រដ្ឋមន្រ្តីក្រសួងហិរញ្ញវត្ថុថៃ គ្រោងហោះទៅអាមេរិកសប្ដាហ៍ក្រោយ ដើម្បីចរចាពន្ធ

រដ្ឋមន្ត្រីក្រសួងហិរញ្ញវត្ថុថៃ លោក Pichai Chunhavajira បាន​ឱ្យដឹងនៅថ្ងៃសុក្រនេះ​ថា លោកគ្រោងនឹងធ្វើដំណើរទៅសហរដ្ឋអាមេរិកនៅសប្ដាហ៍ក្រោយ ដើម្បី​​ធ្វើការចរចាពន្ធពាណិជ្ជកម្ម​ ខណៈកាលផុតកំណត់ នៃការពន្យារពេលអនុវត្តពន្ធគយបដិការខិតកាន់តែជិតមកដល់។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

លោកមិនបានបញ្ជាក់ជាលម្អិតនោះទេ ប៉ុន្តែថា កាលវិភាគសម្រាប់ការចរចាត្រូវបាន​កំណត់រួចហើយ។

ថៃដែលមាន​អតិរេកពាណិជ្ជកម្មជាមួយ​អាមេរិក ប្រមាណ ៤៥,៦ ប៊ីលាន​ដុល្លារកាលពីឆ្នាំមុន រងនូវពន្ធបដិការប្រមាណ ៣៦ ភាគរយ ពីសហរដ្ឋអាមេរិក។​ ដូចនឹង​ប្រទេសដទៃទៀតដែរ បច្ចុប្បន្នថៃរងនូវពន្ធ ១០ ភាគរយ ដែលជាពន្ធមូលដ្ឋាន ដោយពន្ធគយបដិការត្រូវពន្យារពេលរហូតដល់ថ្ងៃទី ៩ កក្កដា។

កាលពីដើមខែនេះ រដ្ឋមន្ត្រីក្រសួងពាណិជ្ជកម្មថៃ លោក Pichai Naripthaphan បាននិយាយថា កិច្ចពិភាក្សារវាងប្រទេសទាំង២ អាចឈានដល់លក្ខខណ្ឌល្អលើពន្ធគយ ហើយសម្រេចគ្នាដល់អត្រាទាបបំផុត​រហូតដល់ ១០ ភាគរយ។​

កន្លងមក គេមើលឃើញថា ការចរចាពន្ធថៃ និងសហរដ្ឋអាមេរិក ត្រូវបាន​ពន្យារពេលជាច្រើនដង​ យ៉ាងណាមិញ មន្រ្តីថៃ​សង្ឃឹម​ថា​ ការ​ចរចា​នឹង​ត្រូវ​បាន​ពន្យារ​ពេល​​ហួសកាលកំណត់ ៩ កក្កដា​៕