អាមេរិក ត្រៀមចែកវ៉ាក់សាំង AstraZeneca ៦០លានដូសដល់ប្រទេសដទៃ

សេតវិមានបានប្រកាសកាលពីថ្ងៃចន្ទថា សហរដ្ឋអាមេរិកនឹងបញ្ចេញវ៉ាក់សាំងកូវីដ-១៩ចំនួន៦០លានដូស ពីក្រុមហ៊ុនផលិតថ្នាំ AstraZeneca ចែកជូនប្រទេសដទៃទៀតក្នុងរយៈពេលប៉ុន្មានខែខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វ៉ាក់សាំងនេះមិនទាន់ត្រូវបានអនុញ្ញាតឲ្យប្រើប្រាស់នៅសហរដ្ឋអាមេរិកទេ ហើយវានឹងបញ្ចេញ បន្ទាប់ពីត្រូវបានត្រួតពិនិត្យសុវត្ថិភាពដោយ រដ្ឋបាលចំណីអាហារនិងឱសថរួចរាល់។ អ្នកនាំពាក្យសេតវិមានលោកស្រី Jen Psaki បាននិយាយនៅក្នុងសន្និសីទសារព័ត៌មានមួយថា រឿងនេះអាចកើតឡើងក្នុងរយៈពេលប៉ុន្មានសប្តាហ៍ខាងមុខ។

ទោះបីជាយ៉ាងណាក៏ដោយ សេតវិមានមិនបានបញ្ជាក់ច្បាស់ថា តើប្រទេសណានឹងទទួលបានវ៉ាក់សាំងនោះទេ ប៉ុន្តែថ្នាំបង្ការប្រហែល១០លានដូស បានត្រៀមរួចរាល់ហើយក្នុងការដឹកជញ្ជូននៅពេលនិយតករ បើកភ្លើងខៀវ។ វ៉ាក់សាំងដែលនៅសេសសល់ត្រូវបានគេរំពឹងថា នឹងចែកចាយក្នុងខែឧសភានិងមិថុនា។

វ៉ាក់សាំង AstraZeneca ត្រូវបានគេប្រើប្រាស់យ៉ាងទូលំទូលាយនៅទូទាំងទ្វីបអឺរ៉ុប និងកន្លែងផ្សេងទៀតនៅជុំវិញពិភពលោក។ ប៉ុន្តែក្រុមហ៊ុនមិនទាន់បានដាក់ពាក្យសុំការអនុញ្ញាតឲ្យប្រើប្រាស់ជាបន្ទាន់ នៅសហរដ្ឋអាមេរិកទេ។ 

វ៉ាក់សាំងនេះ ត្រូវបានគេរាយការណ៍ថា មានប្រសិទ្ធភាពក្នុងការទប់ស្កាត់ការចម្លង និងការបញ្ជូនចូលព្យាបាលក្នុងមន្ទីរពេទ្យ ប៉ុន្តែក្រុមហ៊ុនបានប្រឈមនឹងសំណួរពីនិយតករអាមេរិក អំពីទិន្នន័យពីការសាកល្បងរបស់ខ្លួន៕

ប្រែសម្រួលដោយ៖ Vann Vann

ប្រភព៖ NPR

ចុចអាន៖ វ៉ាក់សាំង AstraZeneca៖ ស្ត្រីវ័យក្មេងមានអាការខ្លាំងជាងបុរស ក្រោយពេលចាក់រួច