ឧកញ៉ា សួរ វីរៈ បោះទុនជាង ២០លានដុល្លារ សាងសង់រីសតជាង ១០កន្លែង

អគ្គនាយកក្រុមហ៊ុនវីរៈប៊ុនថាំ លោកឧកញ៉ា សួរ វីរៈ បានបោះទុនចំនួនជាង ២០លានដុល្លារ ដោយមិនគិតពីតម្លៃដី សាងសង់រីសត ចំនួនជាង ១០កន្លែង នៅតំបន់ទេសចរណ៍សំខាន់ៗ នៅកម្ពុជា។

ទីតាំងទាំងនោះរួមមាន៖ នៅកោះស្តេច ១កន្លែង តាតៃ១កន្លែង កោះរ៉ុងសន្លឹមមាន ៦កន្លែង ខេត្តមណ្ឌលគិរី ១កន្លែង និងឧទ្យានជាតិព្រះសុរាម្រិតកុសុមៈគិរីរម្យ ៥កន្លែង។

លោកឧកញ៉ា សួរ វីរៈ បានប្រាប់កម្ពុជាថ្មីថា មូលហេតុដែលលោកវិនិយោគ អភិវឌ្ឍធ្វើរីសតនេះ ដោយសារមើល​ឃើញពីសក្ដានុពល នៃវិស័យទេសចរណ៍ របស់កម្ពុជា អាចនឹងរីកចម្រើនខ្លាំងនាពេលខាងមុខ។ លោកឧកញ៉ា បានបន្តដូច្នេះថា« សក្ដានុពលទេសចរណ៍យើងលើសគេ យើងមានគ្រប់ ដូចជា សមុទ្រ ភ្នំ កោះ ឆ្នេរ ព្រែក ព្រៃកោងកាង តែអ្វីដែលយើងនៅខ្វះគឺធនធានមនុស្សក្នុងការអភិវឌ្ឍ និងការចូលរួមជំរុញពីរាជរដ្ឋាភិបាល ដើម្បីឱ្យវិស័យមួយនេះទៅមុខ»។

ប្រសិនបើរដ្ឋាភិបាល អភិវឌ្ឍលើហេដ្ឋារចនាសម្ព័ន្ធផ្សេងៗ បង្កើនការផ្សព្វផ្សាយតំបន់ទេសចរណ៍ក្នុងស្រុក និងបណ្តុះបណ្តាលធនធានមនុស្សឱ្យយល់ពីចំណេះដឹងវិស័យទេសចរណ៍កាន់តែច្រើន យើងមានឱកាសស្រូប​យកភ្ញៀវទេសចរ បានច្រើនជាងប្រទេសជិតខាងយើង។ នេះជាការបន្ថែមរបស់លោកឧកញ៉ា សួរ វីរៈ។

បើតាមលោកឧកញ៉ សួរ វីរៈ ការអភិវឌ្ឍនេះ មិនរំពឹងរយៈពេលខ្លីនោះទេ តែរំពឹងថា ៥ឆ្នាំខាងមុខ វិស័យនេះ នឹងល្អប្រសើរ បើទោះកម្ពុជា តូចមែន តែមានសព្វគ្រប់បែបយ៉ាង៕