ការ​ផ្អាកការនាំចូលអង្កររបស់ហ្វីលីពីន បង្កក្ដីបារម្ភនៅវៀតណាម និងថៃ

វិធានការបិទការនាំចូលអង្កររយៈពេល​ ៦០ ថ្ងៃរបស់ហ្វីលីពីន ដែលនឹង​ចាប់ផ្ដើមពីថ្ងៃទី ១ កញ្ញាខាងមុខនេះ កំពុងបង្កក្ដីបារម្ភខ្លាំង​ក្នុងចំណោមអ្នកនាំចេញអង្ករនៅវៀតណាម និងថៃ ចំពេលដែលតម្លៃអង្ករអន្តរជាតិ​ស្ថិតនៅក្រោម ៤០០ ដុល្លារ/តោន អស់រយៈពេលជាច្រើនខែមកហើយ។

តាមការចុះផ្សាយរបស់កាសែត Viet Nam News នាថ្ងៃចន្ទនេះ ក្រុមហ៊ុននាំចេញអង្ករវៀតណាមបានជំរុញឱ្យក្រសួងឧស្សាហកម្ម និងពាណិជ្ជកម្មផ្តល់ការគាំទ្រ ទប់ទល់នឹង​ផលប៉ះពាល់ពីចំណាត់ការរបស់ហ្វីលីពីន ដែលជាប្រទេសទិញអង្ករដ៏ធំបំផុតលើពិភព​លោក និងវៀតណាម។

ប្រធានសមាគមស្បៀងអាហារវៀតណាម លោក Đỗ Hà Nam បាននិយាយថា ការផ្អាករបស់ហ្វីលីពីន អាចរំខានដល់កិច្ចសន្យា​ដែល​បាន​ចុះហត្ថលេខារួច​ បង្កើន​ស្តុក និងបង្កើតសម្ពាធលើសាច់ប្រាក់ងាយស្រួលរបស់អ្នកនាំចេញ ក៏ដូចជាប៉ះពាល់ផ្ទាល់ដល់ប្រាក់ចំណូលរបស់កសិករ ដោយសារហ្វីលីពីន​រួមចំណែករហូតដល់ ៤០-៤៥ ភាគរយ នៃតម្លៃនាំចេញអង្ករសរុបរបស់វៀតណាម។

​សមាគមវៀតណាម​ដដែល​ បានស្នើរដ្ឋាភិបាល​ឱ្យចេញ​កញ្ចប់អត្រាការប្រាក់ទាប និងការពន្យារបំណុល​ រួមជាមួយនឹងវិធានការផ្សេងៗ ដើម្បីជួយអ្នកនាំចេញរក្សាទុកអង្ករក្នុងស្ដុក រហូតដល់ការផ្អាកត្រូវបានដកចេញ ដើម្បី​បញ្ចៀសការលក់ចេញដោយសារកង្វល់ ដែលនាំឱ្យ​ពួកគេខាតធ្ងន់ធ្ងរ។

ពាក់ព័ន្ធនឹង​ការផ្អាកការនាំចូលអង្ករ ២ ខែនេះ ហ្វីលីពីន បាន​អះអាងថាធ្វើឡើងដើម្បីការពារ​កសិករក្នុងស្រុក ដែល​រងហានិភ័យ​ដោយសារតែអង្ករនាំចូលពីបរទេសថោកៗ។ កាលពីខែកក្កដា ស្រូវហ្វីលីពីនធ្លាក់ចុះតម្លៃរហូតដល់ ១៦ ភាគរយ។

ជុំវិញបញ្ហានេះផងដែរ ​ប្រធាន​នាយកដ្ឋានពាណិជ្ជកម្មបរទេសនៃក្រសួងពាណិជ្ជកម្មថៃ លោកស្រី Arada Fuangtong បាននិយាយថា ក្រុមហ៊ុននាំចេញអង្កររបស់ថៃបានរាយការណ៍ថា សេចក្ដីសម្រេច​របស់​រដ្ឋាភិបាលហ្វីលីពីន​ នឹងប៉ះពាល់ដល់ការនាំចេញរបស់ខ្លួន​ ដូចទៅនឹង​ប្រទេសនាំចូលអង្ករផ្សេងទៀតដែរ​។ នេះបើតាមការចុះផ្សាយរបស់កាសែត The Nation កាលពីថ្ងៃអាទិត្យ​។

ឆ្លើយតបនឹង​បញ្ហានេះ នាយកដ្ឋានពាណិជ្ជកម្មបរទេសថៃ កំពុងរៀបចំវិធានការគាំទ្រការនាំចេញអង្កររបស់ថៃ និងធានានូវការបញ្ជាទិញថ្មី ដើម្បីស្រូបយកទិន្នផលក្នុងស្រុក និងបង្កើតប្រាក់ចំណូលដល់កសិករ។ វិធានការទាំងនេះរួមមានការពង្រីកទីផ្សារ និងការពង្រឹងទំនាក់ទំនងពាណិជ្ជកម្ម ដើម្បីបង្កើតទំនុកចិត្ត និងជំរុញការនាំចេញអង្កររបស់ថៃ។

គួរគូសបញ្ជាក់ថា ការផ្អាកការនាំចូលអង្កររបស់ហ្វីលីពីន ធ្វើឡើងចំពេលដែលតម្លៃអង្ករអន្តរជាតិ​ធ្លាក់ចុះរួចហើយតាំងតែពីដើមឆ្នាំមក ដោយសារតែកំណើននៃការផ្គត់ផ្គង់ និងការកាត់បន្ថយការនាំចូលរបស់ប្រទេសនាំចូលសំខាន់ៗដូចជាឥណ្ឌូណេស៊ីជាដើម៕

​