ឡាវ ផ្អាកនាំចូលជ្រូក និងផលិតផលសាច់ជ្រូកពី ថៃ

យោងតាមការចុះផ្សាយរបស់កាសែត Vientiane Times បានឲ្យដឹងថា ក្រសួងកសិកម្ម និងរុក្ខាប្រមាញ់ឡាវបានចេញសេចក្តីជូនដំណឹងមួយស្តីពីការផ្អាកការនាំចូលជ្រូក និងផលិតផលសាច់ជ្រូកពីប្រទេសថៃជាបណ្តោះអាសន្ន ។

ការផ្អាកនេះគឺដោយសារការឆ្លងរាលដាលនៃជំងឺប៉េស្តជ្រូកអាហ្រ្វិកកំពុងរាតត្បាតខ្លាំងនៅក្នុងប្រទេសថៃនាពេលបច្ចុប្បន្ន ។

ទន្ទឹមនោះ សេចក្តីប្រកាសនេះធ្វើឡើងក្នុងបំណងដើម្បីទប់ស្កាត់ការឆ្លងរាតត្បាតនៃជំងឺប៉េស្តជ្រូកអាហ្រ្វិកកុំឲ្យរាលដាលចូលមកក្នុងប្រទេសឡាវ ។

ចំពោះបញ្ហាផ្អាកការនាំចូលជ្រូករស់ និងផលិតផលសាច់ជ្រូកពីប្រទេសថៃនាពេលនេះ ខាងអាជ្ញាធរពាក់ព័ន្ធឡាវបានបញ្ជាក់ថា សម្រាប់ការផ្គត់ផ្គង់ជ្រូកក្នុងប្រទេសឡាវ នឹងមិនប៉ះពាល់ដល់កង្វះខាតទីផ្សារឡាវនោះទេ ដោយសារកសិដ្ឋានចិញ្ចឹមជ្រូកនៅក្នុងប្រទេសឡាវក៏មានចំនួនច្រើន ដែលមានលទ្ធភាពអាចផ្គត់ផ្គង់ទីផ្សារបាន ។

ចំណែកមន្ត្រីជាន់ខ្ពស់ក្រសួងពាណិជ្ជកម្មថៃបានប្រាប់ RFA Lao ថា ប្រទេសថៃបានចេញសេចក្តីជូនដំណឹងរួចមកហើយ ចាប់តាំងពីថ្ងៃទី៥ ខែមករា ឆ្នាំ២០២២ ដោយបញ្ជាក់ថា ថៃបានផ្អាកការនាំចេញជ្រូករស់ជាបណ្តោះអាសន្នរយៈពេល ៣ ខែ ដោយសារកង្វះខាតជ្រូកនៅក្នុងប្រទេសថៃ ៕

ប្រែសម្រួលដោយ ៖ គង់ សំអាន

ប្រភព ៖ RFA Lao

ចុចអាន ៖ គ្រូពេទ្យជំនាញថា គ្មានប្រជាជន ថៃ ណាម្នាក់គេចផុតឆ្លង អូមីក្រុង ឡើយ