ហេតុអ្វីបានជាខេត្តប្រកាសអស់មីនរួចហើយ ប៉ុន្តែនៅមានគ្រាប់មីនផ្ទុះ?

កន្លងទៅថ្មីៗនេះ ពលរដ្ឋមួយចំនួនមានចម្ងល់ទាក់ទងទៅនឹងមូលហេតុដែលខេត្តខ្លះត្រូវបានប្រកាសជាខេត្តអស់មីននៅក្នុងប្រទេសកម្ពុជា ប៉ុន្តែខេត្តដែលប្រកាសថាអស់មីននោះ នៅឃើញមានករណីផ្ទុះគ្រាប់មីន។

ដើម្បីស្រាយចម្ងល់ទាំងនេះ ទេសរដ្ឋមន្រ្តី លោក  លី ធុជ អនុប្រធានអាជ្ញាធរមីន បានឱ្យដឹងថា គិតត្រឹមខែវិច្ឆិកា ឆ្នាំ ២០២៤ ខេត្តចំនួន១៥ ក្នុងចំណោម ២៥​ រាជធានី-ខេត្ត ត្រូវបានប្រកាសជាខេត្តអស់មីន ខណៈប្រតិបត្តិករកំពុងបន្តបោសសម្អាតនៅតាមបណ្តាខេត្តផ្សេងទៀត។ លោកបានពន្យល់ថា ខេត្តដែលត្រូវបានប្រកាសអស់មីន គឺសំដៅទៅលើស្ថាប័នជំនាញដែលបានកំណត់ទីតាំងមីន ហើយត្រូវបានបោសសម្អាតអស់នៅតំបន់នោះ។ ដូច្នេះមីនខ្លះអាចនៅមានកន្លែងផ្សេងទៀតដែលអាជ្ញាធរពុំបានដឹង ទើបពេលខ្លះមានករណីផ្ទុះមីននៅក្នុងខេត្តដែលប្រកាសអស់មីន។

នេះជាការលើករបស់លោក លី ធុជ នៅក្នុងសន្និសីទសារព័ត៌មានស្តីពី ដំណើរឆ្ពោះទៅកិច្ចប្រជុំកំពូលសៀមរាប-អង្គរ
ស្តីពី “ពិភពលោកមួយដែលគ្មានមីន” ថ្ងៃទី ២០ ខែ វិច្ឆិកា ឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថ្លែងថា៖« ពលរដ្ឋខ្លះភ្ញាក់ផ្អើលថា ហេតុអ្វីខេត្តប្រកាសអស់មីនហើយសម្រាប់តែផ្ទុះគ្រាប់ ថ្មីៗនេះនៅខេត្តមណ្ឌលគិរី ប្រកាសអស់មីនហើយ ប៉ុន្តែស្រាប់តែមានផ្ទុះគ្រាប់មីន។ ចង់និយាយថា ខេត្តអស់មីន គឺសំដៅដល់មីនដែលយើងស្គាល់ទីតាំងមីន ហើយយើងបោសសម្អាតអស់ហើយ»។

យោងតាម អនុញ្ញាអូតាវ៉ា បានចែងថា តំបន់ណាដែលត្រូវបានកំណត់ថាជាទីតាំងមីន ហើយប្រតិបត្តិករបានបោសសម្អាតមីនអស់ គឺត្រូវបានរាប់បញ្ចូលជាការជោគជ័យក្នុងការបោសសម្អាតមីន។ អនុសញ្ញាអូតាវ៉ា គឺជាការហាមឃាត់ការប្រើប្រាស់មីនប្រឆាំងមនុស្សលោក ហើយមានគោលដៅបញ្ចប់នូវការឈឺចាប់របស់ប្រជាជននៅលើពិភពលោកដោយសារសំណល់ជាតិផ្ទុះពីសង្គ្រាម។

បើតាមទេសរដ្ឋមន្រ្តី លី ធុជ កម្ពុជាជោគជ័យក្នុងការបោសសម្អាតមីនលើផ្ទៃដីជាង ៣០២៤ គីឡូម៉ែត្រការ៉េ ហើយនៅសល់ជាងពាក់កណ្តាលទៀតដែលកំពុងបន្តការងារបោសសម្អាតគ្រាប់មីន ជាពិសេសតំបន់ខាងលិចមាន ៧ ​ខេត្តជាប់ព្រំប្រទល់ថៃ ជាតំបន់អតីតសមរភូមិក្តៅដែលមានការប្រើប្រាស់មីនច្រើន។ លោកបន្ថែមថា ដោយសារកម្ពុជា មានសង្គ្រាមស៊ីវិលរ៉ាំរ៉ៃ ទើបធ្វើឱ្យគ្រាប់មីននៅរាយប៉ាយ ជាពិសេសគ្រាប់បែកចង្កោម គ្រាប់ទម្លាក់ពីលើអាកាស និងគ្រាប់បេជាដើម បង្កការលំបាកដល់ការកំណត់ទីតាំង។

គួរជម្រាបថា អស់រយៈពេលជាង ៣០ ឆ្នាំ គិតចាប់ពីឆ្នាំ ១៩៩២ មក រាជរដ្ឋាភិបាលកម្ពុជាបានចំណាយថវិកាជាង
១ ពាន់លានដុល្លារ នៅក្នុងប្រតិបត្តិការបោសសម្អាតមីន។ ក្នុងនោះថវិកាដែលទទួលបានពីសហគមន៍ជំនួយ និងបណ្តាប្រទេសជាមិត្តមានប្រមាណ ៦០ភាគរយ ក្រៅពីនោះជាថវិការរបស់រដ្ឋាភិបាលកម្ពុជា និងសប្បុរសជន៕