ព័ត៌មានអន្ដរជាតិ

ថៃពិភាក្សាជាមួយឥណ្ឌា វៀតណាម ដោះស្រាយការធ្លាក់ចុះតម្លៃអង្ករ

បានផុស

១ year មុន

នៅ

ថ្ងៃសុក្រ ៧ មីនា ២០២៥

ដោយ

រដ្ឋមន្ត្រីក្រសួងពាណិជ្ជកម្ម លោក Pichai Naripthaphan បាននិយាយកាលពីថ្ងៃព្រហស្បតិ៍ថា ថៃកំពុងស្វែងរកកិច្ចសហប្រតិបត្តិការជាមួយប្រទេសឥណ្ឌា និងវៀតណាម ដើម្បីស្វែងរកមធ្យោបាយក្នុងការដោះស្រាយការធ្លាក់ចុះតម្លៃស្រូវអង្ករ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

លោក Pichai បានប្រាប់សភាថា ថៃកំពុងពិភាក្សាជាមួយប្រទេសទាំង ២ ដើម្បីកាត់បន្ថយការប្រកួតប្រជែងដោយសង្ឃឹមថានឹងបង្កើតតុល្យភាពតម្លៃស្រូវអង្ករក្នុងទីផ្សារពិភពលោក និងជួយកសិករឱ្យមានស្ថិរភាពលើប្រាក់ចំណូល។

លោកបានមានប្រសាសន៍អំពីកិច្ចពិភាក្សាទ្វេភាគីនេះថា៖ «យើងបានពិភាក្សាគ្នារួចហើយ ប៉ុន្តែយើងកំពុងរង់ចាំកិច្ចប្រជុំមួយទៀត ដើម្បីមើលថាតើយើងអាចធ្វើបានប៉ុណ្ណាអំពីរឿងនេះ»។

តម្លៃស្រូវជាមធ្យមនៅក្នុងប្រទេសថៃ បានធ្លាក់ចុះ ៣០ ភាគរយ ក្នុងអត្រាប្រចាំឆ្នាំ មកនៅប្រហែល ៨ ៦០០ បាត/តោន កាលពីខែមុន។ នេះបើយោងតាមក្រសួងពាណិជ្ជកម្ម។ បច្ចុប្បន្ន កសិករថៃកំពុងអំពាវនាវឲ្យរដ្ឋាភិបាលជួយលក់ស្រូវឲ្យបានតម្លៃខ្ពស់។

ថៃ ដែលជាប្រទេសនាំចេញអង្ករធំជាងគេទី ២ របស់ពិភពលោក ទំនងជានឹងទទួលរងផលប៉ះពាល់យ៉ាងធ្ងន់ធ្ងរពីការនាំចេញអង្ករជាថ្មីរបស់ឥណ្ឌា ដោយក្រសួងរំពឹងថា ការនាំចេញអង្ករនឹងធ្លាក់ចុះ ២៤ ភាគរយ មកត្រឹម ៧,៥ លានតោននៅឆ្នាំនេះ។

វៀតណាម ដែលជាប្រទេសនាំចេញអង្ករធំជាងគេទី ៣ របស់ពិភពលោកកាលពីឆ្នាំមុន ក៏រំពឹងពីផលប៉ះពាល់នេះដែរ ជុំវិញការធ្លាក់ចុះនៃតម្លៃ ដោយសារតែកំណើនការផ្គត់ផ្គង់។

រដ្ឋាភិបាលវៀតណាមបានប្រាប់ក្រសួងពាណិជ្ជកម្មខ្លួន ឱ្យស្វែងរកការជំរុញការនាំចេញអង្ករទៅកាន់សហរដ្ឋអាមេរិក ចិន សហភាពអឺរ៉ុប និងជប៉ុន ខណៈប្រទេសនេះសម្លឹងមើលការគ្រប់គ្រងការផ្គត់ផ្គង់អង្ករលើសតម្រូវការ៕