សង្គ្រាមលោកលើកទី៣នឹងផ្ទុះ បើណាតូ បញ្ជូនទ័ពទៅអ៊ុយក្រែន 

តាមការចុះផ្សាយរបស់ Reuters នៅថ្ងៃអាទិត្យទី១៧ខែមីនា រដ្ឋមន្ត្រីការបរទេសអ៊ីតាលី លោក Antonio Tajani និយាយថា ការដាក់ពង្រាយកងទ័ពណាតូ ដឹកនាំដោយសហរដ្ឋអាមេរិក ទៅសមរភូមិក្នុងប្រទេសអ៊ុយក្រែន អាចបណ្តាលឲ្យមានជម្លោះទ្រង់ទ្រាយធំជាសកល រហូតឈានដល់សង្គ្រាមលោកលើកទី៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងបទសម្ភាសខាងក្រៅកម្មវិធី LetExpo នៅទីក្រុង Verona លោក Tajani បានបញ្ជាក់ច្បាស់ៗ ប្រឆាំងនឹងគំនិតដាក់ពង្រាយកងទ័ពណាតូនៅក្នុងប្រទេសអ៊ុយក្រែន ដោយនិយាយថា “ខ្ញុំគិតថា ណាតូ មិនគួរចូលអ៊ុយក្រែនទេ វានឹងក្លាយជាកំហុសមួយ។ យើង​ត្រូវ​ជួយ​អ៊ុយក្រែន​ការពារ​ខ្លួន ប៉ុន្តែ​ការ​ចូលទៅទីនោះ​ដើម្បី​ធ្វើ​សង្រ្គាម​ប្រឆាំង​រុស្ស៊ី ​មាន​ន័យ​ថា ​ប្រថុយប្រថានបង្ក​សង្រ្គាម​លោក​លើក​ទី​បី ពេកហើយ”។

ស្របពេលជាមួយគ្នានោះ លោក Tajani ក៏បានច្រានចោលនូវលទ្ធភាពបញ្ជូនកងទ័ពអ៊ីតាលី ទៅអ៊ុយក្រែនដែរ។

ការព្រមានរបស់រដ្ឋមន្ត្រីការបរទេសអ៊ីតាលីរូបនេះ កើតឡើងបន្ទាប់ពីប្រធានាធិបតីបារាំងលោក Emmanuel Macron លើកឡើងជាថ្មីម្តងទៀត នូវប្រធានបទនៃការបញ្ជូនទ័ពលោកខាងលិចទៅអ៊ុយក្រែន ក្នុងបទសម្ភាសថ្មីជាមួយទូរទស្សន៍ TF2 និង France 2។

ពេលនោះ លោក Macron បាន​ហៅរុស្ស៊ីចំៗថា ​ជា “សត្រូវ” របស់​បារាំង ប៉ុន្តែអះអាងថា ទីក្រុង​ប៉ារីស ​មិនធ្វើ​សង្រ្គាមជាមួយទីក្រុងមូស្គូទេ ​គ្រាន់តែគាំទ្រទីក្រុងកៀវ ក្នុង​ជម្លោះ​ប៉ុណ្ណោះ។

ការព្រមានរបស់រដ្ឋមន្ត្រីការបរទេសអ៊ីតាលី ក៏កើតឡើងផងដែរបន្ទាប់ពី​ រដ្ឋមន្ត្រីការបរទេសប៉ូឡូញ និយាយថា ទាហានអង្គការណាតូ ពិតជាមានវត្តមាននៅក្នុងប្រទេសអ៊ុយក្រែនមែន គ្រាន់តែមិនបញ្ជាក់ថាតើនោះជាទ័ពនៃរដ្ឋជាសមាជិកមួយណាប៉ុណ្ណោះ។

លោក Radoslaw Sikorski ថ្លែងក្នុងព្រឹត្តិការណ៍ខួបលើកទី២៥ដែលទីក្រុងវ៉ាសូវី ចូលរួមជាមួ​យអង្គការណាតូថា “ទាហានមកពីបណ្តាប្រទេសណាតូ ពិតជាមានវត្តមាននៅក្នុងប្រទេសអ៊ុយក្រែនមែន។ ខ្ញុំចង់អរគុណអ្នកតំណាងនៃប្រទេសនោះ ដែលហ៊ានប្រថុយនឹងហានិភ័យ”។ លោកមិនសំដៅទៅចំឈ្មោះប្រទេសនោះឡើយ ដោយអះអាងថា “មិនដូចអ្នកនយោបាយអឺរ៉ុបផ្សេងទៀតទេ ខ្ញុំនឹងមិនបង្ហាញរឿងនេះឡើយ”។

យ៉ាងណា សហរដ្ឋអាមេរិក អាល្លឺម៉ង់ អង់គ្លេស ប៉ូឡូញ សាធារណរដ្ឋឆែក និងបណ្តាប្រទេសអឺរ៉ុបជាច្រើនទៀត បានប្រកាសថា ពួកគេគ្មានគម្រោងបញ្ជូនទ័ពទៅអ៊ុយក្រែនឡើយ ​ព្រោះមិនចង់ឲ្យកងកម្លាំងរបស់ពួកគេ ចូលរួមដោយផ្ទាល់នៅក្នុងសង្រ្គាម ហើយក៏មិនចង់ឲ្យមានការប៉ះទង្គិចដោយផ្ទាល់ជាមួយរុស្ស៊ី ដែលជាប្រទេសមានអាវុធនុយក្លេអ៊ែរដែរ។

វិមានក្រឹមឡាំងក៏ធ្លាប់ព្រមានដែរថា ប្រសិនបើលោកខាងលិច បញ្ជូនទ័ពទៅអ៊ុយក្រែនមែន ពួកគេច្បាស់ជាប្រថុយ បង្កឲ្យមានការប្រឈមមុខដាក់គ្នាដោយផ្ទាល់មិនអាចចៀសបានរវាងណាតូ និងរុស្ស៊ីហើយ៕

អត្ថបទ៖ សុខ សុវណ្ណ

ចុចអាន៖ ប៉ូឡូញ ទទួលស្គាល់ថា ទ័ពណាតូ ពិតជាមាន នៅអ៊ុយក្រែន មែន