ព័ត៌មានអន្ដរជាតិ

កាណាដានឹងអនុម័តច្បាប់ហាមប្រើ-ទិញ-លក់កាំភ្លើងខ្លី ប្រហែលរួមទាំងកាំភ្លើងជ័រ

បានផុស

៤ years មុន

នៅ

ថ្ងៃអង្គារ ៣១ ឧសភា ២០២២

ដោយ

នាយករដ្ឋមន្ត្រីប្រទេសកណាដា លោក Justin Trudeau កាលពីថ្ងៃចន្ទ ទី៣០ ខែឧសភាបាននិយាយថា រដ្ឋាភិបាលរបស់លោកបានកំពុងណែនាំច្បាប់ថ្មីស្តីពីការអនុវត្តនូវការហាមឃាតទូទាំងប្រទេសអំពីការកាន់កាប់អាវុធ និងទិញ-លក់អាវុធគ្រប់ទីកន្លែងទូទាំងប្រទេស។

«នៅថ្ងៃដែលច្បាប់នេះចូលជាធរមាន វានឹងមិនអាចលក់ ទិញ ផ្ទេរ ឬនាំចូលអាវុធខ្លីមកក្នុងប្រទេសកាណាដាទៀតទេ»។ លោក Trudeau បានប្រាប់អ្នកសារព័ត៌មាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីថ្លែងការណ៍របស់ក្រសួងបង្ហាញថា ប្រសិនបើទទួលបានការអនុម័ត ការហាមឃាតលើកាំភ្លើងខ្លីត្រូវបានគេរំពឹងនឹងចូលជាធរមាននៅរដូវស្លឹកឈើជ្រុះ។ រដ្ឋមន្ត្រីសុវត្ថិភាពសាធារណៈរបស់កាណាបានដាក់តារាងធ្វើវិសោធនកម្មបទប្បញ្ញត្តិនៅក្នុងសភាដើម្បីធ្វើឲ្យប្រាកដថា វាអាចត្រូវបានអនុវត្តយ៉ាងឆាប់រហ័ស។

ការបាញ់សម្លាប់កុមារ១៩នាក់ និងគ្រូបង្រៀន២នាក់កាលពីសប្តាហ៍មុននៅសាលាបឋមសិក្សាមួយក្នុងរដ្ឋតិចសាស សរហដ្ឋអាមេរិកបានធ្វើឲ្យមានការព្រួយបារម្ភអំពីហិង្សាដោយអាវុធទូទាំងពិភពលោក។ កាណាដាបានរឹតត្បិតច្បាប់កាន់អាវុធយ៉ាងតឹងរ៉ឹងជាងប្រទេសជិតខាងរបស់ខ្លួនភាគខាងត្បូង។

កាណាដាបានហាមលក់ និងប្រើប្រាស់អាវុធវាយប្រហារប្រហែលជា១៥០០ម៉ូដែលដូចជាកាំភ្លើង AR-15 ជាដើមកាលពីពីរឆ្នាំមុន។ ថ្លែងជាមួយនាយករដ្ឋមន្ត្រី Trudeau, រដ្ឋមន្ត្រីសុវត្ថិភាពសាធារណៈ លោក Marco Mendicino បានបញ្ជាក់ថា ៖«ការចាប់ផ្តើមជិតដល់ដំណាក់កាលដំបូងនៃកម្មវិធីមួយដើម្បីទិញត្រឡប់វិញ និងផ្តល់សំណងដល់ម្ចាស់កាំភ្លើង»។

សូម្បីតែឧបករណ៍ក្មេងលេងដែលមានទ្រង់ទ្រាយជាអាវុធក៏អាចត្រូវបានហាមឃាតដែរ។ រដ្ឋមន្ត្រីក្រសួងយុត្តិធម៌ លោក David Lametti បានប្រាប់អ្នកកាសែតថា ៖«ដោយសារ ពួកវាមើលទៅដូចជាកាំភ្លើងពិតប្រាក ប៉ូលិសត្រូវការត្រូតពិនិត្យពួកវា ថាតើវាជាកាំភ្លើងពិតឬយ៉ាងណា។ ប្រការនេះអាចនាំឲ្យមានគ្រោះមហន្តរាយ»។

ច្បាប់ថ្មី Bill C-21 ក៏បានស្នើដកហូតអាជ្ញាប័ណ្ណអាវុធចំពោះនរណាដែលជាប់ពាក់ព័ន្ធនឹងហិង្សាក្នុងគ្រួសារ ឬការបៀតបៀនឧក្រិដ្ឋកម្ម។

អត្រានៃឃាតកម្មដោយអាវុធរបស់កាណាដាមានត្រឹមតែ០.៥%ក្នុងចំណោមរាល់មនុស្ស១០ម៉ឺននាក់ បើប្រៀបធៀបនឹងអាមេរិកមាន ៤.១២% ក្នុងចំណោមរាល់មនុស្ស១០ម៉ឺននាក់។ នេះបើយោងតាមការវិភាគរបស់វិទ្យាស្ថានវាស់វែង និងវាយតម្លៃសុខភាពរបស់សាកលវិទ្យាល័យវ៉ាស៊ីនតោន៕

ប្រែសម្រួល៖ វីរបុត្រ
ប្រភព៖ Reuters

Related Topics:ប្រទេសកាណាដា