៤៤ខេត្តនៅថៃ ប្រឈមបំណាក់ដីនិងជំនន់រហ័ស ខណៈ បាងកក ជួបព្យុះនិងរន្ទះ

នាយកដ្ឋានឧតុនិយមនៃប្រទេសថៃ បានចេញការព្រមានពីហានិភ័យនៃបំណាក់ដីនិងគ្រោះទឹកជំនន់រហ័សនៅខេត្តចំនួន៤៤ ចាប់ពីថ្ងៃទី១២ខែសីហាទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីប្រកាសរបស់ក្រសួង, ភ្លៀងធ្លាក់ជញ្ជ្រំនៅតំបន់ភាគខាងជើង ឦសាន ខាងកើត និងនិរតីបណ្តាលឲ្យមានជំនន់ភ្លាមៗនិងដីបាក់ចុះពីភ្នំ វាយប្រហារតំបន់ខាងក្រោម បង្កគ្រោះថ្នាក់ដល់ពលរដ្ឋ។

មិនត្រឹមតែខេត្តទាំង៤៤នៅតំបន់ខាងលើនោះទេ សូម្បីទីក្រុងបាងកក ក៏ត្រូវប្រឈមខ្យល់ព្យុះនិងរន្ទះផងដែរ ចំណែកឯសីតុណ្ហភាពពេលថ្ងៃ នឹងកើនឡើងដល់៣៤-៣៦អង្សាសេ។

បាតុភូតអាកាសធាតុទាំងនេះគឺបណ្តាលមកពីប្រព័ន្ធសម្ពាធទាប ដែលក៏ជះឥទ្ធិពលដល់ប្រទេសឡាវ និងវៀតណាមផងដែរ។

ថៃ ត្រូវធម្មជាតិវាយប្រហារម្តងហើយម្តងទៀត ជាក់ស្តែងកាលពីចុងសប្តាហ៍ ប្រទេសនេះ បានជួបព្យុះភ្លៀង ខ្យល់កន្ត្រាក់និងរន្ទះបាញ់ នៅគ្រប់តំបន់។

មួយរយៈចុងក្រោយនេះ ឃើញថាប្រទេសថៃ ត្រូវជួបគ្រោះធម្មជាតិផ្ទួនៗ មានទាំងរញ្ជួយដី ទឹកជំនន់ផង បាក់ដី និងរលកកម្តៅផងដែរ។

សរុបសេចក្តីមក ប្រជាជនថៃ កំពុងរងទុក្ខដោយសារគ្រោះធម្មជាតិ បង្កការលំបាកដល់ជីវិតរស់នៅប្រចាំថ្ងៃ ស្របពេលដែលវិបត្តិសេដ្ឋកិច្ចនិងនយោបាយ ក៏កំពុងញាំញីប្រទេសផងដែរ៕

អត្ថបទ៖ សុខ សុវណ្ណ

ចុចអាន៖ ខេត្តថៃ ចំនួន៣៩ ប្រឈមទឹកជំនន់ និងការបាក់ដី នៅចុងសប្តាហ៍នេះ