ម៉ាឡេស៊ី ប្រកាសតាមដានការអនុវត្ត រាល់កិច្ចព្រមព្រៀង ដែលសម្រេចបានក្នុងកិច្ចប្រជុំអាស៊ាន

ក្នុងសារបង្ហោះលើបណ្តាញសង្គមនៅថ្ងៃអង្គារទី២៨ខែតុលាឆ្នាំ២០២៥ នាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម បានបង្ហាញពីការប្តេជ្ញាចិត្តថា ការចូលរួមប្រកបដោយអត្ថន័យជាមួយដៃគូក្នុងអំឡុងពេល កិច្ចប្រជុំកំពូលអាស៊ានលើកទី៤៧ និងកិច្ចប្រជុំពាក់ព័ន្ធ ត្រូវតែឈានទៅហួសពីកិច្ចព្រមព្រៀងទាំងឡាយដែលមានចែងត្រឹមលើក្រដាស ដូច្នេះប្រទេសម៉ាឡេស៊ីនឹង តាមដានការអនុវត្តយ៉ាងដិតដល់ជាទីបំផុត ដើម្បីធានាថា ប្រជាជនទាំងអស់ទទួលបានផលប្រយោជន៍រួម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា៖ «ជំហររបស់ម៉ាឡេស៊ីនឹងបន្តចាក់ឫសលើគោលការណ៍នៃសន្តិភាព វិបុលភាព និងសុចរិតភាព ដោយធ្វើការជាមួយបណ្តាមិត្តភក្តិនិងប្រទេសជិតខាង»។

ទន្ទឹមនោះ តាមការផ្សាយរបស់ Bernama, លោកក៏លើកឡើងដែរថា៖ «ជាការតភ្ជាប់សេដ្ឋកិច្ច ការសម្របសម្រួលកិច្ចសន្ទនា និងការរួមចំណែកដល់ស្ថិរភាព, ការចុះហត្ថលេខាលើកិច្ចព្រមព្រៀងសន្តិភាពទីក្រុងគូឡាឡាំពួរវាងកម្ពុជានិងថៃ គឺជាឧទាហរណ៍ដ៏ច្បាស់ក្រឡែតដែលបង្ហាញថា តើតួនាទីការទូតយុទ្ធសាស្ត្ររបស់យើងមានតម្លៃខ្លាំងកម្រិតណាទៅ»។

ប្រទេសម៉ាឡេស៊ី ក្រោមការដឹកនាំរបស់លោក អាន់វ៉ា បានទទួលការកោតសរសើរជុំវិញពិភពលោក សម្រាប់ការរៀបចំកិច្ចប្រជុំអាស៊ានប្រកបទៅដោយរលូន។

លើសពីនេះ លោកអាន់វ៉ា ក៏ត្រូវគេស្ញប់ស្ញែងផងដែរ ចំពោះការស្វះស្វែងធ្វើការជាមួយប្រធានាធិបតីអាមេរិក ដូណាល់ ត្រាំ ដើម្បីដោះស្រាយជម្លោះព្រំដែនកម្ពុជា-ថៃ នាំរកសន្តិភាពជូនប្រទេសទាំងពីរ៕

អត្ថបទ៖ សុខ សុវណ្ណ

ចុចអាន៖ ប្រមុខ UN សរសើរម៉ាឡេស៊ី សម្រាប់ការខិតខំ ជួយដោះស្រាយជម្លោះកម្ពុជា-ថៃ