ព័ត៌មានអន្ដរជាតិ

ថៃធ្វើសមុយុទ្ធជម្លៀសប្រជាជននៅស្រុក៤ ក្នុងខេត្តស្រះកែវនៅថ្ងៃអាទិត្យនេះ

បានផុស

៦ ខែ មុន

នៅ

ថ្ងៃអាទិត្យ ១២ តុលា ២០២៥

ដោយ

ក្នុងករណីគ្មានអ្វីប្រែប្រួល នៅព្រឹកថ្ងៃអាទិត្យនេះចាប់ពីវេលាម៉ោង១០ព្រឹក អាជ្ញាធរថៃក្នុងខេត្តស្រះកែវ រៀបចំការហ្វឹកហ្វឺនការជម្លៀសប្រជាជននៅតាមតំបន់ពំ្រដែន ដែលជាការបង្ការ សម្រាប់ស្ថានភាពគ្រាអាសន្នណាមួយដែលអាចកើតមាន ដែលអាចបញ្ចៀសភាពស្លន់ស្លោររបស់ប្រជាជន។

អភិបាលខេត្តស្រះកែវ លោក Parinya Phothisat។ The thaiger

យោងសេចក្តីរាយការណ៍របស់ព័ត៌មានថៃ The Nation អភិបាលខេត្តស្រះកែវ លោក Parinya Phothisat បានជូនដំណឹងដល់ប្រជាជនថៃនៅតាមបណ្តាស្រុកជាប់ព្រំដែនកម្ពុជា ឲ្យចូលរួមក្នុងលំហាត់សមយុទ្ធជម្លៀសចេញដើម្បីត្រៀមខ្លួនសម្រាប់ស្ថានភាពគ្រាអាសន្ន។

ការធ្វើលំហាត់សមយុទ្ធជម្លៀសចេញនេះ នឹងធ្វើឡើងនៅភូមិចំនួន៦១នៅស្រុកទាំង៤នៅជាប់ព្រំដែនជាមួយកម្ពុជា ដូចជា ស្រុក Khok Sung, Ta Phraya, Aranyaprathet និងស្រុក Khlong Hat។ អ្នកចូលរួមក្នុងផែនការសមយុទ្ធនោះ មាន ប្រធានភូមិ មេឃុំ ក្រុមសន្តិសុខភូមិ បុគ្គលិកស័គ្រចិត្តសុខភាពសាធារណៈ និងបុគ្គលិកសុខាភិបាល។ នេះយោងតាមសេចក្តីរាយការណ៍។

លោក Parinya Phothisat ដែលធ្លាប់បានចេញសេចក្តីថ្លែងការសុំទោសប្រជាជនថៃខ្លួនឯងកាលថ្ងៃទី២៣ខែសីហា ២០២៥ ដោយសារតែបានទទួលស្គាល់ថា ទីតាំងដីដែលយោធាថៃធ្វើសកម្មភាពទន្ទ្រាននោះមិនមែនជាទឹកដីរបស់ថៃ ប៉ុន្តែក្រោយមកបានចេញសេចក្តីប្រកាសសុំទោសប្រជាជនថៃដោយអះអាងថា ទីតាំងនោះជាដីព្រៃវិញ។

ទោះជាបែបណាក៏ដោយ ប្រជាជនកម្ពុជាបានតាំងទីលំនៅក្នុងទឹកដីនោះជាយូរមកហើយ ក្នុងបូរណភាពទឹកដីនៃប្រទេសកម្ពុជា ដែលស្ថិតនៅក្នុងផែនទីដែលត្រូវបានទទួលស្គាល់ជាអន្តរជាតិ។ កន្លងមក អភិបាលខេត្ត បន្ទាយមានជ័យ លោក អ៊ុំ រាត្រី បានជំទាស់ចំពោះផែនការនានារបស់ភាគីថៃក្នុងការកាន់កាប់ដីដែលថៃកំពុងធ្វើសកម្មភាពទន្ទ្រាននោះ៕

រ៉ាន់ រើយ