លោក ពូទីន ថា អឺរ៉ុបសម្លាប់សេដ្ឋកិច្ចខ្លួនឯង ដោយការដាក់ទណ្ឌកម្ម រុស្ស៊ី (មានវីដេអូ)

កាលពីថ្ងៃអង្គារទី១៧ខែឧសភា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយថា វិស័យប្រេងកំពុងឆ្លងកាត់ “ការផ្លាស់ប្តូរដ៏ប៉ះទង្គិច” ប៉ុន្តែអះអាងថា អឺរ៉ុបនឹងធ្វើ “អត្តឃាតសេដ្ឋកិច្ច” ជាមួយនឹងការដាក់ទណ្ឌកម្មរបស់ខ្លួន លើទីក្រុងមូស្គូ។

លោកពូទីននិយាយថា តាមរយៈការព្យាយាមបញ្ឈប់ការផ្គត់ផ្គង់ថាមពលរបស់រុស្ស៊ី អឺរ៉ុបនឹងធ្វើឲ្យខ្លួនឯងឈឺចាប់។ លោកបានប្រាប់កិច្ចប្រជុំថាមពលមួយថា អឺរ៉ុបនឹងជួបប្រទះតម្លៃថាមពលខ្ពស់ និងអតិផរណាខ្ពស់ ដែលជាលទ្ធផលនៃសកម្មភាពរបស់ខ្លួន។ 

លោកលើកឡើងថា ពិត​ណាស់ ការ​ធ្វើ​អត្តឃាត​សេដ្ឋកិច្ច​បែប​នេះ ​គឺ​ជា​កិច្ចការ​ក្នុង​ស្រុក​របស់​ប្រទេស​នៅ​អឺរ៉ុប។

បន្ទាប់ពីវិមានក្រឹមឡាំងបានបញ្ជូនទាហានទៅអ៊ុយក្រែនកាលពីថ្ងៃទី ២៤ ខែកុម្ភៈ លោកខាងលិចបានដាក់ទណ្ឌកម្មដែលមិនធ្លាប់មានពីមុនមកប្រឆាំងនឹងរុស្ស៊ី។

បណ្តាប្រទេសលោកខាងលិច បានបង្ហាញពីការសហការគ្នាយ៉ាងជិតស្និទ្ធ ក្នុងការប្រកាសអំពីទណ្ឌកម្មរបស់ពួកគេ ប៉ុន្តែធ្វើមិនបានក្នុងល្បឿនដូចគ្នាទេ នៅពេលនិយាយអំពីប្រេង និងឧស្ម័នរបស់រុស្ស៊ី។

លោក ពូទីន សង្ឃឹមថា នឹងបង្វែរការផ្គត់ផ្គង់ទៅកាន់ប្រទេសជាមិត្ត នៅពេលដែលបណ្តាប្រទេសអឺរ៉ុប ស្វែងរកវិធីដើម្បីកាត់បន្ថយថាមពលរបស់រុស្ស៊ី។

លោកអះអាងថា សកម្មភាពវឹកវររបស់អឺរ៉ុប មិនត្រឹមតែធ្វើឲ្យខូចសេដ្ឋកិច្ចរបស់ខ្លួនប៉ុណ្ណោះទេ ថែមទាំងជួយរុស្ស៊ី ឲ្យទទួលបានប្រាក់ចំណូលកាន់តែច្រើនពីប្រេង និងឧស្ម័នផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Al Jazeera

ចុចអាន៖ អាមេរិក កំពុងប្រមូល ភេរវករ ISIS ឲ្យទៅ ប្រយុទ្ធ នៅ អ៊ុយក្រែន