ប្រាសាទ ដាវីន ស្ម័គ្រចិត្តធ្វើជាទូតសុឆន្ទៈបំបៅកូនដោយទឹកដោះ

តារាសម្តែងនិងជាតារាម៉ូដែល អ្នកនាង ប្រាសាទ ដាវីន បានប្រកាសថា នាងបានស្ម័គ្រចិត្តធ្វើជាទូតសុឆន្ទៈដើម្បីជំរុញនិងលើកកម្ពស់ការបំបៅកូនដោយទឹកដោះម្តាយនៅកម្ពុជាឲ្យកាន់តែទូលំទូលាយបន្ថែមទៀត។

អ្នកនាង ប្រាសាទ ដាវីន ដែលក្លាយជាទូតសុឆន្ទៈការបំបៅកូនដោយទឹកដោះបានបញ្ជាក់ឲ្យដឹងថា អ្នកនាងនិងស្វាមីបានធ្វើសេចក្តីសម្រេចចិត្តនិងប្តេជ្ញាចិត្តយ៉ាងម៉ឺងម៉ាត់ថា នឹងបំបៅកូនដោយទឹកដោះអ្នកនាងផ្ទាល់ឲ្យបានសម្រេច ព្រោះបំណងប្រាថ្នារបស់យើងគឺថា កូនដំបូងរបស់យើងដែលជាកែវភ្នែកនិងគ្រាប់ពេជ្រទាំងដុំត្រូវតែមានសុខភាពល្អតាមរយៈការមិនផ្តល់អាហារមានជាតិគីមីដែលអាចប៉ះពាល់ដល់សុខភាពភាពឆ្លាតវៃ និងអនាគតដ៏ល្អប្រសើររបស់គាត់។ 

តារាស្រីអ្នកនាង ប្រាសាទ ដាវីន បានបន្តថា ហើយម្យ៉ាងទៀតការបំបៅកូនដោយទឹកដោះម្តាយដែលជាអាហារធម្មជាតិពិតៗនេះ ត្រូវបានដូនតារបស់យើងរាប់សិបជំនាន់មកហើយ រាប់ទាំងជំនាន់អង្គរផង បានអនុវត្តក្នុងការចិញ្ចឹមកូនចៅឲ្យមានសុខភាពល្អ និងមានភាពឆ្លាតវៃខ្ពស់ព្រោះថា ដូនតារបស់យើងជំនាន់នោះអាចកសាងកម្ពុជាអច្ឆរិយ:មួយដែលមានប្រាសាទអង្គរវត្តដ៏ល្បីល្បាញជាភស្តុតាងស្រាប់។

អ្នកនាងបន្ថែមថា «ដោយមានស្វាមីនិងក្រុមគ្រួសារដ៏កក់ក្តៅគាំទ្រលើកទឹកចិត្តនៅជុំវិញខ្លួនរួមទាំងចំណេះដឹងខ្លួនឯងផងនោះនាងខ្ញុំបានអនុវត្តដោយផ្ទាល់ក្នុងការបំបៅកូនដោយទឹកដោះខ្លួនឯងសុទ្ធ តែម្តងចាប់ពីថ្ងៃផ្តល់កំណើតកូនជាលើដំបូងរហូត ដល់កូនខ្ញុំអាយុបានជាងប្រាំខែ។ នៅពេលគាត់អាយុបានជាងប្រាំខែនាងខ្ញុំក៏បានចាប់ផ្ដើមបញ្ចុកអាហារទន់ៗដូចជាចេកទុំ ល្ហុងទុំ បបរលាយជាមួយត្រីស៊ុត និងបន្លែខ្លះៗ ព្រមទាំងចាប់ផ្តើមបញ្ចុកទឹកសុទ្ធដល់គាត់ផងដែរហើយក៏នៅតែបន្តបំបៅកូនដោយទឹកដោះខ្ញុំផ្ទាល់រហូតដល់គាត់មានអាយុ ១ ឆ្នាំកន្លះនេះ»។

ពាក់ព័ន្ធនឹងការងារស្ម័គ្រចិត្តធ្វើជាទូតសុឆន្ទៈលើក កម្ពស់ការបំបៅកូនដោយទឹកដោះម្តាយនៅកម្ពុជានេះដែរលោក ហ៊ូ ក្រើន នាយករងអង្គការហេទ្បែន ខេលល័រ អន្តរជាតិក៏បានបង្ហាញការគាំទ្រដល់ការស្ម័គ្រចិត្តរបស់អ្នកនាង ប្រាសាទ ដាវីន ជាទូតសុឆ ន្ទៈនាពេលនេះ៕

អត្ថបទ៖ ចាន់រ៉ា