ពន្ធខ្ពស់របស់អាមេរិក ​ចូលជាធរមាន​នៅថ្ងៃនេះ

ពន្ធខ្ពស់ ដែល​ដើមឡើយ​ប្រធានាធិបតីអាមេរិក លោក ដូណាល់ ត្រាំ ហៅថាជា «ពន្ធគយបដិការ» នឹង​ចូលជាធរមាននៅប្រហែលពាក់កណ្ដាលថ្ងៃត្រង់ថ្ងៃសុក្រ ១ សីហា នេះ (ម៉ោង ០០:០០ នៅសហរដ្ឋ​អាមេរិក​) ដោយលោក ត្រាំ បាន​និយាយរួចហើយថា លោកនឹង​មិនពន្យារពេលទៀតទេ។

ការចូលជាធរមាន​លើកនេះ ធ្វើឡើងក្រោយ​សហរដ្ឋអាមេរិក​បាន​សម្រេចបាន​នូវកិច្ចព្រមព្រៀងពាណិជ្ជកម្ម ជាមួយ​ដៃគូពាណិជ្ជកម្មជាច្រើន ទាំងនៅអាស៊ី អឺរ៉ុប និងអាមេរិកខាងជើង។ ពន្ធទាំងនោះ មាន​អត្រាចន្លោះពី ១៥-៥០ ភាគរយ ដែលក្នុងនោះមាន​ប្រេស៊ីលរងពន្ធខ្ពស់ដាច់គេ (៥០ ភាគរយ)។

ការណ៍គួរឱ្យ​កត់សម្គាល់នោះគឺថា ក្រោយមាន​ការចរចាអស់រយៈពេលជាច្រើនខែ បន្ទាប់ពីលោក ត្រាំ ប្រកាសពន្ធ «បដិការ» នៅដើមខែមេសានោះ ពន្ធបច្ចុប្បន្នសម្រាប់បណ្ដាដៃគូពាណិជ្ជកម្មរបស់អាមេរិក​ ភាគរយច្រើន ត្រូវបន្ថយចុះក្រោមកិច្ចព្រមព្រៀងពាណិជ្ជកម្មថ្មី។ ឧទាហរណ៍ ដើមឡើយអាមេរិកដាក់ពន្ធលើវៀតណាម ៤៦ ភាគរយ ប៉ុន្តែក្រោយចរចាគ្នា ពន្ធនេះ ត្រូវបាន​ទម្លាក់ចុះវិញ មកនៅត្រឹម ២០ ភាគរយ​។

ជាថ្នូរនឹង​ការបន្ធូរបន្ថយពន្ធ គេមើលឃើញថា បណ្ដាប្រទេសនានាបាន​ផ្ដល់ជូនស្រដៀងៗគ្នា។ បណ្ដាប្រទេសកំពុង​អភិវឍ្ឍនៅអាស៊ីអាគ្នេយ៍ បាន​យល់ព្រមលើការបើកទីផ្សារជាមួយនឹង​ «ពន្ធសូន្យ» សម្រាប់ផលិតផលអាមេរិក បង្កើនការទិញទំនិញអាមេរិក និងទម្លាក់របាំងពាណិជ្ជកម្មពន្ធគយ និងមិនមែនពន្ធគយជាដើម​។ បណ្ដាប្រទេសអភិវឌ្ឍដូចជាជប៉ុន កូរ៉េខាងត្បូង និងសហភាពអឺរ៉ុប ឯណោះវិញ បាន​សន្យាបង្កើនការវិនិយោគជាទឹកប្រាក់រាប់រយប៊ីលាន​ដុល្លារនៅទឹកដីសហរដ្ឋអាមេរិក។

គួរគូសបញ្ជាក់ថា លោក ត្រាំ បាន​ប្រកាសពន្ធខ្ពស់ឡើងនៅដើមខែមេសា ក្រោយ​មក​បាន​ពន្យារពេល ៩០ ថ្ងៃ គិតត្រឹមថ្ងៃ ៩ កក្កដា មុនលោកប្រកាសលើកពេលជាថ្មី មកដល់ថ្ងៃ ១ សីហា។ ក្រោមគោលនយោបាយ​បែប​ការពារនិយមនេះ លោក ត្រាំ ​បាន​សំអាងថា សហរដ្ឋអាមេរិក​បាន​​រងនូវភាពអយុត្តិធម៌​នៃ​ពាណិជ្ជកម្មសេរីសកល ជាមួយ​នឹង​ឱនភាពពាណិជ្ជកម្ម​ ១,២៣ ទ្រីលាន​ដុល្លារកាលពីឆ្នាំ ២០២៤។  

ខណៈមាន​ការព្រួយបារម្ភថា ពន្ធរបស់លោកនឹង​ធ្វើឱ្យពាណិជ្ជកម្ម​សកលធ្លាក់ចុះ តម្លៃទំនិញនៅអាមេរិក​កើនឡើង លោក​ ត្រាំ បាន​លើកឡើងថា វានឹង​នាំការវិនិយោគទៅសហរដ្ឋអាមេរិក ជំរុញវិស័យផលិតកម្ម និងបង្កើតការងារ​។ អ្នកជំនាញខ្លះបាន​លើកឡើងពីលទ្ធភាពនៃភាព​ជោគជ័យពីពន្ធរបស់លោក ដោយហេតុថា ប្រទេសជាច្រើន​បាន​កំណត់អត្រាពន្ធថ្មី ហើយពួកគេគ្មានជម្រើសច្រើនពីទីផ្សារអាមេរិក ដែលមាន​អំណាច​ទិញខ្លាំងជាងគេលើពិភព​លោក​៕

ដោយ៖ ហួន ឌីណា