សេដ្ឋកិច្ច

ចាប់ពីថ្ងៃនេះទៅ ទេសចរបរទេស ត្រូវបង់លុយ ពេលចូលលេង កោះបាលី

បានផុស

២ years មុន

នៅ

ថ្ងៃព្រហស្បតិ៍ ១៥ កុម្ភៈ ២០២៤

ដោយ

តាមសេចក្តីរាយការណ៍របស់ Reuters, ចាប់ពីថ្ងៃនេះទៅ អ្នកទេសចរបរទេស ត្រូវបង់ពន្ធជាទឹកប្រាក់ចំនួន ១៥០០០០រូពី ស្មើនឹង ៩.៦០ដុល្លារ ដើម្បីអាចចូលទៅលេងកោះបាលី បាន។

អាជ្ញាធរឥណ្ឌូណេស៊ីនិយាយថា ការធ្វើបែបនេះ គឺមានគោលបំណងការពារបរិស្ថាន និងវប្បធម៌របស់កោះ ដែលជាទិសដៅទេសចរណ៍ពេញនិយមបំផុតរបស់ពិភពលោកមួយនេះ។

កោះបាលី មានភាពល្បីល្បាញ ដោយសារទេសភាពដ៏ស្រស់ត្រកាល ហើយទិន្នន័យផ្លូវការបង្ហាញថា ភ្ញៀវទេសចរជិត៤.៨លាននាក់ បានទៅលេងកោះនេះ នៅចន្លោះខែមករាដល់ខែវិច្ឆិកាឆ្នាំមុន។

ពន្ធទេសចរណ៍នេះ អនុវត្តចំពោះតែភ្ញៀវបរទេសប៉ុណ្ណោះ ពោលគឺមិនគិតចំពោះទេសចរក្នុងស្រុកទេ។ អ្នកធ្វើដំណើរត្រូវតម្រូវឲ្យឲ្យបង់ប្រាក់ជាមុន តាមរយៈគេហទំព័រ Love Bali។

សូមបញ្ជាក់ វិស័យទេសចរណ៍ បានរួមចំណែកប្រហែល៦០% ដល់ GDP ប្រចាំឆ្នាំរបស់កោះបាលី មុនពេលផ្ទុះជំងឺរាតត្បាតកូវីដ១៩។

យោងតាមការិយាល័យស្ថិតិរបស់ខេត្ត ទេសចរបរទេសដែលចូលលេងកោះបាលីច្រើនបំផុតគឺជនជាតិអូស្រ្តាលី ដោយក្នុងខែវិច្ឆិកាឆ្នាំ២០២៣ មានជាង១០០០០០នាក់ ខណៈទេសចរណ៍ច្រើនបន្តបន្ទាប់គឺមកពីប្រទេសឥណ្ឌា ចិន និងសិង្ហបុរី។

ទោះបីជាយ៉ាងណាក៏ដោយ ប៉ុន្មានឆ្នាំចុងក្រោយនេះ អ្នកស្រុកហាក់មិនសូវពេញចិត្តទាល់តែសោះ ចំពោះអ្នកទេសចរដែលបង្ហាញអាកប្បកិរិយាមិនសមរម្យនៅកោះបាលី។

តួយ៉ាងកាលពីខែមីនាឆ្នាំមុន បុរសជនជាតិរុស្សីម្នាក់ ត្រូវបាននិរទេសចេញពីកោះបាលី បន្ទាប់ពីស្រាតសម្លៀកបំពាក់លើភ្នំ Agung ដែលគេជឿថាជាផ្ទះរបស់ព្រះ។

ក្នុងខែដដែលនោះ អាជ្ញាធរនិយាយថា ពួកគេចង់ហាមឃាត់ភ្ញៀវទេសចរបរទេស មិនឲ្យជិះម៉ូតូ បន្ទាប់ពីមានករណីពាក់ព័ន្ធបទល្មើសច្បាប់ចរាចរណ៍ ហើយកាលពីឆ្នាំ២០២១ មានរឿងចម្រូងចម្រាស់កើតឡើង នៅពេលវីដេអូរយៈពេល៣នាទី បានបង្ហាញពីគូស្នេហ៍ជនជាតិរុស្សីកំពុងរួមភេទនៅលើភ្នំ Batur៕

អត្ថបទ៖ សុខ សុវណ្ណ

ចុចអាន៖ កោះបាលី នឹងយកពន្ធពីទេសចរបរទេសក្នុងម្នាក់ ១០ ដុល្លារនៅឆ្នាំក្រោយ