ខេម រំលឹកថា លុយត្រឹម ៨ពាន់រៀល អាចកែប្រែជីវិតខ្លួនដល់សព្វថ្ងៃ

តារាចម្រៀងសំឡេងស្អកលោក ខេម បានរំលឹកអតីតកាលរបស់ខ្លួនជាមួយនឹងការនឹករលឹកដល់ក្រុម “Boyband” ដែលធ្លាប់រួមដំណើរជាមួយគ្នានៅក្នុងវិថីសិល្ប: ខណ:លោកអះអាងដែរថា កាលណោះលុយត្រឹម ៨ពាន់រៀល អាចផ្លាស់ប្តូរជីវិតដល់សព្វថ្ងៃ។

ខេម នៅតែនឹកដល់អនុស្សាវរីយ៍ជាមួយក្រុម “Boyband” ខណៈកាលពីអំឡុងឆ្នាំ២០២៣ កន្លងទៅ ម្ចាស់បទ “បេះដូងអើយ” រូបនេះ ធ្លាប់ប្រកូកប្រកាសស្វែងរកសមាជិកក្នុងក្រុម “Boyband” ដើម្បីជួបជុំគ្នាជាថ្មី បន្ទាប់ពីបែកគ្នាប្រមាណជាជាង១០ឆ្នាំ ។

បើរំលឹកដល់ការតស៊ូលោក ខេម បានរៀបរាប់ថា គ្មានភាពជោគជ័យណាកើតឡើងដោយមិនឆ្លងកាត់ការប្រឹងប្រែងនោះទេ។ Boyband CTN 2007 បងប្អូនណាខ្លះ បានទស្សនាកម្មវិធីនោះ? ប្រាក់ ៨០០០រៀល
បានកំដរជីវិតខ្ញុំមានឱកាសដល់សព្វថ្ងៃនេះ អរគុណការគាំទ្រកន្លងមក។

លោក ខេម ត្រូវបានគេចាត់ទុកថា ជាតារាចម្រៀងខ្មែរល្បីឈ្មោះមួយរូប នៅក្នុងវិស័យសិល្ប:ចម្រៀងជាង១០ឆ្នាំមកនេះ ។ ខណៈអាជីពសិល្បៈបច្ចុប្បន្ន កាន់តែមានភាពរីកចម្រើននិងទទួលបានការគាំទ្រអាចរកចំណូលបានកាន់តែខ្ពស់ លោកក៏ទម្លាយអំពីប្រវត្តិអតីតកាលរបស់ខ្លួនដែលធ្លាប់ឆ្លងកាត់ការលំបាកជាច្រើនទម្រាំបានល្បីឈ្មោះដូចសព្វថ្ងៃ។

តួយ៉ាង មុនពេលល្បីឈ្មោះបោះសំឡេង លោកធ្លាប់ឆ្លងកាត់ជីវិតតស៊ូលំបាកច្រើន ដើម្បីរកលុយចិញ្ចឹមម្ដាយជាស្ត្រីមេម៉ាយយ៉ាងកម្សត់ទៀតផង។ ទោះបីយ៉ាងណាមកដល់ពេលនេះ តារាចម្រៀង ខេម នៅតែមិនភ្លេចនិងរម្លឹកពីអតីតកាលរបស់ខ្លួនធ្លាប់ជាអ្នករត់ម៉ូតូឌុបផងដែរ៕ អត្ថបទ៖ ចាន់រ៉ា