បេក្ខភាព​១៦រូប​ឈាន​ដល់​វគ្គ​១/៨ផ្តាច់​ព្រ័ត្រ​ក្នុងការ​ប្រកួតបាល់ទាត់​ហ្វ្រេនហ្ស៊ី ហ្វ្រីស្តាយល៍

ការប្រកួត​បាល់ទាត់​កម្មវិធី ហ្វ្រេនហ្ស៊ី​ ហ្វ្រីស្ទាយល៍ (Frenzy Freestyle) បានឈានដល់វគ្គ១៦នាក់ចុងក្រោយ បន្ទាប់ពីបញ្ចាប់ការប្រកួតវគ្គជម្រុះដំបូងកាលពីថ្ងៃអាទិត្យ ទី​១២ ខែ​មករា ឆ្នាំ​២០២៥។

ក្រោយការដាក់ពិន្ទុយ៉ាងសុក្រិតយុត្ដិធម៍ពី​គណៈកម្មការជំនាញ​ទាំង៤រូបរួមមានលោក ឃួន ឡាបូរ៉ាវី, លោក រៀម សុខភិរម្យ, លោក ឡុង គីមហេង និងកញ្ញា សុខ សុខា ក្នុងអំឡុងការប្រកួតវគ្គជម្រុះដំបូង កម្មវិធី ហ្វ្រេនហ្ស៊ី​ ហ្វ្រីស្ទាយល៍ ឥឡូវនេះបានរកឃើញបេក្ខភាពទាំង១៦រូប ត្រៀមបង្ហាញសមត្ថភាពប្រកួតគ្នានៅវគ្គបន្ទាប់។

បេក្ខភាពទាំង១៦រូបរួមមាន៖ បេក្ខនារី ឌី គឹមយាន និង យ៉ែម នារី ព្រម​ទាំង​បេក្ខជន នៅ សុីងជូ, ផ្លម ធិញហួស, លន់ ឆៃយ៉ា, ញ៉ក ភារុន, ណាន ប៊ុននីន, ទ្រី ណាំចែវ, ឯក តុលា, ខុម ពៅ, ចាន់ណាក់ វរៈបុត្រ, ចៀម សីហា, នួន វណ្ណា, ចាន់ សាមីឌី , ស៊ុំ សាន និង ខុន ខេមរៈបុត្ថ។

អ្វី​ដែល​គួរ​ឲ្យ​ចាប់អារម្មណ៍​មួយ​ទៀត​នោះ​គឺ​មាន​បេក្ខនារី​២ ដែល​ត្រូវ​ប្រកួត​ប្រជែង​ជា​មួយ​បេក្ខជន​​១៤​រូប​ផ្សេង​ទៀត។ ការ​ប្រកួត​នេះ​មិន​មែន​ផ្តោត​សំខាន់​លើ​ជំនាញ​​បាល់ទាត់​តែ​ម្យ៉ាង​នោះ​ទេ ប៉ុន្តែ​ក៏​មាន​ទាំង​ក្បាច់​រាំ Breakdance រួម​បញ្ចូល​ផង​ដែរ។

លក្ខន្តិកៈ​ខ្លះ​ៗ​ក្នុងការប្រកួតវគ្គ១៦នាក់ចុងក្រោយ៖

-គូប្រកួតនីមួយៗនឹងត្រូវបានផ្តល់ពេលមិនលើសពី៤នាទីដើម្បីបង្ហាញ ដោយពួកគេត្រូវ ប្តូរ វេនគ្នាបង្ហាញ រាល់ ៣០-៤០វិនាទីម្តង

-បេក្ខជននឹងបង្ហាញពីវិញ្ញាសាក្នុងការប្រកួតរបស់ពួកគេ ដែលពួកគេបានជ្រើសរើសក្នុងវគ្គតម្រង់ទិស

-គណៈកម្មការវាយតម្លៃ នឹងផ្តល់មតិយោបល់ រួមទាំងផ្តល់ពិន្ទុដោយផ្អែកលើជំនាញ

-អ្នកឈ្នះនឹងត្រូវបានប្រកាស ដោយផ្អែកលើលទ្ធផលដែលទទួលបានពីគណៈកម្មការវាយតម្លៃទាំង៤រូប

-ក្នុងករណីគូប្រកួតពិន្ទុស្មើគ្នានឹងត្រូវបានថែមចំនួន ១នាទី ដើម្បីប្រកួតបន្ត

-អ្នកចាញ់ក្នុងជុំនេះនឹងត្រូវជម្រុះចេញពីកម្មវិធី

អត្ថបទ៖ ផា រតនា