ហុងកុង ជ្រើសរើសបាន មេដឹកនាំថ្មី

លោក John Lee Ka-chiu ដែលជាបេក្ខភាពតែមួយគត់ សម្រាប់ការបោះឆ្នោតភាពជាអ្នកដឹកនាំទីក្រុងហុងកុង ត្រូវបានបញ្ជាក់នៅថ្ងៃអាទិត្យទី៨ខែឧសភាថា ក្លាយជានាយកប្រតិបត្តិថ្មីរបស់ទីក្រុងនេះ។

លោក Lee ទទួលបានសំឡេងឆ្នោតចំនួន ១៤១៦ ក្នុងចំណោម ១៤២៤ សន្លឹកឆ្នោតពោលគឺស្មើនឹង ៩៩,៤ ភាគរយនៃសន្លឹកឆ្នោតទាំងអស់ ដែលជាពិន្ទុខ្ពស់បំផុតមិនធ្លាប់មាននៅក្នុងការប្រកួតប្រជែងមេដឹកនាំទីក្រុងហុងកុង។

ភ្លាមៗបន្ទាប់ពីលទ្ធផលត្រូវបានប្រកាស លោក Lee បានបង្ហាញខ្លួននៅលើឆាកជាមួយភរិយាដោយថ្លែងសុន្ទរកថាជ័យជម្នះថា លោកនឹងបម្រើទីក្រុង ប្រទេស និងប្រជាជនហុងកុងនៅក្នុងមុខតំណែងថ្មីនេះ។

លោកលើកឡើងថា “យើងនឹងបន្តប្រកាន់ខ្ជាប់នូវនីតិរដ្ឋ ដែលជាសសរស្តម្ភស្នូលនៃអភិបាលកិច្ចល្អរបស់យើង និងដោះស្រាយបញ្ហាប្រឈមនាពេលអនាគតប្រកបដោយទំនុកចិត្តដាច់ខា​ត ការពារអធិបតេយ្យភាពរបស់ប្រទេសយើង សន្តិសុខជាតិ និងផលប្រយោជន៍អភិវឌ្ឍន៍”។

លោកក៏បាននិយាយដែរថា លោកនឹង “ការពារហុងកុង ពីការគំរាមកំហែងខាងក្នុង និងខាងក្រៅ ហើយធានាថា ស្ថិរភាពរបស់ខ្លួននឹងបន្តមានសារៈសំខាន់”។

សន្តិសុខត្រូវ​បាន​រឹតបន្តឹង​​ពេញ​មួយ​ព្រឹក ដោយ​ប៉ូលិស​បាន​ដាក់ពង្រយកម្លាំង​រហូតដល់ទៅ ៧០០០ នាក់ ដើម្បី​ធានា​ថា ​ការបោះឆ្នោត​ប្រព្រឹត្តទៅ​ដោយ​រលូន និង​ដោយ​សន្តិវិធី​។

លោក Lee ដែលមានអាយុ ៦៤ ឆ្នាំ បានលាលែងពីតំណែងរបស់គាត់ជាមន្ត្រីលេខ ២ របស់ទីក្រុងនេះ កាលពីខែមុនដើម្បីឈរឈ្មោះ និងជាបេក្ខជនតែម្នាក់គត់ក្នុងការបោះឆ្នោត៕

ប្រែសម្រួល៖ Vann Vann

ប្រភព៖ SCMP

ចុចអាន៖ អគ្គិភ័យកំពុងឆាបឆេះ មជ្ឈមណ្ឌលពាណិជ្ជកម្មពិភពលោក ហុងកុង