ថៃ បារម្ភខ្លាំង ព្រោះអត្រាទារកកើតមិនគ្រប់ខែ កើនឡើងដល់កម្រិតខ្ពស់បំផុត

ប្រទេសថៃកំពុងបង្ហាញក្តីកង្វល់យ៉ាងខ្លាំង ស្របពេលមានរបាយការណ៍ថា អត្រាទារកកើតមិនគ្រប់ខែ កំពុងកើនឡើងដល់កម្រិតខ្ពស់បំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យពីក្រសួងសុខាភិបាលនិងត្រូវបានយកមកផ្សាយដោយសារព័ត៌មាន Bangkok Post នៅថ្ងៃអង្គារទី១៨ខែវិច្ឆិកាឆ្នាំ២០២៥ បានបង្ហាញថា បច្ចុប្បន្នអត្រាទារកកើតមិនគ្រប់ខែនៅក្នុងប្រទេសថៃគឺមានកម្រិត ៩.៩១% ដែលនេះជាកម្រិតខ្ពស់ត្រូវព្រួយបារម្ភបើធៀបនឹងប្រទេសដទៃទៀតលើពិភពលោក។

ថ្លែងក្នុងទិវាពិភពលោកនៃកំណើតមិនគ្រប់ខែកាលពីថ្ងៃចន្ទ លោក Pattana Promphat រដ្ឋមន្ត្រីសុខាភិបាលសាធារណៈថៃ និយាយថា ក្រសួងនិងបណ្តាញដៃគូរបស់ខ្លួន បានធ្វើការរួមគ្នាដើម្បីពង្រឹងប្រព័ន្ធត្រួតពិនិត្យ និងណែនាំវិធានការ ដើម្បីបង្ការនិងព្យាបាលការកើតមិនគ្រប់ខែ។ គោលដៅគឺកាត់បន្ថយអត្រាជាតិឲ្យមកនៅក្រោម ៨% តាមរយៈ ការរកឃើញទាន់ពេលវេលា ការថែទាំមាតាកាន់តែប្រសើរ និង បង្កើនការយល់ដឹងជាសាធារណៈ។

យោងតាមក្រសួង ការថែទាំផ្ទៃពោះយឺតយ៉ាវនៅតែជា កត្តាចម្បង ដែលរួមចំណែកដល់ការកើតមិនគ្រប់ខែ រួមជាមួយនឹងការពិនិត្យហានិភ័យមិនគ្រប់គ្រាន់ នៅក្នុងដំណាក់កាលដំបូងនៃការមានផ្ទៃពោះ។

ភាពតានតឹងទាំងផ្លូវកាយនិងផ្លូវចិត្តយូរឆ្នាំ ក៏អាចបង្កើនហានិភ័យរីកមាត់ស្បូន ការឈឺពោះចាប់ផ្តើមសម្រាលមុនកំណត់ឬការរលូតកូន ផងដែរ៕

អត្ថបទ៖ សុខ សុវណ្ណ

ចុចអាន៖ ប៉ូលិសថៃទូទាំងប្រទេស ប្រញាប់ចេញស្បថ ដោយស្រែកឮៗថា ខ្លួនមិនមែនអង្គការឧក្រិដ្ឋកម្មទេ