គីម ជុងអ៊ុន សរសើរកងទ័ពខ្លួន ដែលដាក់ពង្រាយក្នុងសង្គ្រាម រុស្ស៊ី-អ៊ុយក្រែន

មេដឹកនាំកូរ៉េខាងជើង គីម ជុងអ៊ុន បានលើកសរសើរការដាក់ពង្រាយកងទ័ពរបស់លោក ដែលគាំទ្រសង្គ្រាមរុស្ស៊ី-អ៊ុយក្រែន ហើយបានសន្យាថា នឹងលុបបំបាត់ការអនុវត្តអាក្រក់ក្នុងចំណោមមន្ត្រីមួយចំនួន នេះបើយោងតាមទីភ្នាក់ងារសារព័ត៌មានកណ្តាលកូរ៉េ (KCNA) ដែលគ្រប់គ្រងដោយរដ្ឋ ចេញផ្សាយនាថ្ងៃសុក្រទី ១២ ខែធ្នូ ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសុន្ទរកថាបញ្ចប់កិច្ចប្រជុំដ៏សំខាន់មួយរបស់គណបក្សកាន់អំណាច លោកគីមបានថ្កោលទោស «ទស្សនៈមនោគមវិជ្ជាខុស និងអាកប្បកិរិយាការងារអសកម្ម និងមិនទទួលខុសត្រូវ» របស់មន្ត្រីមួយចំនួន។ លោកក៏បាននិយាយអំពី ចំណុចខ្វះខាត និងការអនុវត្តអាក្រក់ដែលត្រូវតែកែតម្រូវ។

យ៉ាងណា អង្គការសារព័ត៌មានកូរ៉េខាងជើងមិនបានផ្តល់ព័ត៌មានលម្អិតណាមួយ ទាក់ទងនឹងគោលដៅនៃមតិយោបល់របស់លោកគីមនោះទេ ទោះបីជាខ្លួនបាននិយាយថា គណបក្សកាន់អំណាចបានបង្ហាញពីការងាកចេញថ្មីៗជាច្រើន នៅក្នុងវិន័យក៏ដោយ (ដែលជាពាក្យប្រៀបធៀបសម្រាប់អំពើពុករលួយ)។

ដោយបញ្ចប់កិច្ចប្រជុំរយៈពេលបីថ្ងៃ គីម ជុងអ៊ុន បានលើកសរសើរចំពោះទាហានកូរ៉េខាងជើងដែលកំពុងប្រយុទ្ធនឹងអ៊ុយក្រែន រួមជាមួយរុស្ស៊ី ដែលក្នុងនោះយ៉ាងហោចណាស់មានមនុស្ស ៦០០ នាក់ត្រូវបានសម្លាប់ និងរាប់ពាន់នាក់ទៀតរងរបួសនៅក្នុងសង្គ្រាម នេះបើយោងតាមការប៉ាន់ស្មានរបស់កូរ៉េខាងត្បូង។

យោងតាមការប៉ាន់ស្មានរបស់កូរ៉េខាងត្បូង KCNA បានដកស្រង់សម្តីរបស់លោកគីមថា ក្នុងរយៈពេលមួយឆ្នាំកន្លងមកនេះ ទាហានជាច្រើននាក់នៃយោធារបស់យើងបានចូលរួមក្នុងប្រតិបត្តិការយោធានៅក្រៅប្រទេស ដើម្បីបង្ហាញពីកេរ្តិ៍ឈ្មោះរបស់យោធារបស់យើង។

លោកគីមបានបន្ថែមថា ការដាក់ពង្រាយយោធាដើម្បីគាំទ្ររុស្ស៊ី ក៏បានបង្ហាញដល់ពិភពលោកអំពីកិត្យានុភាពរបស់កងទ័ព និងរដ្ឋរបស់យើង ក្នុងនាមជាកងទ័ពដែលមានជ័យជម្នះជានិច្ច និងជាអ្នកការពារយុត្តិធម៌អន្តរជាតិពិតប្រាកដ។ ជាពិសេសលោកបានសាទរចំពោះកិច្ចខិតខំប្រឹងប្រែងនៅឆ្នាំនេះក្នុងការធ្វើទំនើបកម្ម ការការពារប្រទេស នៅចំពោះមុខការផ្លាស់ប្តូរភូមិសាស្ត្រនយោបាយ និងបច្ចេកវិទ្យាសកលដ៏ធំ។

ដោយឡែក ទីភ្នាក់ងារសារព័ត៌មាន Yonhap ផ្លូវការរបស់កូរ៉េខាងត្បូងបាននិយាយថា លោកគីមបានវាយតម្លៃថា ការពង្រឹងសមត្ថភាពយោធា គឺជាទិសដៅពិតប្រាកដដើម្បីធានាសន្តិសុខ និងការពារប្រទេស៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

មានអ្វីកើតឡើង បើសហភាពអឺរ៉ុប យកទ្រព្យសម្បត្តិ រុស្ស៊ី ដែលបង្កកមកគាំទ្រអ៊ុយក្រែន ?