សេដ្ឋកិច្ច

ផលប៉ះពាល់ពីប្រទេសសេដ្ឋកិច្ចធំៗ នៅតែជះឥទ្ធិពលដល់ការឆ្លើយតបជាគោលនយោបាយ

បានផុស

៤ ខែ មុន

នៅ

ថ្ងៃព្រហស្បតិ៍ ២ មេសា ២០២៦

ដោយ

មន្ត្រីធនាគារជាតិនៃកម្ពុជាបានអះអាងថា ផលប៉ះពាល់ពីប្រទេសសេដ្ឋកិច្ចធំៗដូចជា ប្រទេសចិន ជប៉ុន និងសហរដ្ឋអាមេរិក នៅតែជះឥទ្ធិពលដល់ការឆ្លើយតបជាគោលនយោបាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គីមទី កោមលី អគ្គនាយកប្រតិបត្តិការ ធនាគារជាតិនៃកម្ពុជា បានប្រាប់ឱ្យដឹងថា ធនាគារកណ្តាលចាំបាច់ត្រូវផ្តោតការយកចិត្តទុកដាក់លើការបង្កើតរចនាសម្ព័ន្ធដែលមានភាពធន់ និងមានចក្ខុវិស័យជាយុទ្ធសាស្ត្រក្នុងការគ្រប់គ្រងធនាគារកណ្ដាលសម័យថ្មី។

លោក គីមទី កោមលី បានលើកឡើងនៅក្នុងវេទិកា Central Banking Meetings រៀបចំដោយស្ថាប័ន Central Banking ចាប់ពីថ្ងៃទី៣១ ខែមីនា ដល់ ថ្ងៃទី០១ ខែមេសា ឆ្នាំ២០២៦ នៅទីក្រុងកូឡាឡាំពួរ ប្រទេសម៉ាឡេស៊ី។

លោក គីមទី កោមលី មានប្រសាសន៍ពីកិច្ចប្រឹងប្រែងរបស់ធនាគារកណ្ដាលក្នុងការពង្រឹងឯករាជ្យភាព និងភាពធន់ ដើម្បីឆ្លើយតបនឹងភាពមិនច្បាស់លាស់នៃសេដ្ឋកិច្ចសកល និងនិន្នាការនៃការធ្វើពិពិធកម្មរូបិយប័ណ្ណក្នុងទុនបម្រុងអន្តរជាតិ។

ការផ្លាស់ប្តូរទស្សនៈចំពោះតួនាទីរបស់ប្រាក់ដុល្លារអាមេរិក និងការធ្វើពិពិធកម្មទុនបម្រុងនេះ បានបង្កើតជាសក្តានុពល និងឱកាសដើម្បីឆ្លើយតបទៅនឹងការផ្លាស់ប្តូរនៃរបបពាណិជ្ជកម្មនៅតំបន់អាស៊ី។

មន្ត្រីដដែលរូបនេះក៏បានចែករំលែកអំពីការអនុវត្តគោលនយោបាយធ្វើអន្តរាគមន៍អត្រាប្តូរប្រាក់របស់ធនាគារជាតិនៃកម្ពុជាក្នុងបរិបទដុល្លារូបនីយកម្ម ការរក្សាស្ថិរភាពអត្រាប្តូរប្រាក់ និងការបង្កើនទំនុកចិត្តរបស់សាធារណជនមកលើរូបិយវត្ថុជាតិ៕