ឧកញ៉ា សុង សារ៉ន៖ កម្ពុជា នឹងជំរុញការ​នាំចេញស្រូវអង្ករតបតាមតម្រូវ​ការទីផ្សារអន្តរជាតិ

បច្ចុប្បន្នកម្ពុជា បាននាំចេញស្រូវអង្ករទៅទីផ្សារអន្តរជាតិជាធម្មតា។ ប៉ុន្តែបើទីផ្សារអន្តរជាតិ មានតម្រូវការខ្ពស់ កម្ពុជា នឹងជំរុញការនាំចេញឱ្យបានកាន់តែរលូន។ នេះជាការលើកឡើងរបស់លោកឧកញ៉ា សុង សារ៉ន ប្រធានក្រុមហ៊ុន Amru Rice និងជាប្រធានសហព័ន្ធស្រូវអង្ករ កម្ពុជា។

លោកឧកញ៉ា សុង សារ៉ន បានថ្លែងប្រាប់កម្ពុជាថ្មីដូច្នេះថា« ចំពោះតម្លៃ គឺវាអាស្រ័យលើទីផ្សារ បើទីផ្សារមា​នតម្រូវការខ្ពស់ ហើយការផ្គត់ផ្គង់ខ្វះនោះតម្លៃនឹងកើនឡើង វាជាទិដ្ឋភាពទូទៅនៃអាជីវកម្មនៅក្នុងសកលលោក។ តែបច្ចុប្បន្ននេះការផ្គត់ផ្គង់អង្ករលើទីផ្សារគឺមានកំណើនខ្លះ នេះជាហេតុធ្វើឱ្យតម្លៃមិនសូវកើនឡើងខ្ពស់នោះដែរ»។

បើតាមលោកឧកញ៉ា សម្រាប់កម្ពុជា ការនាំចេញ៧០% គឺអង្ករក្រអូប ហើយតម្លៃគឺត្រូវផ្អែកលើតម្លៃអង្ករថៃលើទីផ្សារ​អន្តរជាតិ បើអង្ករថៃឡើងថ្លៃ នោះអង្ករក្រអូបកម្ពុជា ក៏ឡើងថ្លៃដែរ ដោយសារប្រទេសថៃជាអ្នកនាំចេញអង្ករ​ក្រអូប​ធំជាងគេបង្អស់នៅលើពិភពលោក។

ទោះយ៉ាងណា ប្រធានសហព័ន្ធស្រូវអង្ករកម្ពុជា បានបង្ហាញសុទិដ្ឋិនិយមថា រដូវប្រមូលផលស្រូវប្រាំងក្នុងកំឡុងពេល​ខែកក្កដា-សីហាខាងមុខនេះ តម្លៃស្រូវនៅកម្ពុជានឹងឡើងថ្លៃយ៉ាងហោចណាស់ពី១០% ទៅ១៥% ដោយសារបច្ចុប្បន្ននេះ ប្រទេសជិតខាងកម្ពុជា មានតម្លៃកើនប្រហែលជា ២០ ទៅ ២៥%។

ប៉ុន្តែប្រធានសហព័ន្ធស្រូវអង្ករ មើលឃើញថា ការប្រមូលផលស្រូវប្រាំង រយៈកាលចុងក្រោយនេះមានការប្រែប្រួលខ្លះ ជាពិសេសប្រជាជនដែលធ្វើស្រែនៅតំបន់៣ ជុំវិញបឹងទន្លេសាប គឺបានផ្អាកធ្វើស្រែមួយរយៈ។ «យើងខ្ញុំសូមអបអរ​សារទរ ដែលសម្តេចនាយករដ្ឋមន្ត្រីលោក បានសម្រេចឃ្វៀលដី តំបន់នេះមួយចំនួនឱ្យប្រជាជនអាស្រ័យផល ជាពិសេស​គឺធ្វើស្រែតែម្តង ដែលបរិមាណស្រែប្រាំងនៅពេលខាងមុខ និងមានបិរមាណកើនបន្ថែមឡើងវិញ»។

ស្របពេលជាមួយគ្នានេះ លោកឧកញ៉ា សុង សារ៉ន កត់សម្គាល់ឃើញថា វិបត្តិសង្រ្គាមរុស្ស៉ី-អ៊ុយក្រែន បាន​ធ្វើឱ្យពិភពលោកខ្វះស្បៀងអាហារ ព្រោះប្រទេសទាំងពីរនេះ ផលិតស្រូវសាលីសម្រាប់នាំចេញទៅអឺរ៉ុបច្រើនជាងគេ និងប្រទេសមួយចំនួនទៀតនៅអាហ្រ្វិក ដែលបណ្តាលឱ្យស្រូវសាលីកើនឡើងខ្លាំងរហូតដល់៣០%។ ក្នុងពេល​ពិភពលោកកំពុងខ្វះស្បៀងអាហារនេះ ក៏ជាឱកាសល្អសម្រាប់អង្ករកម្ពុជាក្នុងការនាំចេញផងដែរ។

បើតាមលោកឧកញ៉ា សព្វថ្ងៃកម្ពុជា មានស្តុកសម្រាប់នាំចេញគ្រប់គ្រាន់ពេញមួយឆ្នាំ។ លោកបានឱ្យដឹងដូច្នេះថា «យើងលក់ចេញជាអង្ករចំនួនជាង ៦០ម៉ឺនតោន ហើយរោងម៉ាស៊ីនកិនស្រូវត្រៀមតាមនោះដែរ សម្រាប់​រយៈពេល​បច្ចុប្បន្នរហូតដល់ការប្រមូលផលស្រូវប្រាំង និងវស្សា ខាងមុខ យើងមានតាមឃ្លាំងយ៉ាងតិច ២០ម៉ឺនតោន ដោយមិនគិតសន្និធិស្តុកតាមរោងម៉ាស៊ីនខ្នាតតូចសម្រាប់ផ្គត់ផ្គង់ក្នុងស្រុក»។

ទន្ទឹមនឹងនេះ លោកឧកញ៉ា សុង សារ៉ុន បានអំពាវនាវបងប្អូនកសិករ កម្ពុជាសូមចាប់ផ្តើធ្វើស្រែដោយយក​ចិត្តទុកដាក់ខ្ពស់ និងស្វែងរកជម្រើសយន្តការប្រើប្រាស់ធាតុចូលដូចជាជីតាមលក្ខណៈធម្មជាតិ ឬសរីរាង្គជាដើម តម្លៃស្រូវនឹងមានការកើនឡើង។

យោងតាមរបាយការណ៍របស់សហព័ន្ធស្រូវអង្ករកម្ពុជា ក្នុងរយៈពេល៤ខែដើមឆ្នាំ២០២២នេះ កម្ពុជា បាននាំ​ចេញ​អង្ករចំនួនជាង ២២ម៉ឺនតោន ទៅកាន់ទីផ្សារអន្តរជាតិ ដោយទទួលបានចំណូលជាង ១៣៩លានដុល្លារអាមេរិក ក្នុងនោះនាំចេញទៅតំបន់អឺរ៉ុបមានបរិមាណ ចំនួន ៦៨ ៥៥៥ តោនស្មើនឹង ៣១% ដោយទទួលបានទឹកប្រាក់​ចំនួនជាង៥១ លានដុល្លារ៕ ទួន សុផល