ដំណឹងថ្មី! ប្រទេសអាស៊ីមួយអះអាងថា វ៉ាក់សាំងចិន Sinopharm មានប្រសិទ្ធភាពខ្ពស់ប្រឆាំងវីរុសបំប្លែងខ្លួនឥណ្ឌា

ក្រុមអ្នកស្រាវជ្រាវមកពីសាកលវិទ្យាល័យឈានមុខគេមួយ នៅក្នុងប្រទេសស្រីលង្កាគឺសាកលវិទ្យាល័យ Sri Jayewardenepura បានរកឃើញថា វ៉ាក់សាំងចិន Sinopharm មានប្រសិទ្ធភាពខ្ពស់ប្រឆាំងនឹងវីរុសបំប្លែងខ្លួនឥណ្ឌា “Delta” ដែលកំពុងគ្របដណ្ដប់នៅទូទាំងពិភពលោក ។

សាកលវិទ្យាល័យបាននិយាយនៅលើគេហទំព័ររបស់ខ្លួនថា “វ៉ាក់សាំង Sinopharm ត្រូវបានគេរកឃើញថាមានប្រសិទ្ធិភាពណាស់ប្រឆាំងនឹងវីរុសបំប្លែងខ្លួនឥណ្ឌា “Delta” ។ ការឆ្លើយតបនៃអង់ទីគ័រចំពោះវីរុសបំប្លែងខ្លួន Delta និងការបន្សាបអង់ទីគ័រ គឺមានលក្ខណៈប្រហាក់ប្រហែលនឹងកម្រិតដែលបានឃើញ បន្ទាប់ពីការឆ្លងវីរុសនេះ” ។

យោងតាមការសិក្សាស្រាវជ្រាវនោះបានឲ្យដឹងថា ៩៥ ភាគរយនៃអ្នកដែលបានទទួលវ៉ាក់សាំង Sinopharm ចំនួន ២ ដូសបានបង្កើតអង់ទីគ័រដែលស្រដៀងគ្នានឹងមនុស្សដែលមានជំងឺកូវីដ ១៩ ។

ការសិក្សាបានបង្ហាញទៀតថា វ៉ាក់សាំង Sinopharm ចំនួន ២ ដូសបានបង្កើតការផលិតអង់ទីគ័របន្សាំក្នុងចំនួន ៨១.២៥ ភាគរយនៃអ្នកទទួលការចាក់ ហើយកម្រិតនៃអង់ទីគ័រទាំងនេះគឺ ប្រហាក់ប្រហែលនឹងអ្វីដែលនឹងកើតឡើង ក្រោយជាសះស្បើយពីការឆ្លងជំងឺកូវីដ ១៩ ។

គួរបញ្ជាក់ថា វ៉ាក់សាំង Sinopharm ត្រូវបានអនុម័តសម្រាប់ការប្រើប្រាស់ជាបន្ទាន់នៅទូទាំងពិភពលោក ដោយអង្គការសុខភាពពិភលលោក (WHO) នៅខែឧសភាឆ្នាំនេះ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ មិនធម្មតា! វ៉ាក់សាំង Sinopharm មានប្រសិទ្ធភាព យកឈ្នះវីរុសបំប្លែងខ្លួនជាង ១០ ប្រភេទ