អ្នកនាំពាក្យ៖ យន្តហោះដែលហោះទៅមកៗលើខេត្តកែប គឺជួបបញ្ហាបច្ចេកទេសត្រង់ស្លាប

លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានអះអាងប្រាប់«កម្ពុជាថ្មី»ថា យន្តហោះ Airbus 330-202 ដែលហោះទៅមកៗប្រមាណជា៣ម៉ោងលើខេត្តកែបរបស់កម្ពុជា គឺដោយសារមានបញ្ហាបច្ចេក​ទេសនៅត្រង់ស្លាបយន្តហោះ។ ដូច្នេះហើយ តាមក្បួនបច្ចេកទេស គឺយន្តហោះនេះ ត្រូវហោះទៅមកៗ ដើម្បីសល់ប្រេងសាំងតិច ទើបអាចចុះចតបានដោយសុវត្តិភាពឡើងវិញ។

បើតាមអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល គឺនៅម៉ោង៣៖៣៥នាទីរសៀល ថ្ងៃទី០៣ ខែមករា យន្តហោះ Airbus 330-202 នេះ បានជួបឧបទ្ទវហេតុ ពោល គឺមានបញ្ហាបច្ចេកទេសនៅត្រង់ស្លាបយន្តហោះ ដោយតម្រូវឱ្យយន្តហោះត្រូវហោះទៅចតនៅព្រលាន PHU QUOC ឡើងវិញ។ តាមលក្ខណៈបច្ចេកទេស ក្រោយជួបបញ្ហាបែបនេះ យន្តហោះត្រូវហោះចុះឡើងៗជាង៣ម៉ោងនៅលើអាកាស ដើម្បីឱ្យសល់ប្រេងសាំងតិច ទើបអាចចុះចតបានដោយគ្មានបញ្ហាអ្វីធ្ងន់ធ្ងរ។

សូមបញ្ជាក់ថា យន្តហោះ Airbus 330-202 គឺជាប្រភេទយន្តហោះដឹកអ្នកដំណើរចេញពីអាកាសយានដ្ឋានPHU QUOC ទៅកាន់ប្រទេសម៉ុងហ្គោលី។ ប៉ុន្តែ ដោយសារមានបញ្ហាបច្ចេកទេស តម្រូវឱ្យយន្តហោះនេះ ត្រូវចុះចតនៅកន្លែងដើមឡើងវិញ។ បើតាម Flightradar24 មុននឹងចុះចតឡើងវិញ យន្តហោះ Airbus 330-202 បានហោះទៅមកៗប្រមាណជា៤០ជុំនៅលើដែនអាកាសកម្ពុជា ត្រង់ចំណុចពីលើខេត្តកែប។ ក៏ប៉ុន្តែ លោក លោក ស៊ីន ចាន់សិរីវុត្ថា បាន​គូសបញ្ជាក់ឱ្យដឹងថា យន្តហោះ Airbus 330-202 នេះ មិនបានហោះចូលក្នុងដែនអាកាសកម្ពុជានោះឡើយ។

ទោះបីជាយ៉ាងណាក៏ដោយ Flightradar24 បានរាយការណ៍ឱ្យដឹងថា នៅម៉ោង៧៖១០នាទី នាថ្ងៃដដែលនេះ យន្តហោះ Airbus 330-202 បានចុះចតនៅព្រលានយន្តហោះPHU QUOC ដោយសុវត្ថិភាពវិញហើយ៕

ដោយ៖ង៉ិល ណារ៉ាត់