ចាំទេ តាលីបង់ ប្រកាសជ័យជម្នះដោយបាញ់កាំភ្លើង និងកាំជ្រួចជាការអបអរ តែបែរជាចំជនស៊ីវិលស្លាប់ច្រើននាក់

ទីភ្នាក់ងារព័ត៌មានមួយបាននិយាយកាលពីថ្ងៃសៅរ៍ថា មនុស្សយ៉ាងតិច ១៧ នាក់ត្រូវបានសម្លាប់នៅក្នុងការបាញ់កាំភ្លើងអបអរសាទរដោយក្រុមតាលីបង់នៅទីក្រុងកាប៊ុល ។

ទីភ្នាក់ងារសារព័ត៌មាន Shamshad បាននិយាយថា “ការបាញ់កាំភ្លើងឡើងទៅលើអាកាសនៅទីក្រុងកាប៊ុលកាលពីថ្ងៃសុក្រសប្ដាហ៍មុនបានសម្លាប់មនុស្ស ១៧ នាក់ និងរបួស ៤១ នាក់” ។

ទន្ទឹមនោះ លោក Gulzada Sangar អ្នកនាំពាក្យមន្ទីរពេទ្យក្នុងតំបន់មួយនៅខេត្ត Jalalabad បាននិយាយថា មនុស្សយ៉ាងតិច ១៤ នាក់បានរងរបួសនៅក្នុងការបាញ់កាំភ្លើងឡើងទៅលើអាកាសនៅឯខេត្ត Nangarhar ភាគខាងកើត ។

ស្របពេលជាមួយគ្នានោះ ការបាញ់កាំភ្លើងឡើងទៅលើអាកាសរបស់ក្រុមតាលីបង់ ក៏មានការស្តីបន្ទោសពីអ្នកនាំពាក្យតាលីបង់គឺលោក Zabihullah Mujahid ។

លោក Mujahid បាននិយាយនៅក្នុងសារមួយនៅលើបណ្តាញសង្គម Twitter ថា “សូមជៀសវាងការបាញ់កាំភ្លើងទៅលើអាកាស ហើយអរគុណព្រះជំនួសវិញ ។ គ្រាប់កាំភ្លើងអាចបង្កគ្រោះថ្នាក់ដល់ជនស៊ីវិល ដូច្នេះកុំបាញ់ដោយមិនចាំបាច់” ។

គួរបញ្ជាក់ថា យុទ្ធជនតាលីបង់បានបាញ់កាំភ្លើងឡើងទៅលើអាកាស និងកាំជ្រួចជាការអបអរនៅក្នុងរដ្ឋធានី​កាប៊ុល ខណៈដែលសហរដ្ឋអាមេរិកបានបញ្ចប់ការដកទ័ពចេញពីអាហ្វហ្គានីស្ថាន ពោលជិត ២០ ឆ្នាំ បន្ទាប់ពីខ្លួនបានឈ្លានពានប្រទេសនេះ ក្រោយការវាយប្រហារថ្ងៃទី ១១ ខែកញ្ញាឆ្នាំ ២០០១ លើអគារពាណិជ្ជកម្ម ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS

ចុចអាន ៖ តាមផ្លូវវាយលុកទៅបន្ទាយចុងក្រោយ ក្រុមតាលីបង់ រាប់រយនាក់ត្រូវបានកម្ចាត់ដោយចលនាតស៊ូប្រដាប់អាវុធ អាហ្វហ្គានីស្ថាន