ទិន្នផល និងការប្រើប្រាស់មាស ចិន កើនឡើងក្នុងរយៈពេល ៩ ខែនៃឆ្នាំនេះ

ទិន្នន័យឧស្សាហកម្មចិនបង្ហាញថា ប្រទេសចិនផលិតមាសបាន ២៧១.២៤៨ តោនក្នុងរយៈពេល ៩ ខែដំបូងនៃឆ្នាំ ២០២៣ កើនឡើង ១.២៦១ តោន ឬ ០.៤៧ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន ។

យោងតាមទិន្នន័យដែលចេញផ្សាយដោយសមាគមមាសចិន (CGA) បានឲ្យដឹងថា នៅក្នុងអំឡុងខែមករាដល់ខែកញ្ញា ការប្រើប្រាស់មាសនៅក្នុងប្រទេសចិនមានចំនួនសរុប ៨៣៥.០៧ តោន កើនឡើង ៧.៣២ ភាគរយ បើប្រៀបធៀបនឹងឆ្នាំមុន ។

ជាក់ស្តែង ការប្រើប្រាស់គ្រឿងអលង្ការមាសនៅក្នុងទីផ្សារប្រទេសចិនវិញ បានកើនឡើង ៥.៧២ ភាគរយ បើប្រៀបធៀបនឹងឆ្នាំមុន ដល់ចំនួន ៥៥២.០៤ តោន ខណៈដែលដុំមាស និងកាក់ បានកើនឡើង ១៥.៩៨ ភាគរយធៀបនឹងរយៈពេលដូចគ្នាក្នុងឆ្នាំ ២០២២ ដល់ ២២២.៣៧ តោន ។

ទន្ទឹមនឹងនោះ ការប្រើប្រាស់មាសសម្រាប់ឧស្សាហកម្ម និងការប្រើប្រាស់ផ្សេងទៀត បានធ្លាក់ចុះ ៥.៥៣ ភាគរយពីឆ្នាំមុន មកនៅត្រឹម ៦០.៦៦ តោន ។

ចំណែកគ្រាន់តែនៅក្នុងត្រីមាសទី ៣ ការកាន់កាប់មូលនិធិជួញដូរដែលគាំទ្រដោយមាស (ETFs) នៅក្នុងប្រទេសចិនបានបន្ថែមចំនួន ៩.៥៣ តោន ហើយតួលេខនេះបាននាំមកនូវការកាន់កាប់មាស ETFs សរុបនៅក្នុងទីផ្សារប្រទេសចិន កើនដល់ប្រហែល ៥៩.៦៩ តោននៅចុងខែកញ្ញា ៕

ប្រែសម្រួល៖ នាង រតនៈ

ប្រភព៖​ Xinhua