ព័ត៌មានអន្ដរជាតិ

ទោះរកឃើញករណីថ្មី ៣នាក់ក្នុងសហគមន៍ ថៃនៅតែអនុញ្ញាតប្រារព្ធពិធីឆ្លងឆ្នាំថ្មី ២០២១

បានផុស

៥ years មុន

នៅ

ថ្ងៃចន្ទ ៧ ធ្នូ ២០២០

ដោយ

បើទោះជាប្រទេសថៃ កាលពីចុងសប្តាហ៍ បានរកឃើញករណីឆ្លងថ្មីក្នុងសហគមន៍ដល់ទី ៣នាក់បន្ថែមទៀតក្តី ប៉ុន្តែការប្រារព្ធពិធីរាប់ថយក្រោយឆ្លងឆ្នាំចាស់ ចូលឆ្នាំថ្មី ២០២១ ត្រូវរដ្ឋាភិបាលប្រទេសនេះ អនុញ្ញាតប្រារព្ធធ្វើដដែល ដោយគ្រាន់តម្រូវឲ្យពលរដ្ឋអនុវត្តស្តង់ដារសុវត្ថិភាពឲ្យបានត្រឹមត្រូវ។ នេះបើតាមការអះអាងពីមេបញ្ជាការយោធាថៃ លោក Nattaphon Narkphanit ប្រធានមជ្ឈមណ្ឌលរដ្ឋាភិបាលជំងឺកូវីដ ១៩ ដោយរំពឹងនឹងដកចេញការរឹតបន្តឹងវិធានការសង្គមមួយចំនួនទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់កាសែតបាងកកប៉ុស្តិ៍ លោក Nattaphon Narkphanit និយាយថា គណៈកម្មាធិការរបស់លោក នៅថ្ងៃច័ន្ទនេះ នឹងពិភាក្សាជាមួយក្រសួងការបរទេស ដើម្បីដកចេញវិធានការមួយចំនួនសម្រាប់ជនបរទេសដែលចូលមកប្រទេសរបស់ខ្លួន រាប់បញ្ចូលទាំងការរៀបចំទិដ្ឋិការសម្រាប់ការធ្វើដំណើរជាដើម ប៉ុន្តែសុខុមាលភាពសាធារណៈនៅតែជាក្តីបារម្ភអាទិភាពរបស់រដ្ឋាភិបាល។

ព្រឹត្តិការណ៍ឆ្លងឆ្នាំថ្មី ២០២០ ចូលឆ្នាំ ២០២១ រាប់បញ្ចូលទាំងសកម្មភាពរាប់ថយក្រោយ អាចនឹងត្រូវរឹតបន្តឹងស្របតាមស្តង់ដារសុវត្ថិភាពរបស់រដ្ឋាភិបាល ដើម្បីគ្រប់គ្រងការឆ្លងរាតត្បាតជំងឺកូវីដ ១៩។ នេះបើតាមការបញ្ជាក់បន្ថែមពីលោក Nattaphon Narkphanit អគ្គលេខាធិការនៃក្រុមប្រឹក្សាសន្តិសុខជាតិថៃ។

ទោះជាយ៉ាងណា ខេត្តមួយចំនួននៅភាគខាងជើងប្រទេសថៃ រាប់បញ្ចូលទាំងឈាងម៉ៃ ឈាងរ៉ៃ សុទ្ធតែជាប់ព្រំដែនជាមួយប្រទេសភូមា និងទើបរកឃើញករណីឆ្លងកូវីដ ១៩ ថ្មី ត្រូវលោកនាយករដ្ឋមន្ត្រីថៃ ប្រយុទ្ធ ចាន់អូចា ណែនាំឲ្យធ្វើរឹតបន្តឹងឲ្យបានខ្លាំងជាមុន។ នេះជាការបញ្ជាក់ពីលោក Traisuree Taisaranakul អ្នកនាំពាក្យទី២របស់រដ្ឋាភិបាល៕

ប្រែសម្រួល៖ សុភា
ប្រភព៖ Bangkok Post