយសម្រកទម្ងន់ម្ដាយបែបសុវត្ថិភាពទៀតផង ។

៤. ទទួលទានជាតិកាកសរសៃ

ការបន្ទោរបង់ដែលប្រព្រឹត្តទៅដោយរលូនអាចជួយសម្រកខ្លាញ់អាក្រក់ កាកសំណល់ និងជាតិពុល ការពារមិនឲ្យដុះក្បាលពោះទេ ។ ជាតិកាកសរសៃមាននៅក្នុងបន្លែ ផ្លែឈើជាច្រើន ជៀសវាងប្រើប្រាស់ជាតិកាកសរសៃកែច្នៃ ។

៥. ចៀសវាងជាតិស្ករច្រើន

បច្ចុប្បន្នអាហារដែលមានជាតិស្ករខ្ពស់មិនសូវមានសារធាតុចិញ្ចឹមទេរួមមាន ភេសជ្ជៈប៉ូវកម្លាំង ទឹកផ្លែឈើកែច្នៃ ម្សៅនំ នំខេក នំប្រៃ និងអាហារផ្អែមផ្សេងទៀត ។

៦. ចៀសវាងអាហារកែច្នៃ

អាហារកែច្នៃសម្បូរទៅដោយជាតិស្ករ ខ្លាញ់អាក្រក់ អំបិល និងកាឡូរីខ្ពស់ដែលពិបាកចំពោះការសម្រកទម្ងន់ ។ ម៉ាក់ៗគួរកុំញ៉ាំអាហារកញ្ចប់ ស្ករគ្រាប់ អាហារស្រាប់ៗ ឈីសកែច្នៃ និងអាហារកំប៉ុងទេ ។

៧. មិនសេពគ្រឿងស្រវឹង

ការស្រាវជ្រាវរកឃើញថាជាតិអាល់កុលតិចតួចអាចផ្ដល់អត្ថប្រយោជន៍ពិតមែន ប៉ុន្តែក្នុងករណីសម្រកទម្ងន់វាមានតែថែមកាឡូរីដោយគ្មានសារធាតុចិញ្ចឹមមកជាមួយឡើយ ។

៨. ផឹកទឹកឲ្យគ្រប់គ្រាន់

ជាតិទឹកជួយក្នុងការរំលាយខ្លាញ់ បញ្ចេញកាកសំណល់ និងជាតិពុល ចំណែកឯស្ត្រីបំបៅដោះកូនវិញត្រូវការវាជាចាំបាច់សម្រាប់ផលិតទឹកដោះដូចគ្នា ។

៩. គេងគ្រប់គ្រាន់

ចំណុចនេះរៀងពិបាកបន្តិចហើយសម្រាប់អ្នកមានកូនតូចព្រោះពេលយប់អូនតូចធ្វើទុក្ខខ្លាំងណាស់ ម៉ាក់ប៉ាភ្នែកខ្មៅអស់ហើយ ។ យ៉ាងណាក្ដីត្រូវរកវិធីណាដើម្បីគេងឲ្យបានស្កប់ស្កល់ និងគ្រប់គ្រាន់ ឬអាចសុំជំនួយពីសមាជិកគ្រួសារក៏បាន ។

១០. ហាត់ប្រាណ

ការមើលថែទាំកូន និងការងារផ្ទះមិនអាចចាត់ទុកជាការហាត់ប្រាណទេ ។ ស្រីៗគ្នាយើងគប្បីធ្វើលំហាត់ប្រាណដែលមានការណែនាំពីគ្រូបង្វឹក ឬអាចមើលតាមអនឡាញពីតិចនិកខ្លះៗ ទើបទទួលផលយ៉ាងមានប្រសិទ្ធិភាព ៕

ប្រែសម្រួលដោយ ៖ វារី

ចុចអាន ៖ ចង់ស្រកគីឡូ ដាច់ខាតត្រូវ ដឹងរបៀបញ៉ាំទាំងនេះសិន

ចុចអាន ៖ អាហារ ៥ មុខនេះ តារាកូរ៉េពេញនិយមខ្លាំង យកមកសម្រកទម្ងន់