វីរុសបំប្លែងខ្លួន៧ប្រភេទ កំពុងវាយប្រហារវៀតណាម ក្នុងនោះមាន១ប្រភេទជា វីរុសកូនកាត់ដ៏សាហាវ ឆ្លងតាមខ្យល់

ក្រសួងសុខាភិបាលវៀតណាម បានប្រកាសថា វីរុសកូវីដ-១៩បំប្លែងខ្លួនប្រភេទថ្មី ដែលជាការបង្កាត់ពូជរវាងវីរុសអង់គ្លេសនិងឥណ្ឌា ត្រូវបានរកឃើញនៅក្នុងប្រទេស វៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព័ត៌មានអំពីវីរុសកូនកាត់នេះ ត្រូវបានប្រកាសដោយរដ្ឋមន្រ្តីក្រសួងសុខាភិបាល លោក ​Nguyen Thanh Long ហើយលោកបានពណ៌នាថា វីរុសនេះពិតជាមានគ្រោះថ្នាក់ណាស់។

មកទល់ពេលនេះ ប្រទេសវៀតណាម បានរកឃើញវីរុសបំប្លែងខ្លួនចំនួន៧ប្រភេទហើយ ដោយក្នុងនោះមានដូចជា B.1.222, B.1.619, D614G, B.1.1.7 ឬគេស្គាល់ថាជាវីរុសអង់គ្លេស, B.1.351, A.23.1 និង B.1.617.2 ដែលគេស្គាល់ថាជាវីរុសឥណ្ឌា។

គេហទំព័រ VnExpress បានដកស្រង់សម្តីលោក Long ដែលនិយាយថា ក្នុងពេលឆាប់ៗ វីរុសបំប្លែងខ្លួនកូនកាត់នេះ នឹងត្រូវបានដាក់ឈ្មោះឲ្យ ហើយនឹងផ្តល់ព័ត៌មានលម្អិតអំពីវីរុសនេះ។

លោក Long ក៏បាននិយាយផងដែរថា លទ្ធផលនៃមន្ទីរពិសោធន៍បានបង្ហាញថា វីរុសនេះអាចចម្លងបានកាន់តែសាហាវ ហើយវាចម្លងយ៉ាងឆាប់រហ័សតាមរយៈខ្យល់អាកាស។

ស្របពេលជាមួយគ្នានោះដែរ លោកបានស្តីបន្ទោសថាចំពោះវីរុសកូនកាត់ថ្មីនេះ សម្រាប់ការកើនឡើងនៃករណីឆ្លងយ៉ាងឆាប់រហ័ស នៅក្នុងប្រទេសវៀតណាម។

គួរបញ្ជាក់ថា រហូតមកដល់ពេលនេះ អង្គការសុខភាពពិភពលោក (WHO) បានកំណត់វីរុសបំប្លែងខ្លួនចំនួន៤ ថាជាមេរោគដែលត្រូវព្រួយបារម្ភ ក្នុងនោះមានវីរុសដែលមានដើមកំណើតនៅចក្រភពអង់គ្លេស ឥណ្ឌា ប្រេស៊ីលនិងអាហ្វ្រិកខាងត្បូង៕

ប្រែសម្រួល៖ Vann Vann

ប្រភព៖ Sky News

ចុចអាន៖ គួរបារម្ភ វៀតណាម រក ឃើញ វីរុស បំប្លែង ខ្លួន ឥណ្ឌា និង អង់គ្លេស ចម្រុះ គ្នា ឆ្លងកាន់ តែ លឿន