កម្ពុជាកំពុងរៀបចំសេចក្តីព្រាង ​យុទ្ធសាស្រ្តស្តីពីការរៀបចំសេវាអេឡិចត្រូនិកសម្រាប់ធុរកិច្ច ២០២៥-២០២៨

រដ្ឋាភិបាលកម្ពុជាកំពុងប្រមូលធាតុចូលពីគ្រប់ភាគីពាក់ព័ន្ធ​ទាំងរដ្ឋាភិបាល ដៃគូរអភិវឌ្ឍន៍ និងវិស័យឯកជតាក់តែងនូវ ​«យុទ្ធសាស្រ្តស្តីពីការរៀបចំសេវាអេឡិចត្រូនិកសម្រាប់ធុរកិច្ច ២០២៥-២០២៨» ដើម្បីពង្រឹង និងកសាងនូវប្រព័ន្ធអេកូឡូស៊ីនៃវិស័យនេះឱ្យ​កាន់តែរឹងមាំ និង​បង្កើនប្រសិទ្ធភាពប្រតិបត្តិការសេវាកម្ម។

កាលពីថ្ងៃ​ទី ១៣ ខែមករា ឆ្នាំ២០២៥ លោកអូន ព័ន្ធមុនីរ័ត្ន ឧបនាយករដ្ឋមន្រ្តី និងជារដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការសេដ្ឋកិច្ច និងធុរកិច្ចឌីជីថល បាមនដឹកនាំកិច្ច​ប្រជុំពិនិត្យនិងពិភាក្សាលើសេចក្តីព្រាង «យុទ្ធសាស្រ្តស្តីពីការរៀបចំសេវាអេឡិចត្រូនិកសម្រាប់ធុរកិច្ច ២០២៥-២០២៨» ​ដោយមានចូលរួមរបស់រដ្ឋមន្រ្តីក្រសួងពាក់ព័ន្ធជាច្រើន និងថ្នាក់ដឹកនាំជាន់ខ្ពស់តំណាងក្រសួងស្ថាប័ននានា ព្រមទាំងភាគីពាក់ព័ន្ធផ្សេងៗជាច្រើនរូប។ ​

លោកស្រីបណ្ឌិត ជា​ សិរី ទេសាភិបាលធនាគារជាតិនៃកម្ពុជា ដែលបានចូលរួមកិច្ច​ប្រជុំនោះបានលើកឡើងពីសសរស្តម្ភ ៤ ក្នុងការគាំទ្រសេដ្ឋកិច្ចឌីជីថលដែលប្រទេសអភិវឌ្ឍបានប្រកាន់យករួមមានអត្តសញ្ញាណឌីជីថល;ការអនុញ្ញាតនិងការព្រមព្រៀង;lការផ្លាស់ប្តូរទិន្នន័យ; និង   ប្រព័ន្ធទូទាត់ដែលមានលទ្ធភាពធ្វើប្រតិបត្តិការឆ្លងគ្នា។

លោកស្រីបណ្ឌិត​ក៏បានចែករំលែកទស្សនាទាន ទាក់ទងនឹងកិច្ចការមួយចំនួនដែលក្រសួង-ស្ថាប័នរដ្ឋអាចសហការជាមួយវិស័យឯកជនបាន ដើម្បីបង្កើនប្រសិទ្ធភាពប្រតិបត្តិការសេវាកម្ម និងនិងបានស្នើពិនិត្យលទ្ធភាពបញ្ជាក់ពីគោលការណ៍ណែនាំច្បាស់លាស់អំពីការបើកលទ្ធភាពអោយមានកិច្ចសហប្រតិបត្តិការជាមួយវិស័យឯកជនក្នុងការអភិវឌ្ឍន៍សេវាអេឡិចត្រូនិចនៅក្នុងសេចក្តីព្រាងយុទ្ធសាស្រ្ត។

​«ខ្ញុំបានចូលរួមប្រជុំអន្តរក្រសួង នៅក្រសួងសេដ្ឋកិច្ចនងហិរញ្ញវត្ថុ ក្រោមអធិបតីភាពឯ.ឧ ឧបនាយករដ្ឋមន្ត្រី អូន ព័ន្ធមនីរត្ន ដើម្បីពិភាក្សាលើសេចក្តីព្រាងយុទ្ធសាស្រ្តស្តីពីការរៀបចំសេវាអេឡិកត្រូនិកសម្រាប់ធុរកិច្ច ២០២៥_២០២៨។ យុទ្ធសាស្រ្តនេះមានគោលបំណងសម្រួលសេវាសាធារណៈ សម្រាប់ធុរកិច្ច ដើម្បីបង្កើនតម្លាភាព និងប្រសិទ្ធភាព។ យុទ្ធសាស្រ្តក៏បានប្រើប្រព័ន្ធបាគងដើម្បីជា ប្រព័ន្ធកន្លោង (backbone) សម្រាប់ការទូទាត់សេវាសាធារណៈ»។ នេះបើយោងតាមការសរសេររបស់លោកស្រីបណ្ឌិតនៅលើបណ្តាញ​សង្គមផ្លូវការ​របស់ខ្លួនកាលពីថ្ងៃទី១៤ ខែមករា។

រដ្ឋមន្រ្តីក្រសួងពាណិជ្ជកម្ម លោកស្រី ចម និម្មល បានព្យាករណ៍ថាការធ្វើពាណិជ្ជកម្មតាមប្រព័ន្ធអេឡិចត្រូនិកនឹងសម្រេចបានទឹកប្រាក់ ១,១២៥ពាន់លានដុល្លារនៅឆ្នាំ២០២៤ មានកំណើន១០%  ធៀបនឹងឆ្នាំ២០២៣ដែលមានទឹកប្រាក់ ១ពាន់លានដុល្លារ។

ការលើកឡើងរបស់លោកស្រី ចម និម្មលធ្វើឡើងនៅក្នុងកម្មវិធីបើកពិពរ័ណ៍ពាណិជ្ជកម្មកម្ពុជាកាលពីថ្ងៃទី១៣ខែធ្នូ។ លោកស្រីថា៖«ចំណូលតាមរយៈ ពាណិជ្ជកម្មតាមប្រព័ន្ធអេឡិចត្រូនិករបស់កម្ពុជា បានកើនឡើងដល់១ ០៩៧ លានដុល្លារអាមេរិកក្នុងឆ្នាំ២០២៣ ហើយត្រូវបានព្យាករណ៍ថានឹងកើនឡើងដល់ ១ ១២៥លានដុល្លារនៅឆ្នាំ២០២៤។

ក្រសួងបានព្យាករណ៍ថា នៅឆ្នាំ២០២៧ ចំណូលតាមរយៈ ពាណិជ្ជកម្មតាមប្រព័ន្ធអេឡិចត្រូនិក ត្រូវបានរំពឹងថានឹងឈានដល់ ១ ៧៧៨ លានដុល្លារ ជាមួយអត្រាកំណើនប្រមាណ១០%ក្នុងមួយឆ្នាំ»។

បើយោងតាមលោកស្រី កំណើននៃចំណូលតាមរយៈ ពាណិជ្ជកម្មតាមប្រព័ន្ធអេឡិចត្រូនិករបស់កម្ពុជា ត្រូវបានគាំទ្រ និងជម្រុញដោយវិស័យសំខាន់ៗ៖ សំលៀកបំពាក់ កាបូប ស្បែកជើង ២៦៣ លានដុល្លារអាមេរិក (តំណាង ២៣,៥%); ឧបករណ៍ឬសម្ភារៈអេឡិចត្រូនិកមានចំនួន ២៥៤,​៤ លានដុល្លារ (តំណាង ២២,៧%); គ្រឿងសំអាង ផលិតផលថែរក្សាសម្រស់ សុខភាព និងសម្ភារៈប្រើប្រាស់មានចំនួន ២៣០,​៥ លានដុល្លារ(តំណាង ២០,៦%);អាហារ និងភេសជ្ជៈមានចំនួន ១០១,៥ លានដុល្លារ (៩ ,​១%);សម្ភារៈក្មេងលេង សម្ភារៈកម្សាន្ត និងសម្ភារៈកែច្នៃ មានចំនួន ៤៦,៣លានដុល្លារ (៥,៦%); ​គ្រឿងសង្ហារឹម និងផលិតផលសម្រាប់គេហដ្ឋាន មានចំនួន ៤៦,៣ លានដុល្លារ (៤,១%); ប្រព័ន្ថផ្សព្វផ្សាយ និងទំនាក់ទំនង មានទឹកប្រាក់១១លានដុល្លារ (១%) និង ផ្សេងៗទៀត។

ប្រទេសកម្ពុជាបង្ហាញពីកំណើនក្នុង e-Commerce ពាណិជ្ជកម្មតាមប្រព័ន្ធអេឡិចត្រូនិក, e-travel ដំណើរកម្សាន្តអនឡាញ, e-services សេវាកម្មអនឡាញ និងបណ្ដាញសង្គមអនឡាញ។

ក្នុងឆ្នាំ ២០២១ កម្ពុជាមានចំណូល ៩៧០ លានដុល្លារ និងរំពឹងថានឹងកើនដល់១,៨ពាន់លានដុល្លារនៅឆ្នាំ២០២៥។ទីផ្សារឌីជីថលនៅកម្ពុជា មានការរីកចម្រើនខ្លាំង ដោយមានសេវាកម្មដូចជា foodpanda, NHAM24, Grab, E-gets, WowNow, និង L192 ដែលមានផ្តល់ជូននូវផលិតផលប្រើប្រាស់ អាហារ និងសម្លៀកបំពាក់ និងការបញ្ជាកក់សេវាដឹកជញ្ជូន៕