តម្លៃហាងឆេងមាសធ្លាក់ចុះបន្តិច ក្រោយអាមេរិករក្សាអត្រាការប្រាក់ ៤,៥%ដដែល

តម្លៃហាងឆេងមាសបានបើកផ្សារនៅតម្លៃ ៤០៥៨ ដុល្លារ ក្នុងមួយតម្លឹង ពោលគឺមានការធ្លាក់​ចុះបន្តិច ដោយសារតែធនាគារកណ្ដាលសហរដ្ឋអាមេរិកនៅតែរក្សាអត្រាការប្រាក់ ៤,៥​% ដដែល ទោះបីលោកដូណាល់ ត្រាំ ចង់ឱ្យកាត់បន្ថយអត្រាការប្រាក់ក៏ដោយ។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities បានឱ្យដឹងនៅថ្ងៃទី ១៩ ខែមិថុនា ឆ្នាំ ២០២៥ ថា គិតចាប់ពីពេលនេះ រហូតដល់ដំណាច់ឆ្នាំ នៅសល់ការ​ទម្លាក់ ឬដំឡើងអត្រាការប្រាក់របស់អាមេរិកប្រមាណ ២ ដងទៀត ដែលអាមេរិកអាចនឹងទម្លាក់អត្រាការប្រាក់នៅចុងឆ្នាំ នឹងធ្វើឱ្យប្រាក់ដុល្លារចុះខ្សោយនៅក្នុងដំណាក់កាលនោះ។

លោក ឡុង សំណាង បន្ថែមថា៖ «អ្វីដែលយើងពិចារណា គឺអាមេរិកកំពុងតែរក្សានូវកម្រិតប្រាក់ដុល្លារឱ្យមានលំនឹងមួយដោយសារតែមិនអាចទម្លាក់ឥឡូវបានទេ បើទម្លាក់ឥឡូវហាក់ដូចជាវាធ្លាក់​​ថោក​ខ្លាំងពេក អញ្ចឹងរក្សាឱ្យមានលំនឹងទីផ្សារជាមួយនិងអតិផរណាឱ្យបានត្រឹមត្រូវបន្តិចសិន ពាក់ព័ន្ធជាមួយនឹងថ្លៃទំនិញ ឬសេវាកម្មផ្សេងៗ»។

លោក ឡុង សំណាង យល់ថា៖ «នៅក្នុងឆ្នាំ ២០២៥ ខ្ញុំមើលឃើញកត្តាមួយចំនួន ដែលអាច​ធ្វើឱ្យតម្លៃហាងឆេងមាសបន្តកើនឡើង ទី១ អត្រាការប្រាក់នៅខ្ពស់ គេអាចនឹងកាត់​បន្ថយអត្រា​ការ​ប្រាក់ លុយដុល្លារអាមេរិកនឹងធ្លាក់ចុះ»។

បើតាមលោក ឡុង សំណាង សម្ពាធពន្ធហាក់បីដូចជាស្ងាត់បន្តិច ប៉ុន្តែវាមិនទាន់ចប់សព្វគ្រប់ និងកំណត់ពន្ធបានត្រឹម​ត្រូវនៅឡើយទេ ដរាបណាមានលោក ដូណាល់ ត្រាំ​ ជាប្រធានាធិបតីអាមេរិក តម្លៃមាស​នៅតែកើនឡើង។

សង្គ្រាមរុស្ស៊ី-អ៊ុយក្រែន មិនទាន់មានសញ្ញាបញ្ជាក់ថា សន្តិភាព ព្រមទាំង​បណ្ដាប្រទេស​មួយចំ​នួន​ទៀត ដូចជាអ៊ីរ៉ង់-អ៊ីស្រាអែល ដែលសុទ្ធតែជាកត្តាធ្វឱ្យមាសកើនឡើង។

គិតត្រឹមម៉ោង ១០ ព្រឹកថ្ងៃទី ១៩ ខែមិថុនា ឆ្នាំ ២០២៥ មាសជួញដូរក្នុងតម្លៃ ៤០៦៨ ដុល្លារ ក្នុងមួយតម្លឹង។ សម្រាប់​ហាងលក់មាសនៅក្នុងរាជធានីភ្នំពេញ លក់ចេញក្នុងតម្លៃ ៤០៨ ដុល្លារ ក្នុង​មួយជី៕

អត្ថបទ៖ ឡេង ដេត