ក្រសួងពាណិជ្ជកម្មថៃ ដាក់ចេញវិធានការជំរុញការនាំចេញរបស់ប្រទេស

ក្រសួងពាណិជ្ជកម្មថៃ បានដាក់ចេញនូវវិធានការយុទ្ធសាស្ត្រចំនួន ៧ និងផែនការសកម្មភាពចំនួន ២៥ ដើម្បីជំរុញការនាំចេញកសិផលរបស់ប្រទេសថៃទូទាំងពិភពលោក ស្របតាមការណែនាំរបស់នាយករដ្ឋមន្ត្រី ដើម្បីដោះស្រាយការផ្គត់ផ្គង់លើសតម្រូវការក្នុងស្រុក និងបង្កើនប្រាក់ចំណូលរបស់កសិករ។ នេះបើតាមការចុះផ្សាយរបស់កាសែត The Nation នៅថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រី Pichai Naripthaphan បាននិយាយកាលពីថ្ងៃពុធថា ក្រសួងកំពុងធ្វើការជាមួយភ្នាក់ងារផ្សេងៗដើម្បីបង្កើនផលិតកម្ម ទីផ្សារ ការនាំចេញ ការកែច្នៃ និងការសម្របសម្រួលពាណិជ្ជកម្មសម្រាប់​ផ្លែឈើគោលដៅ ៩៥០ ០០០ ​តោន​។ វាក៏រួមបញ្ចូលផងដែរនូវយុទ្ធនាការ​ក្នុងការជំរុញ​តម្រូវការផ្លែឈើក្នុងស្រុក។

លោកបានបន្ថែមថា នាយកដ្ឋានពាណិជ្ជកម្មផ្ទៃក្នុង ​ត្រូវបានចាត់ភារកិច្ចឱ្យចាប់ផ្តើមយុទ្ធនាការផ្សព្វផ្សាយផ្សេងៗ ដោយសហការជាមួយ​កន្លែងលក់រាយធំ ៗ រួមមានផ្សារទំនើប Siam Paragon, Central, The Mall និង CP Axtra ដើម្បីពង្រីកបណ្តាញលក់ដោយផ្ទាល់ទៅអ្នកប្រើប្រាស់សម្រាប់កសិករ។

លោក Pichai បានបន្តទៀតថា ចំពោះគោលនយោបាយពាណិជ្ជកម្ម ក្រសួងកំពុងពន្លឿនការចរចាកិច្ចព្រមព្រៀងពាណិជ្ជកម្មសេរី (FTA) ជាមួយសហភាពអឺរ៉ុប កូរ៉េខាងត្បូង និងអាស៊ាន-កាណាដា ក្នុងគោលបំណងបញ្ចប់កិច្ចចរចាទាំងអស់នៅចុងឆ្នាំនេះ។ ក្រោយបញ្ចប់ហើយ​ ប្រទេសថៃនឹងមានកិច្ចព្រមព្រៀងពាណិជ្ជកម្មសេរីជាមួយប្រទេសជាង ៥០ ដែលផ្តល់ឱ្យអ្នកនាំចេញ និងអ្នកវិនិយោគថៃនូវការប្រកួតប្រជែងក្នុងទីផ្សារថ្មី៕