ធនាគារកណ្ដាលអាមេរិកកាត់អត្រាការប្រាក់ ០,២៥ ភាគរយ ជុំវិញកង្វល់សេដ្ឋកិច្ច

ធនាគារកណ្តាលសហព័ន្ធអាមេរិក (Fed) បានកាត់បន្ថយអត្រាការប្រាក់ ២៥ ពិន្ទុ កាលពីថ្ងៃពុធ ដែល​នេះជាការកាត់បន្ថយលើកដំបូងរាបត់ាំងពីចុងឆ្នាំមុន ដោយ​លើកឡើងពីកង្វល់អវិជ្ជមាន​ក្នុងវិស័យការងារ ដែលជាសញ្ញាមិនល្អសម្រាប់សេដ្ឋកិច្ច។ ​

ការកាត់បន្ថយ ២៥​ ពិន្ទុ ឬ ០,២៥ ភាគរយ មាន​ន័យថា អត្រាការប្រាក់គោលរបស់ Fed បច្ចុប្បន្ន​ ត្រូវបាន​ទម្លាក់មកត្រឹម ៤,០-៤,២៥ ភាគរយ។ ​

ប្រធាន Fed លោក Jerome Powell បាននិយាយ​ក្នុងសន្និសីទសារព័ត៌មាន​នៅថ្ងៃពុធថា ស្ថាប័នឯករាជ្យ​​របស់លោកបាន​សម្រេចចិត្តត្រូវ ដែលរងចាំមើលពេលវេលា​សិន ដើម្បីវាយតម្លៃពីផលប៉ះពាល់នៃពន្ធគយរបស់ប្រធានាធិបតី ដូណាល់ ត្រាំ លើសេដ្ឋកិច្ចអាមេរិក។

កន្លងមក លោក ត្រាំ បាន​ទទូចម្ដងហើយម្ដងទៀតឱ្យ Fed ទម្លាក់អត្រាការប្រាក់ចុះ ខណៈសេតវិមានរិះគន់លោក Powell ថាមាន​ភាពយឺតយ៉ាវក្នុងការសម្រេចចិត្តកាត់អត្រាការប្រាក់បន្ថែម។

ទេសាភិបាល Fed លោក Stephen Miran ដែលទើប​បាន​តែងតាំងថ្មីៗនេះ មិនយល់ស្របនឹង​មតិភាគច្រើន​ដែល​សម្រេចចិត្ត​កាត់អត្រាការប្រាក់ត្រឹម ០,២៥ ភាគរយ ដោយ​លោក​ចង់ឱ្យ​មាន​ការកាត់បន្ថយរហូតដល់ ០,៥០ ភាគរយ។ លោក Miran ជាទីប្រឹក្សាសេតវិមានរបស់​លោក ត្រាំ ដែលត្រូវបាន​តែងតាំង​នៅក្រុមប្រឹក្សាភិបាល​ Fed កាលពីដើមសប្ដាហ៍។ ​

ពាក់ព័ន្ធនឹង​ការសម្រេចចិត្តចុងក្រោយ​នេះ ​Fed បាននិយាយ​ក្នុងសេចក្តីថ្លែងការណ៍​ថា៖ «កំណើននៃការងារបាន​ថយចុះ» ​ខណៈអត្រាគ្មានការងារធ្វើបានកើនឡើង​ ប៉ុន្តែនៅតែស្ថិតក្នុងកម្រិតទាប។ យ៉ាងណាមិញ Fed មិនបាន​ហៅទីផ្សារការងារនៅអាមេរិក ថាមាន «ភាពរឹងមាំ» ទៀត​នោះទេ។

គេមើលឃើញថា ការចុះខ្សោយនៃទីផ្សារការងារនៅខែសីហា រួមចំណែកដល់ការកាត់ ០,២៥ ភាគរយ។ ក្នុងខែសីហា ការងារថ្មីប្រមាណ ២២ ០០០ ត្រូវបាន​បន្ថែមទៅក្នុងសេដ្ឋកិច្ច ខណៈអត្រាអត់ការងារធ្វើវិញ បាន​កើនឡើងពី ៤,២ ភាគរយ ដល់ ៤,៣ ភាគរយ។

​ជាមួយគ្នានោះ ​Fed ទំនង​នឹង​កាត់អត្រាការប្រាក់ ២ ដង​ទៀតនៅឆ្នាំ​នេះ​ ប៉ុន្តែ Powell បាន​និយាយថា Fed នៅតែបន្តឃ្លាំមើលពីហានិភ័យនៃអតិផរណា ដែល​អាច​កើនឡើង។

ការព្យាករ​សេដ្ឋកិច្ចថ្មី​របស់ Fed បានបង្ហាញថា ​អតិផរណាអាចកើនឡើងប្រហែល ៣ ភាគរយ នៅឆ្នាំនេះ ដោយលើសកម្រិតគោលដៅ ២ ភាគរយ របស់ Fed ប៉ុន្តែមិនមាន​ការប្រែប្រួលពីការព្យាករពីខែមិថុនានោះទេ។ ការព្យាករ​សម្រាប់​អត្រាអត់ការងារធ្វើវិញ ក៏មិនផ្លាស់ប្តូរដែរ នៅត្រឹម ៤,៥ ភាគរយ ខណៈ​សេដ្ឋកិច្ចរំពឹងកើនដល់ ១,៦ ភាគរយ ធៀបនឹង​ការព្យាករចាស់ ១,៤ ភាគរយ៕

​