ព័ត៌មានអន្ដរជាតិ

ភូមិសាស្រ្តនយោបាយវ៉ាដាច់អតិផរណា ក្លាយជាក្ដីបារម្ភដ៏ធំបំផុតចំពោះមូលនិធិវិយោគរបស់រដ្ឋ

បានផុស

២ years មុន

នៅ

ថ្ងៃចន្ទ ២២ កក្កដា ២០២៤

ដោយ

របាយការណ៍ស្ទង់មតិរបស់ក្រុមហ៊ុនគ្រប់គ្រងការវិនិយោគអាមេរិក Invesco បានបង្ហាញថា ការប្រកួតប្រជែងភូមិសាស្ត្រនយោបាយ រួមទាំងជម្លោះពាណិជ្ជកម្មរវាងសហរដ្ឋអាមេរិក និងចិន បានវ៉ាដាច់អតិផរណា ក្លាយជាក្ដីបារម្ភដ៏ធំបំផុត ដែលជាហានិភ័យសម្រាប់មូលនិធិវិនិយោគរបស់រដ្ឋ និងធនាគារកណ្ដាលរបស់រដ្ឋាភិបាលទូទាំងពិភពលោក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ស្ទង់មតិ ដែលចេញផ្សាយនៅថ្ងៃចន្ទនេះ មានឈ្មោះថា The Invesco Global Sovereign Asset Management Study លើកទី១២ ដែលធ្វើការស្ទង់មតិលើមូលនិធិវិនិយោគរបស់រដ្ឋចំនួន ៨៣ និងធនាគារកណ្តាលចំនួន ៥៣ ក្នុងត្រីមាសទី១ នៃឆ្នាំ ២០២៤។

ទិន្នន័យពីការស្ទង់មតិ បានបង្ហាញថា ៨៣ ភាគរយនៃការឆ្លើយតប បានចាត់ទុកភាពតានតឹងភូមិសាស្ត្រនយោបាយថាជាកង្វល់ដ៏ធំបំផុត ដោយលើសបញ្ហាអតិផរណា (៧៣ ភាគរយ)។ ការបែងចែកភូមិសាស្ត្រនយោបាយ និងការការពារនិយម ក៏បានជាប់ចំណាត់ថ្នាក់កំពូលនៃការព្រួយបារម្ភសម្រាប់ទសវត្សរ៍ខាងមុខផងដែរ ដោយការឆ្លើយតប ៨៦ ភាគរយ បានចុចលើបញ្ហានេះ។

គួរគូសបញ្ជាក់ថា ជម្លោះ រាប់តាំងពីសង្រ្គាមរបស់រុស្ស៊ីនៅអ៊ុយក្រែន រហូតដល់ការរឹតបន្តឹងពាណិជ្ជកម្មរបស់លោកខាងលិច គឺជាកង្វល់សម្រាប់អ្នកវិនិយោគជុំវិញពិភពលោកជាច្រើនឆ្នាំមកហើយ។ ប៉ុន្តែខណៈអតិផរណាហាក់ថយចុះនាពេលនេះ ហើយប្រជាជនជិតពាក់កណ្តាលនៃពិភពលោកក៏ត្រូវបោះឆ្នោតជ្រើសរើសមេដឹកនាំថ្មី ភាពតានតឹងភូមិសាស្រ្តនយោបាយ បានក្លាយជាបញ្ហាស្នូលឡើងវិញ។

ប្រធានស្ថាប័នផ្លូវការរបស់ Invesco លោក Rod Ringrow បានថ្លែងថា៖ «ពិតណាស់នេះ គឺជាឆ្នាំនៃការ បោះឆ្នោត។ ភូមិសាស្ត្រនយោបាយ បានទម្លាក់អតិផរណា ទាំងរយៈពេលខ្លី និងរយៈពេលវែង»។

ក្នុងរយៈពេលវែង ចម្លើយស្ទង់មតិ បានចាត់ទុកការប្រែប្រួលអាកាសធាតុ ថាជាហានិភ័យធំបំផុតទី២។

លោក Ringrow បាននិយាយថា៖ «អាកាសធាតុគឺជាបញ្ហារួមនៅពេលនេះ ហើយដំណើរការវិនិយោគសម្រាប់មូលនិធិវិនិយោគរបស់រដ្ឋ និងធនាគារកណ្តាល កំពុងចាប់ផ្តើមបែងចែកដើមទុន ដើម្បីពិនិត្យមើលបញ្ហានេះ និងមើលថាតើវាផ្ដល់ផលប៉ះពាល់យ៉ាងដូចម្តេច»៕