ព័ត៌មានអន្ដរជាតិ

បក្សប្រឆាំងថៃ ស្នើ អានុទីន ប្រកាន់យកដំណោះស្រាយការទូតជាមួយកម្ពុជា

បានផុស

៦ ខែ មុន

នៅ

ថ្ងៃពុធ ១២ វិច្ឆិកា ២០២៥

ដោយ

គណបក្សប្រជាជន (People’s Party) ដែលជាបក្សប្រឆាំងធំបំផុតរបស់ប្រទេសថៃ និងដែលបានជួយជ្រុមជ្រែង លោក អានុទីន ឆានវីរៈគុល (Anutin Charnvirakul) ឲ្យឡើងកាន់កៅអីនាយករដ្ឋមន្ត្រីកាលពីដើមខែកញ្ញា បានជំរុញឲ្យលោក អានុទីន ប្រកាន់យកដំណោះស្រាយការទូតក្នុងជម្លោះជាមួយកម្ពុជា។

លោក Natthaphong Ruengpanyawut ប្រធានគណបក្សប្រជាជនថៃ។ FB

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងសារព័ត៌មាន Khaosod English ដែលបានផ្សាយនៅព្រឹកថ្ងៃទី១២ខែវិច្ឆិកានេះ គណបក្សប្រជាជនថៃ បានដាក់ចេញនូវសំណើបន្ទាន់មួយទៅកាន់នាយករដ្ឋមន្ត្រី អានុទីន ឆានវីរៈគុល ជំុំវិញដំណោះស្រាយក្នុងជម្លោះព្រំដែនជាមួយកម្ពុជា។

នៅក្នុងសំណើបន្ទាន់ទាក់ទងនឹងជម្លោះកម្ពុជា-ថៃ គណបក្សប្រជាជនថៃ បានលើកឡើងថា រដ្ឋាភិបាលថៃត្រូវចាត់វិធានការការទូតសកម្មជាបន្ទាន់ដើម្បីទទួលបានផលប្រយោជន៍ ដោយនៅក្នុងនោះ គណបក្សប្រជាជនថៃជំរុញនាយករដ្ឋមន្ត្រី អានុទីន ប្រកាន់ខ្ជាប់កិច្ចព្រមព្រៀងសន្តិភាពជាមួយកម្ពុជា។

ដើម្បីទទួលបាននូវភាពមានប្រៀបជាងកម្ពុជា គណបក្សប្រជាជនថៃ ជំរុញឲ្យរដ្ឋាភិបាលរបស់លោក អានុទីន ហៅទូរស័ព្ទជាបន្ទាន់ទៅកាន់នាយករដ្ឋមន្ត្រីម៉ាឡេស៊ីក្នុងនាមជាប្រធានអាស៊ាន និង ប្រធានាធបតីអាមេរិក ដូណាល់ ត្រាំ ដែលសាក្សីនៃកិច្ចព្រមព្រៀងសន្តិភាព។

គណបក្សប្រជាជនថៃថា៖«លោក [អានុទីន] ត្រូវតែអះអាងថា ជំហររបស់ថៃគឺថា ថៃប្រាថ្នារក្សាកិច្ចព្រមព្រៀងសម្រាប់បុព្វហេតសន្តិភាពរវាងប្រទេសទាំងពីរ»។

លោក អានុទីន ឆានវីរៈគុល (Anutin Charnvirakul)។ FB

នៅក្នុងសំណើដែលបានចេញផ្សាយទាំងស្រុងដោយសារព័ត៌មានថៃ គណបក្សប្រឆាំងថៃ បានលើកឡើងថា វិធានការណ៍សកម្មរបស់ប្រទេសថៃត្រូវតែអនុវត្តជាបន្ទាន់ មុនពេលនាយករដ្ឋមន្ត្រីកម្ពុជា សម្តេចបវរធិបតី ហ៊ុន ម៉ាណែត ហៅទៅកាន់មេដឹកនាំអាមេរិក និងម៉ាឡេស៊ី ពន្យល់អំពីភាគីរបស់កម្ពុជាជាមុន និងព័ត៌មានលម្អិតអំពីស្ថានការណ៍។

ជាងនេះទៅទៀត ថៃត្រូវតែអះអាងជាថ្មីថា ខ្លួនរក្សាកិច្ចព្រមព្រៀង ខណៈដែលកម្ពុជាបានរំលោភបំពាន ដើម្បីបង្កើតភាពស្របច្បាប់ថា ថៃគឺជាភាគីត្រឹមត្រូវក្នុងស្ថានភាពជម្លោះនេះ និងមានហេតុផល ប្រសិនបើចាំបាច់ត្រូវបង្កើនប្រតិបត្តិការនាពេលអនាគត។

គណបក្សប្រឆាំងថៃ ក៏បានស្នើឲ្យរដ្ឋាភិបាលថៃគួរតែបញ្ជូនលិខិតផ្លូវការមួយទាមទារឱ្យអាមេរិកពិចារណាព្យួរកិច្ចសហប្រតិបត្តិការយោធាជាមួយកម្ពុជា ដែលសហរដ្ឋអាមេរិក បានដកបម្រាមលក់សព្វាវុធឲ្យកម្ពុជា ក្រោយកម្ពុជាអនុវត្តបានយ៉ាងខ្ជាប់ខ្ជួននូវដំណើរការអនុវត្តបទឈប់បាញ់ និងការស្តារដំណើរការឆ្ពោះទៅរកសន្តិភាពពេញលេញ។

កាលពីថ្ងៃទី១០ ខែវិច្ឆិកា ឆ្នាំ២០២៥ ទាហានថៃពីរនាក់បានរងរបួស បន្ទាប់ពីបានជាន់មីននៅតំបន់តាមបណ្តាយជម្លោះព្រំដែនក្នុងខេត្តស៊ីសាកេត ដោយក្នុងនោះមានទាហានថៃម្នាក់បានរងរបួសកជើងខាងស្តាំ។ ប្រការនេះបាននាំឱ្យនាយករដ្ឋមន្ត្រី Anutin Charnvirakul ប្រកាសលុបចោលកិច្ចព្រមព្រៀងសន្តិភាពកម្ពុជា-ថៃ ដែលបានចុះហត្ថលេខាកាលពីថ្ងៃទី២៦ ខែតុលា ដែលធ្វើជាសាក្សីដោយនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) ក្នុងតួនាទីជាប្រធានអាស៊ាន និងប្រធានាធិបតីសហរដ្ឋអាមេរិក ដូណាល់ ត្រាំ (Donald Trump)៕

រ៉ាន់ រើយ