ក្រុង​ហាណូយ​ គ្រោងដាំដើមឈើដល់ ២៥ ម៉ឺនដើមនៅឆ្នាំក្រោយ

ទីក្រុងហាណូយគ្រោងនឹងដាំដើមឈើចន្លោះពី ២០០,០០០ ទៅ ២៥០,០០០ ដើមក្នុងឆ្នាំ ២០២៤​ ដោយកំណត់គោលដៅបង្កើនទំហំទីក្រុងបៃតងកើន ៥ ដងពោលពី ៨ ទៅ ១០ ម៉ែត្រការ៉េក្នុងមនុស្សម្នាក់នៅឆ្នាំ ២០២៥ ។

ផែនការនេះត្រូវបានលើកឡើងនៅក្នុងគ្រោងការណ៍សេដ្ឋកិច្ចសង្គមឆ្នាំ ២០២៤ ដែលទើបចេញថ្មីៗនេះពីគណៈកម្មាធិការប្រជាជនទីក្រុងហាណូយ ។ ដើមឈើចន្លោះពី ១០០,០០០ ទៅ ១២០,០០០ ដើម ក៏នឹងត្រូវដាំនៅខែកុម្ភៈ ឆ្នាំ ២០២៤ ខណៈចំនួនដែលនៅសល់ត្រូវដាំឲ្យអស់មុនខែតុលា ។

ដើមឈើទាំងនោះ នឹងត្រូវដាំនៅទីតាំងប្រវត្តិសាស្ត្រ និងវប្បធម៌ តំបន់ទីក្រុងថ្មី និងអគារសាធារណៈ ក៏ដូចជានៅតាមបណ្តោយផ្លូវដឹកជញ្ជូនផងដែរ។

បើតាមស្ថិតិរបស់ទីក្រុងហាណូយបានបង្ហាញថា ទីក្រុងបានដាំដើមឈើជាង ៧៨៣,០០០ ដើម ចាប់តាំងពីឆ្នាំ ២០២១ ដើម្បីឆ្លើយតបទៅនឹងកម្មវិធីដាំដើមឈើចំនួន ១ ពាន់លានដើមនៅទូទាំងប្រទេសក្នុងរយៈពេលចន្លោះឆ្នាំ ២០២១ ដល់ ២០២៥។

គម្រោងនេះ បានធ្វើឲ្យដើមឈើសរុបនៅទីក្រុងហាណូយ ឈានដល់ចំនួន ១.៨ លានដើម ហើយផ្ទៃដីព្រៃឈើសរុបរបស់ទីក្រុងឈានដល់ជិត ១៨,៦០០ ហិកតា ជាមួយនឹងអត្រាគ្របដណ្តប់ព្រៃឈើជិត ៦ ភាគរយ ។ ទោះជាយ៉ាងណាក៏ដោយ សមាមាត្រទំហំទីក្រុងបៃតងក្នុងហាណូយបច្ចុប្បន្នមានប្រហែល ២ ម៉ែត្រការ៉េប៉ុណ្ណោះក្នុងមនុស្សម្នាក់ ខណៈដែលស្តង់ដារសម្រាប់ការក្លាយជាទីក្រុងពិសេស គឺយ៉ាងហោចណាស់ ៦ ទៅ ៧ ម៉ែត្រការ៉េក្នុងមនុស្សម្នាក់៕

ប្រែសម្រួល៖ នាង រតនៈ

ប្រភព៖​ VN Express