កូរ៉េខាងត្បូង ចាំតែជួយ កូរ៉េខាងជើង ប៉ុណ្ណោះ បើរំសាយអាវុធនុយក្លេអ៊ែរ

ប្រធានាធិបតីកូរ៉េខាងត្បូងលោក Yoon Suk-yeol បាននិយាយកាលពីថ្ងៃចន្ទថា ប្រទេសកូរ៉េខាងត្បូងបានត្រៀមខ្លួនរួចជាស្រេចដើម្បីជួយសម្រួលដល់ការអភិវឌ្ឍនៃវិស័យសេដ្ឋកិច្ច ថាមពល ពាណិជ្ជកម្ម កសិកម្ម និងប្រើប្រាស់គំនិតផ្តួចផ្តើមវិនិយោគអន្តរជាតិសម្រាប់កូរ៉េខាងជើង ប្រសិនបើទីក្រុងព្យុងយ៉ាងចាប់ផ្តើមដំណើរការលុបបំបាត់អាវុធនុយក្លេអ៊ែរពិតប្រាកដមែន ។

លោក Yoon បានប្រាប់ប៉ុស្តិ៍ទូរទស្សន៍ KTV ថា “បើទីក្រុងព្យុងយ៉ាងបិទការអភិវឌ្ឍអាវុធនុយក្លេអ៊ែរ និងចាប់ផ្តើមការរំសាយអាវុធនុយក្លេអ៊ែរពិតប្រាកដ ខ្ញុំស្នើផែនការដ៏ធំមួយដែលមានបំណងធ្វើឲ្យប្រសើរឡើងនៃសេដ្ឋកិច្ច ក៏ដូចជាជីវិតរស់នៅរបស់ប្រជាជនកូរ៉េខាងជើង ពោលគឺការអនុវត្តស្របតាមដំណាក់កាលនៃការរំសាយអាវុធនុយក្លេអ៊ែររបស់កូរ៉េខាងជើង” ។

លោកប្រធានាធិបតីបាននិយាយទៀតថា ផែនការនេះរួមមាន កម្មវិធីអាហារខ្នាតធំ ជំនួយក្នុងការបង្កើតហេដ្ឋារចនាសម្ព័ន្ធឧស្សាហកម្ម ការបញ្ជូន និងចែកចាយការផ្គត់ផ្គង់អគ្គិសនី ក៏ដូចជាការធ្វើទំនើបកម្មកំពង់ផែ និងអាកាសយានដ្ឋាន ដើម្បីរៀបចំពាណិជ្ជកម្មអន្តរជាតិឲ្យកូរ៉េខាងជើង ។

លោកបានបន្ថែមថា ទីក្រុងសេអ៊ូលក៏ត្រៀមខ្លួនជាស្រេចដើម្បីជួយក្រុងព្យុងយ៉ាងក្នុងការបង្កើនផលិតភាពកសិកម្ម កម្រិតហេដ្ឋារចនាសម្ព័ន្ធវេជ្ជសាស្រ្ត និងប្រើប្រាស់គំនិតផ្តួចផ្តើមជំនួយហិរញ្ញវត្ថុវិនិយោគអន្តរជាតិជាដើម ។

គួរបញ្ជាក់ថា លោក Yoon បានថ្លែងបែបនេះនៅក្នុងទិវារំដោះជាតិកូរ៉េដែលត្រូវបានប្រារព្ធឡើងជារៀងរាល់ឆ្នាំនៅថ្ងៃទី ១៥ ខែសីហា ដើម្បីរំឭកដល់ការរំដោះប្រទេសកូរ៉េពីការគ្រប់គ្រងរបស់ជប៉ុននៅឆ្នាំ ១៩៤៥ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី-កូរ៉េខាងជើង ចាប់ដៃគ្នាពង្រីកទំនាក់ទំនងទ្វេភាគី ទប់ទល់ការគំរាមកំហែងរបស់ អាមេរិក