ចិនកត់ត្រាពីកំណើនប្រាក់ចំណេញឧស្សាហកម្មខែមុន ទោះបីប្រឈមពន្ធអាមេរិក

ទិន្នន័យផ្លូវការចេញផ្សាយនៅថ្ងៃអង្គារនេះ បាន​បង្ហាញថា ប្រាក់ចំណេញឧស្សាហកម្មរបស់ប្រទេសចិនបានកើនឡើងខ្ពស់ក្នុងខែមេសា ដែលជាសញ្ញាបង្ហាញពីភាពធន់​នៃសេដ្ឋកិច្ច ​ទោះមាន​ភាពតានតឹងពាណិជ្ជកម្មជាមួយសហរដ្ឋអាមេរិក និងសម្ពាធ​បរិត្តផរណា​ក្នុងស្រុក។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យពីការិយាល័យស្ថិតិជាតិ (NBS) បានឱ្យដឹងថា ប្រាក់ចំណេញ​ពីវិស័យឧស្សាហកម្ម បានកើនឡើង ១,៤ ភាគរយ ចន្លោះពីខែមករា ដល់ខែមេសា ធៀប​នឹង​រយៈពេលដូចគ្នាកាលពីឆ្នាំមុន ដល់ ២,១ ទ្រីលាន​យន់ (២៩២,២៨ ប៊ីលាន​ដុល្លារ)។

គិតតែក្នុងខែមេសា​ ប្រាក់ចំណេញឧស្សាហកម្មចិន បានកើនឡើង ៣ ភាគរយ ធៀប​នឹង​កំណើន ២,៦ ភាគរយ នៅខែមីនា។

​ទិន្នន័យសេដ្ឋកិច្ចចុងក្រោយ​នេះ បង្ហាញពី​ស្ថានភាពប្រទាញប្រទង់គ្នានៃសេដ្ឋកិច្ចចិន ​ដោយ​ការនាំចេញមានភាពរឹងមាំជាងការរំពឹងទុក ប៉ុន្តែទិន្នផលរោងចក្រ និងកំណើននៃការលក់រាយបានធ្លាក់ចុះ។

តម្លៃទំនិញចេញពីរោងចក្រ​ បានធ្លាក់ចុះសម្រាប់ខែទី ៣១ ជាប់ៗគ្នា នៅខែមេសា ហើយក៏ជាការធ្លាក់ចុះធំបំផុតក្នុងរយៈពេល ៦ ខែចុងក្រោយ ដោយសារតែ​បរិត្តផរណា និងភាពមាន​កំណត់នៃប្រាក់ចំណេញរបស់ក្រុមហ៊ុន។

កន្លងមក រដ្ឋាភិបាល​ចិនបានជំរុញឱ្យមាន​ការចាត់វិធានការ ដើម្បីបង្កើនទំនុកចិត្ត និងការចំណាយក្នុងស្រុក។ ​ក្នុងខែឧសភា ​ចិន​បានចាប់ផ្តើមផែនការជំរុញ​សេដ្ឋកិច្ចដ៏ធំ រួមទាំងការកាត់បន្ថយអត្រាការប្រាក់ និងចាក់បញ្ចូលប្រាក់បន្ថែមទៀត​ទៅក្នុងប្រព័ន្ធហិរញ្ញវត្ថុ។

ជាមួយគ្នានោះ អ្នកបង្កើតគោលនយោបាយ និងវេទិកាពាណិជ្ជកម្មអេឡិចត្រូនិកធំៗចិន ក៏បានសន្យា​ជួយអ្នកនាំចេញដែលរងផលប៉ះពាល់ដោយសង្រ្គាមពន្ធ ស្វែងរក​ទីផ្សារក្នុងស្រុកផងដែរ។

គួរគូសបញ្ជាក់ថា ចិន និងសហរដ្ឋអាមេរិក បាន​ធ្លាក់ចូលទៅក្នុងសង្រ្គាមពាណិជ្ជកម្មពន្ធគយនៅខែមេសា ក្រោយប្រធានាធិបតី ដូណាល់ ត្រាំ ប្រកាសពីពន្ធគយបដិការនៅដើមខែមេសា ដែលបង្កក្ដីបារម្ភសម្រាប់កំណើនសេដ្ឋកិច្ចចិន ដែលពឹងផ្អែកខ្លាំងលើការនាំចេញ៕

​