ព័ត៌មានអន្ដរជាតិ

តម្លៃមាសអន្តរជាតិបំបែកកំណត់ត្រាខ្ពស់ថ្មី ជាង ៣ ៥០០ ដុល្លារ/អោន

បានផុស

៩ ខែ មុន

នៅ

ថ្ងៃពុធ ៣ កញ្ញា ២០២៥

ដោយ

តម្លៃមាសអន្តរជាតិបានកើនឡើងដល់កំណត់ត្រាខ្ពស់បំផុតថ្មី ដល់ជាង ៣ ៥០០ ដុល្លារ/អោន ដោយសារតែក្ដីរំពឹងការកាត់អត្រាការប្រាក់របស់ធនាគារកណ្ដាលសហព័ន្ធអាមេរិក (Fed) ក៏ដូចជាហានិភ័យសេដ្ឋកិច្ច និងភូមិសាស្រ្តនយោបាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃមាសជួញដូរដោយផ្ទាល់ បានកើនឡើង ៦៣,៤០ ដុល្លារ ឬប្រមាណ ១,៨២ ភាគរយ ដោយកំពុងជួញដូរនៅតម្លៃ ៣ ៥៤១ ដុល្លារ/អោន គិតត្រឹមម៉ោង ២២ និង ១១ នាទី នៅទីក្រុងញូវយ៉ក ថ្ងៃអង្គារ ទី ២ កញ្ញា (ម៉ោង ១០ និង ១១ នាទីព្រឹកថ្ងៃពុធ នៅទីក្រុងហុងកុង)។

នេះគឺជាតម្លៃខ្ពស់បំផុតក្នុងប្រវត្តិសាស្រ្តនៃការជួញដូរមាស ហើយរាប់តាំងពីដើមឆ្នាំមកទល់ពេលនេះ តម្លៃមាសបានកើនឡើងប្រហែល ៣៥ ភាគរយ ទៅហើយ។

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ អ្នកជំនាញបានលើកឡើងថា ការបំបែកកំណត់ត្រាថ្មី កើតឡើងក្រោយអ្នកវិនិយោគិនរំពឹងកាន់តែខ្លាំងឡើងៗថា Feb នឹងកាត់បន្ថយអត្រាការប្រាក់ ២៥ ពិន្ទុ (០,២៥ ភាគរយ) បន្ថែមទៀតនៅខែកញ្ញានេះ។

អ្នកជំនាញគូសបញ្ជាក់ថា តម្លៃមាសឆ្នាំនេះ កើនឡើងដោយសារតែការទិញដ៏រឹងមាំពីធនាគារកណ្ដាល បដិដុល្លារូបនីយកម្ម និងកំណើនតម្រូវការមាសដែលជា «ទ្រព្យសម្បត្តិសុវត្ថិភាព» ដោយសារតែបញ្ហាភូមិសាស្រ្តនយោបាយ និងជម្លោះពាណិជ្ជកម្ម និងកម្សោយនៃប្រាក់ដុល្លារ។

ប៉ុន្តែការណ៍គួរឱ្យកត់សម្គាល់នោះគឺថា ភាពតានតឹងពាណិជ្ជកម្មដែលកំពុងបន្ត ដោយសារតែគោលនយោបាយពន្ធគយរបស់ប្រធានាធិបតីអាមេរិក លោក ដូណាល់ ត្រាំ ដែលបង្កកង្វល់សេដ្ឋកិច្ចសកល និងភាពមិនប្រាកដប្រជាផ្សេងៗនោះ គឺជាកត្តារួមចំណែកដ៏ខ្លាំងជាងគេ ធ្វើឱ្យតម្លៃមាសបំបែកកំណត់ត្រាជាបន្តបន្ទាប់នៅឆ្នាំនេះ។

តម្លៃមាសបានកើនឡើងលើស ៣ ០០០ ដុល្លារ/អោន ជាលើកដំបូងនៅខែមីនាឆ្នាំ ២០២៥ ហើយនៅឆ្នាំ ២០២៤ វាបានកើនឡើងប្រមាណ ២៧ ភាគរយ រួចទៅហើយ៕