តម្លៃមាសអន្តរជាតិកើនជាង ១៣០ ដុល្លារ ជុំវិញភាពមិនប្រាកដប្រជា

តម្លៃមាសសម្រាប់ការជួញដូរនៅថ្ងៃចន្ទ បាន​ហក់ឡើងជាង ១៣០ ដុល្លារ ដោយសារតែភាពមិនប្រាកដប្រជាជុំវិញការសម្រេចចិត្តរបស់ធនាគារកណ្ដាលសហព័ន្ធអាមេរិកពាក់ព័ន្ធនឹងអត្រាការប្រាក់ និង​សញ្ញានៃភាពតានតឹងជាថ្មីនៃសង្រ្គាមពាណិជ្ជកម្ម។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមម៉ោង ៩: ៥៥ នាទី យប់ ថ្ងៃចន្ទ នាទីក្រុងញូវយ៉ក (ម៉ោង ៩:៥៥ នាទី ព្រឹកនៅក្រុងហុងកុង) តម្លៃមាសជួញដូរដោយផ្ទាល់ បាន​កើនឡើងប្រមាណ ៤,១៧ ភាគរយ ឬ ១៣៥ ដុល្លារ ដោយជួញដូរនៅតម្លៃ ៣ ៣៧៧ ដុល្លារ/អោន។ តម្លៃមាសនាពេលអនាគតរបស់អាមេរិកវិញ បាន​បញ្ចប់ការជួញដូរនៅតម្លៃ ៣ ៣២២,៣ ដុល្លារ/អោន កើនឡើង ២,៤ ភាគរយ។ ​

ការធ្លាក់ចុះនៃ​ប្រាក់ដុល្លារ ០,១ ភាគរយ ធៀប​នឹងរូបិយប័ណ្ណដទៃ ក៏ជួញជំរុញតម្លៃមាសផងដែរ។

​ក្រោមភាពតានតឹងចុងក្រោយ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃអាទិត្យ បានប្រកាស​ដាក់ពន្ធ ១០០ ភាគរយ លើភាពយន្តដែលផលិតនៅក្រៅប្រទេស ដោយ​បង្កក្ដីបារម្ភជាថ្មីលើភាពតានតឹង​នៃសង្រ្គាមពាណិជ្ជកម្មពិភពលោក ដែលហាក់បាន​ស្រាកស្រាន្តក្នុងរយៈពេលជាងពេលប៉ុន្មានថ្ងៃចុងក្រោយ​នេះ​។

តម្លៃមាសក៏ជួញជំរុញដោយភាពស្រពិចស្រពិលលើការសម្រេចចិត្តរបស់ធនាគារកណ្ដាលអាមេរិក ពាក់ព័ន្ធនឹង​អត្រាការប្រាក់ផងដែរ ​ដោយ​​វិនិយោគិនក៏កំពុងរងចាំមើលការ​ប្រកាសយ៉ាងណារបស់ប្រធានធនាគារ លោក Jerome Powell ​នៅថ្ងៃពុធ ស្អែកនេះ។

ធនាគារកណ្តាល បានរក្សាអត្រាការប្រាក់ចន្លោះពី ៤,២៥-៤,៥០ ភាគរយ ​ចាប់តាំងពីខែធ្នូ ហើយត្រូវបានគេរំពឹងថានឹងរក្សា​អត្រាដដែលក្រោយកិច្ចប្រជុំនៅសប្ដាហ៍នេះ។ ​យ៉ាងណាមិញ វាអាចនឹងមានការប្រែប្រួល ដោយហេតុថា ​ពន្ធគយរបស់លោក ​ត្រាំ កំពុងបង្កើតភាពមិនច្បាស់លាស់អំពីសេដ្ឋកិច្ច។ ការកាត់អត្រាការប្រាក់ ជាធម្មតាធ្វើឱ្យតម្លៃមាសកើនឡើង។

គួរបញ្ជាក់ថា តម្លៃមាស ដែលគេចាត់ទុកថាជា​ទ្រព្យសម្បត្តិសុវត្ថិភាព​ប្រឆាំងនឹងភាពមិនប្រាកដប្រជា​ បាន​កើនដល់កម្រិតខ្ពស់បំផុតជាបន្តបន្ទាប់រហូតដល់ ៣ ៥០០ ដុល្លារ/អោន នៅថ្ងៃទី ២២ មេសា។ គិតតាំងពីដើមឆ្នាំមក តម្លៃមាសបាន​កើនឡើងជាង ២៦ ភាគរយ រួច​មកហើយ ដែលជំរុញដោយសង្រ្គាមពាណិជ្ជកម្មពន្ធគយរបស់ ត្រាំ៕​