ការ​លើក​ឡើង​របស់បវរ​កញ្ញា Thuy Tien ៣​ឆ្នាំ​មុន ដូចទស្សន៍ទាយអនាគតខ្លួនឯងយ៉ាងច្បាស់

នាប៉ុន្មាន​ថ្ងៃ​ចុងក្រោយ​នេះ ការ​ចាប់​ខ្លួន​បវរកញ្ញាវៀតណាមនាង Nguyen Thuc Thuy Tien បាន​ធ្វើ​ឲ្យ​មហាជន​ភ្ញាក់ផ្អើល មិនថាក្នុងឬក្រៅប្រទេសនោះទេ។ នាងធ្លាប់ជាតារាម៉ូដែលដែលយុវវ័យស្រលាញ់ និងកោតសរសើរពីសម្រស់ ប៉ុន្តែបែរជាធ្វើឲ្យមហាជនខកចិត្តចំពោះទង្វើរបស់នាងទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណា មុន​នឹង​មាន​បញ្ហា​ចំពោះ​មុខ​ច្បាប់តារាស្រីវ័យវ័យ២៦ឆ្នាំ ធ្លាប់ទទួលបានកត្តិនាមល្បីល្បាញ​ថា​ ជា​ស្រី​ស្អាត​ម្នាក់​ដែល​មាន​សម្ដី​ស៊ី​ជម្រៅ និងតែងដាក់គោលដៅនាថ្ងៃអនាគតជានិច្ច។ គួរកត់សម្គាល់ដែរថា កាលណោះ Thuy Tien បានចែករំលែកការទស្សន៍ទាយអនាគតរបស់នាង ជាមួយអ្នកគាំទ្រកាលពីឆ្នាំ ២០២២ យ៉ាងក្បោះក្បាយបំផុត។

ជាក់ស្តែងនៅពេលនោះមានគេសួរនាងថា តើអ្នកនឹងក្លាយជាអ្នកណាក្នុងរយៈពេល ៥ ឆ្នាំខាងមុខ? បវរកញ្ញារូបនេះបាន បញ្ជាក់ថា នាងនឹងធ្វើជាគំរូដល់យុវជនធ្វើតាម ហើយទន្ទឹមនឹងនោះក៏ជាពាណិជ្ជករដែលជាម្ចាស់ក្រុមហ៊ុនធំ និងមានអំណាចមួយរូបផងដែរ។

រាជនិនីសម្រស់របស់ប្រទេសវៀតណាមបាននិយាយថា «៥ឆ្នាំខាងមុខ ខ្ញុំនៅតែជាខ្ញុំ នៅតែជាកម្លាំងចិត្តសម្រាប់យុវជន ដូចអ្វីដែលខ្ញុំកំពុងធ្វើ។ ខ្ញុំនឹងក្លាយជាអ្នកជំនួញម្នាក់ដែលជាម្ចាស់ក្រុមហ៊ុន។ ក្រុមហ៊ុន​របស់​ខ្ញុំ​នឹង​រីក​ចម្រើន ហើយ​មាន​ចំណុច​លក់​ជាង១ពាន់កន្លែង​ទូទាំង​ប្រទេស។ ខ្ញុំនឹងមានមូលនិធិសប្បុរសធម៌ពីប្រាក់ចំណេញពីការលក់។ ក្នុងរយៈពេល ៥ ឆ្នាំ មូលនិធិសប្បុរសធម៌នោះនឹងកាន់តែធំឡើង និងជួយមនុស្សកាន់តែច្រើន»។

ក្នុង​កិច្ច​សម្ភាសន៍​មួយ​ទៀត ម្ចាសជ័យលាភីឯកក្នុងកម្មវិធីប្រកួតសម្រស់ Miss Grand International កាលឆ្នាំ២០២១ ​បាន​និយាយ​ថា តាំង​ពី​នៅ​រៀន​មក នាង​តែង​តែ​ចង់​ក្លាយ​ជា​អ្នក​ជំនួញ។ ជំនួស​ឲ្យ​ការ​ចូល​ប្រឡូក​ក្នុង​ពិភព​សិល្បៈ​ដូច​តារា​ស្រី​រូប​ស្រស់ផ្សេងទៀត Thuy Tien តែង​តែ​ខិត​ខំ​ស្វែង​រក​គោល​ដៅ​អាជីវកម្ម​ឲ្យ​បាន​ជោគជ័យ។

លើសពីនេះ នៅក្នុងបទសម្ភាសន៍ជាមួយប្រព័ន្ធផ្សព្វផ្សាយ Thuy Tien ធ្លាប់បានលើកឡើងពីការភ័យខ្លាចនៃការត្រូវបានទស្សនិកជនងាកចេញ។ ការបង្ហោះនេះត្រូវបានអ្នកលេងអ៊ីនធឺណេត ចែករំលែកតៗគ្នា ព្រោះបន្ទាប់ពី ៣ឆ្នាំមក ការភ័យខ្លាចរបស់រាជនីសម្រស់បានក្លាយជាការពិតហើយ។

ជាក់ស្តែងកាលណោះនាងបាននិយាយថា នាងទស្សនាព័ត៌មានក្នុងកម្មវិធីកម្សាន្តជាច្រើន ហើយឃើញថាមានមនុស្សស្រលាញ់ខ្លាំង ប៉ុន្តែបន្ទាប់ពីមានរឿងណាមួយកើតឡើង នោះនឹងត្រូវគេជេរប្រទេចនិងដាក់បណ្ដាសាយ៉ាងច្រើនមិនខាន។ ពេលគ្រងមកុដ MGI កាលឆ្នាំ២០២១ នាងមានអារម្មណ៍ព្រួយបារម្ភ ព្រោះខ្លាចថ្ងៃណាមួយទស្សនិកជនអាចងាកចេញពីនាង។ ហើយរូបនាងផ្ទាល់ក៏ដឹងថា ជីវិតគឺបែបនេះ គ្មានអ្វីនៅដដែលជារៀងរហូតទេ។ បើមនុស្សដែលស្រលាញ់ខឹង អន់ចិត្ត មានន័យថារូបនាងបានធ្វើអ្វីខុស ហើយត្រូវត្រលប់មកកែកំហុសមើលពីខ្លួនឯងវិញ។

តារាម៉ូដែលរូបនេះថែមទាំងសង្កន់ធ្ងន់ទៀតថា «ខ្ញុំមិនអាចបង្ខំអ្នកណាម្នាក់ឲ្យស្រលាញ់ខ្ញុំជារៀងរហូតបានទេ ប៉ុន្តែខ្ញុំត្រូវតែព្យាយាមបង្ខំខ្លួនឯង ឲ្យដើរតាមក្របខណ្ឌដែលខ្ញុំបានកំណត់សម្រាប់ខ្លួនខ្ញុំ ដើម្បីកុំឲ្យប៉ះពាល់ដល់អ្នកដទៃ ឬក្លាយជាមនុស្សល្អ»។

កាលពីថ្ងៃទី ១៩ ឧសភា យោងតាមព័ត៌មានពីកាសែតប៉ូលិសទីក្រុងហូជីមិញ នាយកដ្ឋានប៉ូលិសស៊ើបអង្កេត-ក្រសួងសន្តិសុខសាធារណៈបានប្រកាសថា ខ្លួនបានកាត់ទោស និងឃុំខ្លួនជាបណ្ដោះអាសន្នលើកញ្ញា Nguyen Thuc Thuy Tien ពីបទបោកបញ្ឆោតអតិថិជន ដូចមានចែងក្នុងប្រការ ២មាត្រា ១៩៨ នៃក្រមព្រហ្មទណ្ឌ ក្នុងនាមជាអ្នកសមគំនិតជាមួយក្រុមហ៊ុន Chi Em Rot  ដែលជាចុងចោទ។

នេះ​ជា​លទ្ធផល​នៃ​ការ​ស៊ើបអង្កេត​បន្ថែម​លើ​ករណី​ផលិត​ផលិតផល​អាហារ​ក្លែងក្លាយ​ ពាក់ព័ន្ធ​នឹង​ក្រុមហ៊ុន Asia Life Joint Stock Company និង​ក្រុមហ៊ុន Chi Em Rot។

យោងតាមទីភ្នាក់ងារស៊ើបអង្កេត Thuy Tien គឺជាម្ចាស់ភាគហ៊ុនដែលរួមចំណែក ៣០% នៃដើមទុននៅក្នុងផលិតផលនេះ ហើយទទួលបានប្រាក់ជិត៧ ពាន់លានដុងនៅក្នុងកម្រៃជើងសារ។ ទោះបីជានាងដឹងថា ជាតិសរសៃនៅក្នុងផលិតផលមានកម្រិតទាបខ្លាំង ហើយមិនដំណើរការដូចការផ្សាយពាណិជ្ជកម្មក៏ដោយ ក៏នាង និងសហការីរបស់នាងនៅតែផ្តល់ព័ត៌មានមិនពិតដើម្បីបញ្ឆោតអ្នកប្រើប្រាស់។ បន្ទាប់ពីមានភាពចម្រូងចម្រាស តារាស្រីបានស្នើចុះហត្ថលេខាលើកិច្ចសន្យាមួយដើម្បីធ្វើឲ្យការផ្សាយពាណិជ្ជកម្មស្របច្បាប់ រួមទាំងការចៀសវាងចាត់ទុកថា ខ្លួនគឺជាម្ចាស់ភាគហ៊ុនមួយដែរ៕

អត្ថបទ៖ សាង ស្រីល័ក្ខ

ចុចអាន៖ដក​តំណែង «យុវជនឆ្នើមវៀតណាម» ពីបវរកញ្ញា Thuy Tien ក្រោយជួបរឿងអាស្រូវផ្លូវច្បាប់​ត្រូវ​កាត់​ទោស