រដ្ឋបាលខេត្តរតនគិរី នឹងរៀបចំព្រឹត្តិការណ៍រត់ពាក់កណ្តាលម៉ារ៉ាតុង នៅដើមខែកុម្ភៈ ដើម្បីលើកស្ទួយវិស័យទេសចរណ៍

រដ្ឋបាលខេត្តរតនគិរី​ នឹងរៀបចំព្រឹត្តិការណ៍រត់ពាក់កណ្ដាលម៉ារ៉ាតុង ដើម្បីសុខភាព និងលើកស្ទួយវិស័យទេសចរណ៍ ក្នុងខេត្តរតនគិរី នៅថ្ងៃទី០១ ខែកុម្ភៈ ឆ្នាំ២០២៥ ខាងមុខនេះ។ នេះបើយោងតាមសេចក្តីជូនដំណឹងរបស់រដ្ឋបាលខេត្តចុះថ្ងៃទី២៩ ខែមករា ឆ្នាំ២០២៥។

ការរៀបចំព្រឹត្តិការណ៍នេះឡើង ដោយមានគំនិត្តផ្តួចផ្តើមពីប្រជាពលរដ្ឋ សហការជាមួយរដ្ឋបាលខេត្ត ដើម្បីបង្កើតព្រឹត្តិការណ៍សប្បាយៗ។ បើតាមលិខិត កម្មវិធីរត់ពាក់កណ្ដាលម៉ារ៉ាតុងនេះ ក្នុងគោលបំណងលើកស្ទួយកីឡានាំមកនូវសុខភាព កីឡានាំមកនូវសន្តិភាព និងដើម្បីលើកស្ទួយវិស័យទេសចរណ៍ ក្នុងខេត្តរតនគិរី។

សូមបញ្ជាក់ថា ព្រឹត្តិការណ៍នេះ ប្រព្រឹត្តទៅនាថ្ងៃសៅរ៍ ទី០១ ខែកុម្ភៈ ឆ្នាំ២០២៥ វេលាម៉ោង ៤៖០០នាទីរសៀល នៅទីតាំងវាលថ្មដារអូរជុំ មកដល់បឹងកន្សែងថែម ៤ជុំ ទីផ្តាច់ព្រ័តនៅទីតាំងរូបសំណាកគ្រួសារដំរី ដែលមានចំងាយសរុប ២១គីឡូម៉ែត្រ។ ជាមួយគ្នានេះ រដ្ឋបាលខេត្តក៏បានអំពាវនាវឱ្យប្រជាពលរដ្ឋចូលរួមក្នុងកម្មវិធីនេះឱ្យបានច្រើកុះករផងដែរ៕