ព័ត៌មានអន្ដរជាតិ

តម្លៃអង្ករថៃធ្លាក់ចុះទាបបំផុតក្នុងរយៈពេលជាង១ឆ្នាំ

បានផុស

២ years មុន

នៅ

ថ្ងៃសុក្រ ១៣ កញ្ញា ២០២៤

ដោយ

តម្លៃអង្ករថៃបានធ្លាក់ចុះដល់កម្រិតទាបបំផុតក្នុងរយៈពេលជាង១ឆ្នាំ ខណៈតម្លៃអង្ករនាំចេញក៏ស្ថិតក្នុងនិន្នាការដូចគ្នានៅសប្តាហ៍នេះ ដល់ចុះដល់កម្រិតទាបបំផុតក្នុងរយៈពេល៨ខែ ចំពេលតម្រូវការចុះខ្សោយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃអង្ករដែលបាក់ ៥ ភាគរយ របស់ថៃ បានធ្លាក់ចុះមកនៅចន្លោះពី ៥៥០-៥៦០ ដុល្លារ/តោន នៅសប្តាហ៍នេះ ដែលជាតម្លៃទាបបំផុតរាប់ចាប់តាំងពីថ្ងៃទី ២០ ខែកក្កដា ឆ្នាំ ២០២៣ ដោយវាធ្លាក់ចុះពី ៥៨៥ ដុល្លារ/តោន កាលពីសប្ដាហ៍មុន។

ចំណែកអង្ករសំរូបបាក់ ៥ ភាគរយ របស់ឥណ្ឌាវិញ ត្រូវបានជួញដូរក្នុងតម្លៃ ៥៣៤ ដុល្លារ/តោន នៅសប្ដាហ៍នេះ ដែលជាតម្លៃទាបបំផុតចាប់តាំងពីពាក់កណ្ដាលខែមករា ដោយវាធ្លាក់ចុះពី ៥៤០ ដុល្លារ/តោន កាលពីសប្ដាហ៍មុន។

ប្រធានសមាគមអ្នកនាំចេញអង្ករឥណ្ឌា លោក Krishna Rao បានថ្លែងថា៖ «តម្រូវការបានធ្លាក់ចុះខ្លាំងក្នុងរយៈពេលប៉ុន្មានសប្តាហ៍កន្លងមកនេះ។ អ្នកទិញរំពឹងពីកាត់បន្ថយពន្ធនាំចេញរបស់ឥណ្ឌា ហើយកំពុងពន្យារពេលការទិញ»។

ទោះបីជាតម្លៃធ្លាក់ក៏ដោយ អាជីវករនៅទីក្រុងបាងកកបាននិយាយថា ទីផ្សារទិញអង្ករនៅតែចាត់ទុកថាអង្ករថៃនៅមានតម្លៃខ្ពស់ពេក។ យ៉ាងណាមិញ ទឹកជំនន់ភ្លាមៗក្នុងស្រុកថៃ កំពុងប៉ះពាល់ដល់ទិន្នផលប្រមូលផលក្នុងរយៈពេលខ្លី ដូច្នេះតម្លៃអាចនឹងប្រសើរឡើងវិញនៅពេលខាងមុខ។

ពាណិជ្ជករថៃម្នាក់ទៀតបាននិយាយថា ការធ្លាក់ចុះនៃតម្លៃអង្ករថៃ កើតចេញពីការប្រកួតប្រជែង ប៉ុន្តែថា វានឹងមានតម្រូវការពីអតិថិជនអាហ្វ្រិក និងអឺរ៉ុបមុនខែតុលា ពីព្រោះការបញ្ជាទិញទាំងនោះនឹងដឹកជញ្ជូននៅចុងខែធ្នូ។

មិនមែនថៃ និងឥណ្ឌាទេ ដែលឃើញពីតម្លៃអង្ករធ្លាក់ចុះ។ យោងតាមសមាគមស្បៀងអាហារវៀតណាម អង្ករបាក់ ៥ ភាគរយ របស់វៀតណាម ត្រូវបានដាក់លក់ក្នុងតម្លៃ ៥៦៧ ដុល្លារ/តោន កាលពីថ្ងៃព្រហស្បតិ៍ ដោយធ្លាក់ចុះពី ៥៧៥ ដុល្លារ/តោន កាលពីសប្ដាហ៍មុន។ ពាណិជ្ជករនៅទីក្រុងហូជីមិញ បាននិយាយថា៖ «សកម្មភាពជួញដូរនៅតែមានភាពយឺតយ៉ាវ ខណៈតម្រូវការធ្លាក់ចុះ»៕